MARKUS 4
4
Papinintu singkatau mananawuhi
(Mat. 13:1-9; Luk. 8:4-8)
1 #
Luk. 5:1-3
I Yesus nusau nanintiro su apeng u Rano Galilea. Maul᷊i kahingang taumata nuhumbung si Sie. Ual᷊ingu e'e I Sie natamai nukumangiang su l᷊al᷊ung u sakaeng singgisa ko kawawal᷊ango, dang taumata maul᷊i e'e kararisi su wiwihu rano. 2Mmbuhue I Yesus nanintiro ngu hal᷊i maul᷊i si sire su dingang u nupake papinintu. Ko kiri i e I Sie nanintiro si sire.
3“Pundaringihiko! Pia singkatau manganganseri natarai nanawuhi sasuang. 4Su tempo ngi sie kapanansere, pia sasuang nanawo sural᷊eng. Bou e'e nusumongo burung nukumang sasuang e'e sarang nasue. 5Pia l᷊ai ko nanawo su tana ko mawatu tanange manipi. Sasuang e'e maehong nutumuwo maneng tana nge manipi, 6Arawe suapang matangu titi natei apang tuwoe e'e nal᷊obe bou e'e nahango dang nate watu'u hamue ta tumanie mal᷊al᷊ung. 7Pia l᷊ai sasuang ko nanawo sutal᷊oara u ghal᷊umue ko makasusu. Ghal᷊umue ko makasusu e'e nutumuwo dang nangumpisi apang tuwoe e'e haki u tanuwua. 8Kateho pia l᷊ai sasuang ko nanawo su tana ko matawa. Sasuang e'e nutumuwo, bou e'e nal᷊abo dingang nuwua, pia ko tilung pul᷊o, pia ko nungu pul᷊o, dang pia ko mahasu su sul᷊enge.”
9Su apang bou nuwuke ngu papinintu e'e I Yesus nangul᷊i, “I kumu ko pia tul᷊i, pundaringihi!”
Nakura I Yesus nupake u papinintu
(Mat. 13:10-17; Luk. 8:9-10)
10Su tempo-Ngi Yesus sisane nge, manga taumata ko seng nakaringihi tatintiro-Nge nusumongo si Sie singkahindo dingang i sire mapul᷊odua tumatuhu-E. I sire mundo si Sie tadeau mupakal᷊ahe mangal᷊engu papinintu e'e. 11Kuteu I Yesus nungul᷊i si sire, “I kumu seng ninggilenangu l᷊aonggo tadeau makahingang rahasia hal᷊iu kirapa Mawu Ruata mamarenta. Arawe manga taumata ngu l᷊ikure nitintirong dingang u papinintu, 12#Yes. 6:9-10tadeau
‘I sire sarung turusi mutuhung pakapia-pia
kateho wugha ngu apang ko mariadi,
i sire sarung turusi mundaringihi
kateho ta makahingang,
i'i mariadi tadeau i sire kumbahang makawua l᷊au makahingang
dang tadeau kumbahang sumongo su Mawu Ruata
dang Mawu Ruata mangampung si sire.’ ”
I Yesus nupakal᷊ahe papinintu singkatau mananawuhi
(Mat. 13:18-23; Luk. 8:11-15)
13Bou e'e I Yesus nangul᷊i si sire, “Boko i kumu ta makahingang papinintu e'e, kirapawe i kumu makahingang manga papintintu ko wal᷊inge? 14Mananawuhi e'e ko taumata mul᷊ahabaru habari bou Mawu Ruata. 15Sasuang ko nanawo su l᷊al᷊eng, isul᷊ung su manga taumata ko mundaringihi habari kirapa Mawu Ruata mamarenta. Suapang nakaringihi, setang nusumongo mangal᷊a apang ko seng nisawuhi su l᷊al᷊ungu naung i sire. 16Sasuang ko nanawo su tampa ko mawatu musul᷊ung u manga taumata ko nundaringihi habari e'e, dang turusi nanarima dingang u karal᷊uasu naung. 17Kateho habari e'e ta nuhamu su l᷊al᷊ung u naung i sire, hakiu ta natahang mal᷊iwue. Kere'e i sire nakapundang susange arako papahang ual᷊ingu habari e'e i sire turusi nusunial᷊i. 18Sasuang ko nanawo su tal᷊oara u ghal᷊umu ko makasusu e'e isul᷊ung su manga taumata ko nakaringihi habari e'e, 19Kateho gumagha ngu puwawiahi i sire l᷊au mo muwiahi sanang. Kao u watangeng mul᷊al᷊ahaghi nasu su naung i sire. Ual᷊ingu e'e habari bou Mawu Ruata nahumping su l᷊al᷊ung u naung i sire, hakiu ta nuwua. 20L᷊au sasuang ko nanawo su tana ko matawa e'e isul᷊ung su manga taumata ko nundaringihi habari e'e dang nanarima, i sire nuwua maul᷊i pia ko tilumpulo, pia ko nungupul᷊o, dang pia ko mahasu su sul᷊enge wuange.”
