MARKUS 2

I Yesus nupakaul᷊e ngu taumata ko kesohi

(Mat. 9:1-8; Luk. 5:17-26)

1Su kapira l᷊ou nge bou e'e I Yesus nusul᷊e sarang Kapernaum kute seng nawombeng habar I Sie ko seng ene su wal᷊e. 2Bou e'e taumata napene nusumongo. I sire nul᷊ahumbung pai se'e sarang seng ta koae l᷊oahe. Su moho ngu tukari napeneu taumata. Bou e'e I Yesus nangul᷊i u habari bou Mawu Ruata si sire. 3Su tempo ngi Sie mmborong kadidato nge, pia i sire pa kaputatimbange singkatau ko kesohi sarang ko I Yesus. 4Kateho ual᷊ingu kaul᷊i u taumata, i sire ta makasandighi sarang sundihang-E. I nau i sire nul᷊ekesi atu u wal᷊e su saruang I Yesus. Bou e'e taumata ko kesohi e'e niul᷊uhi sire dingang u tupihi. 5Suapang I Yesus nakawua pangangimang i sire kere'e kal᷊aboe, I Sie nudidato su taumata ko kesohi e'e, “Ana-Ku, apang dosa ngu seng niampungang.”

6I sire pira meteru agama ko kakangiang su se'e nanita nukina su l᷊al᷊ung u naung, 7“Taumata i'i wahani kahingang mudidato kere'e I Sie nuhinakang Mawu Ruata. I sai makaampung dosa, su l᷊ikuru Mawu Ruata sisane?”

8Su tempo e'e l᷊ai I Yesus seng matitong naung i sire. Bou e'e I Sie nangul᷊i, “Nakura we i kumu nukina kere'e su l᷊al᷊ung u naung i kumu? 9Sude'e malowokang: mudidato ngu, ‘Dosa ngu seng niampungang,’ arako mudidato ngu, ‘Wangungte, hengke e wawila u dang ral᷊engte?’ 10Arawe orasi i'i Ia sarung mupakal᷊ahe si kumu himoneu su wawou dunia i'i Ahusu Taumata pia kawasa makaampung dosa.” Bou e'e I Yesus nangul᷊i su taumata ko kesohi e'e, 11“Wangungte, hengke e tupihi u l᷊u kapule e!”

12I sie dingang nuwangung dang masahawu nangal᷊a tupihie bou e'e nusumuwang khitungang i sire kaul᷊ie. Manga taumata e'e naherang bou e'e nundalo Mawu Ruata. Angkung i sire, “Borong ta paghisa i kite nakawua hal᷊i ko kiri i!”

I Yesus nukumui si Lewi

(Mat. 9:9-13; Luk. 5:27-32)

13I Yesus sau nusul᷊e sarang apeng u Rano Galilea. Maul᷊i taumata nusumongo sarang koa-E, l᷊au I Sie nanintiro si sire. 14Su tempo I Yesus karal᷊enge su se'e, I Sie nakawua tau mananuntu balasteng arenge i Lewi ana i Alfeus, ko kakangiang su kantori u Balasteng. I Yesus nangul᷊i si sie, “Tuhue si Sia.” i Lewi nurumarisi dingang u nutumuhu si Yesus.

15Su tempo-Ngi Yesus mmborong kakange su wal᷊e ngi Lewi,#2:15: su wal᷊e ngi Lewi: arako su wal᷊e-Nge (e'e ko wal᷊e-Ngi Yesus) maul᷊i taumata mananuntu balasteng l᷊au manga taumata ko wawuang kadal᷊aikange su tampa e'e nukumang singkahindo dingang I Yesus l᷊au manga tumatuhu-E. Watu u seng maul᷊i bou taloara i sire nutumuhu si Yesus. 16I sire manga pirang katau meteri u agama bou taumata ngu Farisi nakawua si Yesus kakange dingang u manga mananuntu balasteng l᷊au manga taumata ko wawuang kadal᷊aikange e'e. Inau i sire nukina su manga tumatuhu I Yesus, “Nakurawe meteri kumu nukumang dingang u manga taumata mananuntu balasteng l᷊au manga taumata ko dalal᷊ai e'e?”

17I Yesus nakaringihi kakina i sire e'e, I Sie nusumimbahi, “Taumata matoghasi ta mundea dokter, kitang u apang ko masaki. Ia nusumongo wal᷊inge tadeau mundea taumata ko makitika badange ko mapia, kitang manga taumata ko itika taumata ko dal᷊ai.”

Hal᷊i u puasa

(Mat. 9:14-17; Luk. 5:33-39)

18Pia sikatempo manga tumatuhu i Yohanes Mananahani dingang u manga tau Farisi kapupuasa nge. Bou e'e pia taumata nusumongo sarang koa I Yesus l᷊au nukina, “Nakurawe tumatuhu i Yohanes Mananahani dingang u tumatuhu tau Farisi kapupuasa nge, arawe manga tumatuhu i Tuang ta?”

19I Yesus nusumimbahi, “Su saliwang u kawing, apa manga sake su tampa e'e ta kumang? Boko pardegong mborong ene dingang i sire tantu i sire mang kumang. 20L᷊au sarung pia temponge pardegong e'e al᷊akeng boi sire, su tempo e'e mmbuhue i sire ta kumang.

21Takoae taumata ko manampeli l᷊aku ko tuwei dingang u heka ko wuhu simpoto. Watu u heka tatampeli e'e mang kumoho dang makagehe l᷊aku e'e, hakiu kasuenge mal᷊abo gehe'e. 22Kere e l᷊ai takoae taumata ko manuang anggori ko wuhu su tampa ko tuwei. Ntihang anggori kowuhu e'e sarung makawuka tampa ko tuwei e'e. Panginsuenge kaul᷊i e mawoso. Anggori ko wuhu mambeng l᷊ai i taho su tampa ko wuhu!”

Kakinau l᷊ou ngu Sabati

(Mat. 12:1-8; Luk. 6:1-5)

23 # Ul. 23:25 Su l᷊ou ngu Sabati, tempo-Ngi Yesus nusumahe su awuhu gandung simpalang, manga tumatuhu-E nanita nanipo gandung. 24Bou e'e manga tau Farisi nangul᷊i si Yesus, “Nakurawe manga tumatuhu-U nul᷊umawang atorang u agama ngi kite, l᷊au u nukoa apang ko nil᷊arang su l᷊ou ngu Sabati?”

25-26 # 1Sam. 21:1-6 #Im. 24:9I Yesus nusumimbahi, “Apa i kumu mborong ta nubasa apang ko nikoa i Daud, su tempo ngi Abyatar kapukoa e hal᷊i e kere imam ko l᷊abo. Su tempo ngi Daud l᷊au u manga taumata nge nahutung, l᷊au takoae kang, i sie nusumu sarang Wal᷊e-Ngu Mawu, l᷊au nukumang boroti ko l᷊inau bou nisumba su Mawu Ruata. Boroti e'e l᷊ai nionggo e su manga taumata nge. Sumbal᷊i tumuhu agama ngi kite, kitang u manga imam botonge kumang boroti e'e.”

27Bou e'e I Yesus sau nangul᷊i, “L᷊ou Sabati nikoa guna ngu taumata, wl᷊ingewe taumata guna ngu l᷊ou ngu Sabati. 28Inau, Ahusu Taumata makawasa, kere e l᷊ai su l᷊ou ngu Sabati.”

Currently Selected:

MARKUS 2: LAISXN

Highlight

Copy