MARKUS 3

Taumata l᷊ima nge ko pepa simbuka

(Mat. 12:9-14; Luk. 6:6-11)

1I Yesus sau nusul᷊e sarang wal᷊e pukakal᷊iomanengang. Su se'e pia singkatau ko l᷊ima nge ko pepa simbuka. 2Su se'e pia manga taumata ko mo mundea sal᷊ang I Yesus, tadeau botonge mangalaki I Sie. Inau i sire mangkate kaputuhunge si Sie, minsang I Sie mupakaul᷊e ngu taumata sul᷊ou Sabati. 3I Yesus nangul᷊i su taumata l᷊ima nge ko pepa simbuka e'e, “Maite rarisi su si'i, su saruang” 4Bou e'e I Sie nukina su manga taumata ko ene su se'e, “Tumuhu agama, ko apawe hinonge koateng i kite su l᷊ou Sabati? Mukoa mapia arako mukoa ko dal᷊ai? Mangambang taumata arako mamate?”

I sire mangkate kitang narumasi. 5I Yesus nuwawal᷊uang katuhunge tamai namai susindihang-E, arawe I Sie mang l᷊ai masusa naunge, ual᷊ingu i sire tumaniu makitihi. Bou e'e I Sie nangul᷊i su tau e'e, “Ul᷊uhi ko l᷊imangu.” Tau e'e nangul᷊uhi l᷊ima nge, dang l᷊ima nge e'e turusi naul᷊e. 6Kuteu manga tau Farisi e'e nanintang u wal᷊e pukakal᷊iomanengang e'e, bou e'e dingang turusi nughaghighili diangang u pirang katau taumata ngi Herodes, tadeau mamate si Yesus.

Taumata maul᷊i suwiwihu rano

7I Yesus tamai nusumoho dingang u manga tumatuhu-E, sarang Rano Galilea. Kuteu napene taumata bou Galilea natamai nutumuhu si Yesus. Maul᷊i l᷊ai ko nusumongo bou Yudea, 8bou Yerusalem, bou wanua Idumea, dingang bou wanua simbuka ngu raki u Yordan, l᷊aubo u kaul᷊i u soa su Tirus dingang u Sidon. I sire kaul᷊ie nusumongo sarang koa I Yesus, watu u i sire nakaringihi hal᷊ie seng nikoa-E. 9#Mrk. 4:1; Luk. 5:1-3Taumata kere e kaul᷊ie, hakiu I Yesus nuparenta manga tumatuhu-E panadia sakaeng gunang-E, kumbahang sarang I Sie masise kere u manga taumata e'e. 10I Sie nupakaul᷊e ngu taumata kere'e kaul᷊ie, hakiu manga taumata masaki nusasise manandighi tadeau mumpilei si Sie. 11L᷊au manga taumata ko nikasukangu roh ko dal᷊ai, sintinia makawua si Sie, mangkate dingang nusuba susaruang-E l᷊au nukumiha, “I Kau ko Ahusu u Mawu Ruata!”

12Arawe I Yesus nul᷊arang singapang botonge su kaul᷊i u roh ko dal᷊ai e'e mupakatitong i sai I Sie.

I Yesus namile tumatuhu-E mapul᷊o dua

(Mat. 10:1-4; Luk. 6:12-16)

13Bou e'e I Yesus nusumaka sarang wul᷊ure simbau, l᷊au nukumui manga taumata ko i kao-E. Manga taumata e'e kaul᷊ie nusumongo. 14Bou e'e I Sie namile bou tal᷊oara i sire mapul᷊o dua su kataunge. I Sie nangul᷊i, “Ia namile si kumu, tadeau i kumu puhundingang u Ia, tadeau i kumu Daku i roi pamombeng habari mapia bou Mawu Ruata, 15dang i kumu sarung makarea kawasa panguseri manga roh ko dal᷊ai.”

