KAL᷊AL᷊AHE 11
11
Duang katau saksi
1 #
Yeh. 40:3; Za. 2:1-2 Bou e'e ia nionggol᷊ang u kau simpoto ko mupapahing u tiking l᷊aukuri simbau, buhue niparentang, “Dakote pangukuri Wal᷊e-Ngu Mawu Ruata dingang u Mezbah. Rekeng ko pira kaul᷊i u taumata ko kapunggaweti nge su l᷊al᷊unge. 2#Luk. 21:24Kateho kumbahangwe mangukuri lilahi ko su l᷊ikuru Wal᷊e-Ngu Mawu Ruata e'e, watu u bageang e'e seng nisarakang su manga taumata ko wugha-Ngu Mawu. I sire sarung mul᷊inda-l᷊inda soa ko susi e'e pau pul᷊o dua suwul᷊ange l᷊iwuenge. 3Ia sarung mundoi duang katau saksiku ko mul᷊oho pakeang mul᷊al᷊utu, dang i sire sarung mupakatitong u habaru Mawu Ruata su tempo sihiwu dua hasu nungu pul᷊o su l᷊ou nge.”
4 #
Za. 4:3,11-14 Saksi darua e'e ko l᷊aesu Zaitun duang kau dang rihi ngu sol᷊o darua ko ene su saruang u Mawu ngu kaul᷊i u dunia. 5Boko taumata manal᷊uka mukoa barang ko dal᷊ai si sire, kuteu bou mohong i sire pia putung su muwang ko makasilaka kaul᷊i u roka e, dingang u ral᷊eng kere'e, kaul᷊i u taumata ko mo mupakaturu si sire sarung mate. 6#Kel. 7:17-19; 1Sam. 4:8; 1Raj. 17:1I sire pia kawasa manaka l᷊angi tadeau kumbahang mutahiti su tempo ngi sire mamohang habari bou Mawu Ruata. I sire pia l᷊ai kawasa su kaul᷊i u mata ngu ake, guna ngu mamal᷊u ake makoa daha. Dang i sire pia l᷊ai kawasa guna ngu muhukungu dunia dingang u patiku haghingu silaka, suapang tempo ko balae we kao i sire mukoa.
7 #
Dan. 7:7,21; Kl᷊h. 13:5-7, 17:8 Saritau i sire nasue bou numbawa habari sire, binatang ko sumuwang bou l᷊al᷊ung u towau papate sarung mundoka si sire. I sie sarung mupakawata dang mamate si sire. 8#Yes. 1:9-10Dang badang i sire sarung mawatang su l᷊al᷊eng ko l᷊abo su soa, su tampa Mawu ngi sire nisalipi. Areng sasihingu soa e'e Sodom arako Mesir. 9Manga taumata bou kaul᷊i u wanua, suku, bahasa dang bangsa sarung makawua bangke ngi sire tilu l᷊ou stenga l᷊iwuenge, dang ta mahumbang bangkengi sire e'e i luwing. 10Tataho u dunia sarung l᷊umiaghi su papate ngu saksi darua e'e. I sire sarung mukoa karameang dingang u muraroho ngu paraseng, watu u nabi darua e'e seng nangonggo maul᷊i singsara su kaul᷊i u taumata su dunia. 11#Yeh. 37:10Saritau til᷊u lou stenga sinango ngu puwawiahi nusumongo bou Mawu Ruata dang sau sumu su l᷊al᷊ung u bangke ngu nabi darua e'e. I sire sau nuwangung nurumarisi, hakiu kaul᷊i u taumata nakawua nataku dal᷊ai l᷊ai. 12#2Raj. 2:11Bou e'e nabi darua e'e nakaringihi tingihi mauha ko kakuinge si sire bou sorga, “Maite awi ndai sarang i'i!” Kuteu su saruang u manga roka i sire, i sire tarai nawi sarang sorga nipikung u winawa. 13#Kl᷊h. 6:12, 16:18Kuteu singkatempo e'e dingang nariadi rinuhi mauha. Simbahageang mapul᷊o bou soa e'e narusa, l᷊au u pitu hiwu taumata nate watu'u kauhau rinuhi e'e. Manga taumata ko wal᷊inge nataku dal᷊ai l᷊ai, bou e'e i sire nundalo kawawantughu Mawu Ruata su sorga.
14Sil᷊aka karuange seng nal᷊iu. Kateho tuhungete! Sil᷊aka ko katilunge singkodo l᷊ai sarung makatuhu.
Tarompeti kapitunge
15 #
Kel. 15:18; Dan. 2:44, 7:14,27 Bou e'e mal᷊aikati kapitunge nutiu tarompete, kuteu su sorga nikaringihi manga tingihi mauha kahingang ko nangul᷊i, “Kawasa guna ngu mamarenta dunia ene orasi i'i su l᷊ima ngu Mawu ngi kite dang Ratu Manal᷊amati ko nidiandi-Nge. I Sie sarung mamarenta sarang kaliwuenge!” 16Kuteu i sire duampul᷊o pa pangaha ko kakangiang su kararatuang i sire su saruang u Mawu Ruata, nusuba dang nanumba Mawu Ruata. 17I sire nangul᷊i,
“Mawu, Mawu Ruata Makawasa,
ko ene, dang ko seng ene!
I kami mutarimakase si Kau, watu u I Kau seng mupake u kawasa-Ngu ko l᷊abo,
dang seng nanita namarenta!
18 #
Mzm. 2:5, 110:5, 115:13 Apang taumata ko wugha-Ngu Mawu, nanulu
Watu u seng temponge I Kau nupasuwang u wawal᷊uang-U,
dang seng temponge l᷊ai I Kau mamonesi apang taumata nate.
I'i seng temponge munggile u wawaehu sagheru manga l᷊ang-U, i sire apang nabi,
dang su kaul᷊i u umat-U, e'e ko kaul᷊i u taumata ko mutahamawu si Kau,
ko l᷊abo l᷊au ko dio.
Seng i'i temponge mupakawinasa ngu manga taumata ko mupakawinasa ngu dunia!”
19 #
Kl᷊h. 8:5, 16:18, 21 Kuteu dingang nawuka Wal᷊e-Ngu Mawu Ruata su sorga, dang nikawua wantal᷊i pudadiandi su l᷊al᷊unge. Bou e'e nariadi kila mul᷊al᷊ahaweng dang tingihu l᷊ul᷊u dudal᷊ope dang makatingkasi, l᷊au u rinuhi dang tahiti eisi ko l᷊abo.
Currently Selected:
KAL᷊AL᷊AHE 11: LAISXN
Highlight
Share
Copy
Want to have your highlights saved across all your devices? Sign up or sign in
2014 Indonesian Bible Society (Lembaga Alkitab Indonesia)
