KAL᷊AL᷊AHE 12

Tauwawine dingang u naga

1Bou e'e nikawua su l᷊angi pia barang simbau ko makal᷊aherang dang takoae sihinge. Singkatau kowawine ko nupakeu matangutiti kere pakeange, kararisi su wul᷊ang. Su timboe pia simbau makota ko nariadi bou wituing mapul᷊o dua. 2Kowawine e'e pia kal᷊uwaenge dang watu'u seng temponge mahinding, kuteu i sie nukumiha naturu.

3 # Dan. 7:7 Bou e'e nikawua lai pia barang su l᷊angi ko makalaherang. Pia simbau naga mahamu ko labo kahingang ko pia timboe pitu dang sasungenge mapul᷊o. Apang timboe pia makotange simbau. 4#Dan. 8:10Dingang u tol᷊e'e i sie namol᷊eng simbageang tatilu bou kaul᷊i u wituing su l᷊angi dang namahung i sire sarang wawo u dunia. Naga e'e kararisi su tingo ngu tau kowawine ko seng mahinding e'e dingang u pandung mamelohi ana e'e boko i sie ipahinding. 5#Mzm. 2:9; Yes. 66:7Bou e'e tau kowawine e'e nahinding singkatau ana koese ko sarung mamarenta kaul᷊i u bangsa dingang u tiking uase. Kateho ana e'e nipal᷊aho bou kowawine e'e, bou e'e niwawa sarang koa u Mawu Ruata dang sarang saruang u kararatuang e. 6Kuteu tau kowawine e'e nutumal᷊ang sarang tanah ko l᷊inggi, sarang tampa ko seng nisadia-Ngu Mawu Ruata si sie. Su tampa e'e i sie sarung talungang sihiwu dua hasu nungu pul᷊o su l᷊oung e l᷊iwuenge.

7 # Dan. 10:13,21, 12:1; Yud. 9 Bou e'e su sorga nakoa seke. I Mikhael dingang u manga mal᷊aikati nuseke nundoka naga e'e. Dang naga e'e lai nisumbal᷊ang u manga mal᷊aikate mundoka si Mikhael. 8Kuteho naga e'e nikawata. I sie dang manga mal᷊aikati e ta nipakawala matana sau su sorga. 9#Kej. 3:1; Luk. 10:18Naga ko l᷊abo e'e nirume sarang l᷊ikure! Ko i sie katoang maghurang arenge setang arako Roh ko Dal᷊ai, ko nul᷊eo kaul᷊i u dunia. I sie nirume sarang dunia dingang u patiku mal᷊aikate.

10 # Ayb. 1:9-11; Za. 3:1 Bou e'e ia nakaringihi tingihi ko mauha su sorga nangul᷊i, “Seng i'i temponge Mawu Ruata manal᷊amati umat-E! Orasi i'i Mawu Ruata mul᷊ahe u kawasang-E kere Ratu! Orasi i'i Ratu Mananal᷊amati ko nidiandi e'e lai nul᷊ahe u kawasang-E! Watu u ko mangantang manga ana u simbau, i kite su saruang u Mawu Ruata l᷊ou dingang u huwi seng nipasuwang bou sorga. 11Manga ana u simbau i kite namata si sie dingang u daha ngu Ahusu u Domba e'e, dang dingang u habari nuhino bou Mawu Ruata ko nihabari sire. I sire sadia manarakang u badang i sire sarang mate. 12Watu e'e hinonge sorga l᷊au u kaul᷊i u ko natana su l᷊al᷊unge, mahul᷊uasi! Kateho sil᷊aka dunia l᷊au u l᷊auri, watu u setang seng l᷊imintu si kumu dingang u bawal᷊uang ko l᷊abo kahingang, watu u i sie matitong temponge kate singkodo l᷊ai.”

13Su tempo ngu naga e'e natitong himoneu i sie seng nirume sarang dunia, i sie nanita nanahusu kowawine ko seng nahinding u ana koese e'e. 14#Dan. 7:25, 12:7Arawe kowawine e'e nionggolang u tatila u burung kamba ko l᷊abo darua, tadeau i sie tumila sarang tampae su tana ko l᷊inggi, suapa i sie sarung paliharang l᷊iwuenge tilu taung stenga, nal᷊iwiri bou pananahusu ngu naga. 15Kuteu naga e'e nanopau ake bou mohonge maul᷊i kahingang su saruang u kowawine e'e, tadeau panandang si sie. 16Kateho dunia nusumbal᷊a kowawine e'e; dunia namuka mohonge dang nangul᷊u ake ko nusumuwang bou moho ngu naga e'e. 17Naga e'e nuwawal᷊uang kahingang su tau kowawine e'e, hakiu i sie natamai nangal᷊o su hintou ko wal᷊inge bou tau ko wawine e'e, e'e kaul᷊i u taumata ko tutuhu kaul᷊i u parenta-Ngu Mawu Ruata, dang ko munggile u kasaksiang u hal᷊i I Yesus l᷊au u kawasang-E. 18Bou e'e naga e'e nurumarisi#12:18: Bou e'e naga e'e nurumarisi: pirambau wohe horo: Bou e'e ia nurumarisi (putuhung ayeti 10). suapeng.

Currently Selected:

KAL᷊AL᷊AHE 12: LAISXN

Highlight

Copy