16I'i e areng i sire mapulo dua e'e: I Simon (ko nisighong-E l᷊ai i Petrus), 17i Yakobus l᷊au ana u simbau e i Yohanes, manga ana i Zebedeus (i sire i'i nisighong-E Boanerges mangal᷊enge “Anau l᷊ul᷊u”), 18i Andreas, i Filipus, i Bartolomeus, i Matius, i Tomas, i Yakobus ana i Alfeus, i Tadeus, i Simon si Patriot, 19l᷊au i Yudas Iskariot ko nusingking I Yesus.

I Yesus l᷊au i Be'elzebul

(Mat. 12:22-32; Luk. 11:14-23, 12:10)

20Bou e'e I Yesus napul᷊e sarang wal᷊e, kute u taumata maul᷊i sau nusumongo nukomol᷊i, hakiu I Yesus l᷊au manga tumatuhu-E ta nakakang. 21Manga taumata nangul᷊i, “I Sie seng kodong!” Dang suapangu ghe-E nakaringihi hal᷊i e'e, i sire tamai tadeau mangal᷊a si Sie.

22 # Mat. 9:34, 10:25 Manga meteru agama ko nusumongo bou Yerusalem nangul᷊i. “I Sie nikasukangu Be'elzebul! Tumbonangu roh ko dal᷊ai. Nangonggo kawasa si Sie guna ngu manguseri roh ko dal᷊ai.”

23Kuteu I Yesus nukumui taumata maul᷊i e'e l᷊au nuwukengu pirambau papinintu si sire. “Tamakoa roh ko dal᷊ai manguseri roh ko dal᷊ai,” angkung I Yesus. 24“Boko simbau negara mapahia pirang kamonang ko kapurarokae, negara e'e tawe matahang mal᷊iwue. 25Dang boko su l᷊al᷊ung u wal᷊e simbau takoa purarame l᷊au pusinggetang mangkate kapurarendehe pusinggetang e'e sarung mutal᷊ei. 26Boko su kararatuang u setang pia putatal᷊ei l᷊au purararendehi, kararatuang e'e ta maumuri dang seng mal᷊ahe mang sarung mailang.

27Takoae ko sarang manga singkatau makasu su l᷊al᷊ung u wal᷊e ngu singkatau ko matoghasi dang mamal᷊aho rarotong e boko i sie ta ihapusi horo taumata ko matoghasi e'e. Bou e'e mmbuhue we i sie botonge makapamal᷊aho rarotonge.

28Katitongte! Boko taumata mukoa dosa l᷊au mudidato ngu l᷊ahinakang,#3:28: mangul᷊i l᷊ahinakang: arako mangul᷊i l᷊ahinakang su saruang u Mawu Ruata. i sie botonge ampungang. 29#Luk. 12:10Arawe boko i sie muhinakang Roh u Mawu Ruata, i sie seng ta makahombang ampunge. Ual᷊ingu l᷊ahinakang e'e ko dosa takoae panginsuenge.” ( 30I Yesus nudidato kere'e, watu u pia taumata ko nudidato I Yesus nikasukang u roh ko dal᷊ai.)

I Mama-Ngi Yesus l᷊au manga ghe-E

(Mat. 12:46-50; Luk. 8:19-21)

31Bou e'e i mama-Ngi Yesus l᷊au manga ghe-E nusumongo. I sire nangampal᷊i sul᷊ikure l᷊au nundoi taumata pukui si Yesus. 32Tempo e'e maul᷊i taumata kakaiang su sindihang I Yesus. I sire nangul᷊i si Sie, “Tuang i mama-Ngi Tuang dingang u manga ghe I Tuang ene sul᷊ikure. I sire ko mundea si Tuang.”

33I Yesus nusumimbahi, “Ko isai mama-Ku? Isai manga ghe-Ku?” 34Bou e'e I Sie nutuhung su manga taumata ko kakangiang su sindihange dingang u nangul᷊i, “Ko i'i i mama l᷊au manga ghe-Ku! 35Taumata ko mukoa kao u Mawu Ruata, ko sie e'e ghe-Ku ko ese, ghe-Ku ko kowawine, l᷊au i mama-Ku.”

Currently Selected:

MARKUS 3: LAISXN

Highlight

Copy