KAL᷊AL᷊AHE 4
4
Pananumba su sorga
1Bou e'e ia nakahombang sau kawawua. Ia nakawua simbau tukari mawawuka su sorga. Bou e'e nakaringihi l᷊ai pia tingihi ko bou titae seng nangul᷊i si sia kere tingihi u tarompeti. Tingihi e'e nangul᷊i, “Ndai awi sarang ndaung i'i. Ia sarung mupakal᷊ahe si kau apang ko sarung mariadi tuhue.” 2Turusi l᷊ai ia nikawasa ngu Roh u Mawu Ruata. Bou e'e ia nakawua su sorga pia simbau kararatuang, dang pia singkatau kakangiang su kararatuang e'e. 3#Yeh. 1:26-28, 10:1Pahesu taumata e'e kimerong kere parmata yaspis dingang u parmata sardis. Pia rindipahi simbau mul᷊al᷊ahaghi ngu kulurie nul᷊iku kararatuang e'e. 4Su l᷊al᷊ung u l᷊imbongu kaul᷊i u kararatuang e'e pia duampul᷊o pa kararatuang ko wal᷊inge. Su se'e kakangiang duampul᷊o pa sukataunge pangaha ko dingang u pakeange mawira, dang pia nupapake u mahkota wul᷊aeng. 5#Kel. 19:16; Yeh. 1:13; Za. 4:2; Kl᷊h. 1:4, 8:5, 11:19, 16:18Bou kararatuang e'e kukerong sinang u kila dang tingihu rul᷊u ko makaopehi. Dang su saruang u kararatuang e'e pia obori pitu kahenange; e'e kapitu Roh u Mawu Ruata. 6#Yeh. 1:22 #Yeh. 1:5-10, 10:14Pia l᷊ai su saruang u kararatuang e'e simbau kere l᷊auri sahuming, matilang musul᷊ung u kristal.
Su l᷊al᷊ung u kararatuang, suapang sindihange, pia pa barang ko niriadi su saruange dingang su l᷊ikure napene u mata. 7Niriadi ko kahimotongange tuhungang kere singa. Ko karuange musul᷊ung u kere sapi koese. Ko katilunge pia pahese kere pahesu taumata. Ko kapae, tuhungang kere burung kamba ko katilae. 8#Yes. 6:2-3; Yeh. 1:18, 10:12Ko kapae niriadie e'e, nahiau tatilae taha nung, dang su kaul᷊ie l᷊au susimbuka ngu l᷊al᷊unge napene dingang u mata. L᷊ou huwi ko niriadi e'e ta mangiro musamperi,
“Susi, susi, susi ko Mawu, Mawu Ruata makawasa;
ko ene, ko seng ene dang ko ene turusi.”
9Ko kapae niriadi e'e musamperu manga samperi daralo, adati dang tatarimakase si Sie ko kakangiang su kararatuang e'e, I Sie ko wiahi sarang kal᷊iwuenge. Dang su tempo ngu manga niriadi e'e kasampere, 10i sire duampul᷊o pa pangaha e'e nusuba su saruang u taumata ko kakangiang su kararatuang e'e, bou e'e nanumba si Sie ko wiahi sarang kal᷊iwuenge. Bou e'e i sire namuka l᷊au namilo manga mahkota ngi sire su saruang u kararatuang e'e dingang u nangul᷊i,
11“Oh Mawu, Mawu Ruata ngi kami!
I kau kitang botonge manarima u dalo, adati l᷊au u kawasa.
Watu u ko I Kau nundiadi kaul᷊i u patiku,
dang su l᷊al᷊ung u kao-U l᷊ai kaul᷊i u patiku e'e seng nariadi dang nuwiahi.”
Currently Selected:
KAL᷊AL᷊AHE 4: LAISXN
Highlight
Share
Copy
Want to have your highlights saved across all your devices? Sign up or sign in
2014 Indonesian Bible Society (Lembaga Alkitab Indonesia)