Sol᷊o ko nitakau bunsari
(Luk. 8:16-18)
21 #
Mat. 5:15; Luk. 11:33 Tuhue I Yesus sau nangul᷊i, “Apa seng pia taumata ko mbuae nundiko sol᷊o mmbuhue nitakau bunsari arako namilo sul᷊unga ngu ral᷊okang? Apa i sie tanamilo sol᷊o e'e su tampa pamilonange? 22#Mat. 10:26; Luk. 12:2Takoae ko kawawuni ko ta sarung i kawua, l᷊au takoae ko ipuwawurung ko ta sarung masongkahi. 23Ualingu e'e boko pia tul᷊i, pundaringihi!”
24 #
Mat. 7:2; Luk. 6:38 Bou e'e I Yesus nangul᷊i l᷊ai, “Putuhung ko pakapia apang ko nikaringihi i kumu i'i ukurang ko i pangukuri i kumu su taumata kowal᷊inge mang sarung l᷊ai i pangukuru Mawu Ruata si kumu dang mmborong lebe maul᷊i l᷊ai. 25#Mat. 13:12, 25:29; Luk. 19:26Watu u su taumata ko seng pia sarung sau onggol᷊ang lebe maul᷊i l᷊ai, arawe su taumata ko takoae, singkodo ko mborong pia si sie e'e sarung al᷊akeng l᷊ai.”
Papinintu ngu sasuang ko nutumuwo
26I Yesus sau l᷊ai nanurusi ridato-Nge, “Boko Mawu Ruata seng mamarenta kere Ratu, kakakoa e pinintung kere singkatau mananawuhi sasuang su l᷊al᷊ung u anseri. 27Huwi i sie matiki, l᷊ou i sie nuwangung. Dang su tempo e'e sasuang e'e seng katuwonge turusi dingang u kal᷊al᷊abo e. Arawe kirapa sasuang e'e tumuwo dingang u mal᷊abo, tau e'e wugha. 28Tana e'e sisane mupasuwangu wuange; kahorokang e pongol᷊e, tuhue wul᷊ihe, mmbuhue we wuange. 29#Yl. 3:13Dang boko gandung e'e seng nasasa tau e nanita namoto watu u seng temponge manipo.”
Papinintu sasuang sawi
(Mat. 13:31-32,34; Luk. 13:18-19)
30“Boko Mawu Ruata seng mamarenta i kasul᷊ung dingang u apa?” I Yesus sau l᷊ai nukina. “Apa sul᷊unge ko i kaal᷊a i kite guna ngu mupakal᷊ahe e'e? 31Boko Mawu Ruata seng mamarenta, kakakoae musul᷊ung u papinintu i'i. Kere watu ngu sawi#4:31: sawi: Sawi i'i sasuang ko botonge tumuwo range e patehang botonge manga tilu meteri. simbau nial᷊a tau singkatau bou e'e nisuang su tana. Watu ngu sawi e'e ko sasuang kadiokang e su dunia. 32Kateho boko seng nutumuwo, i sie makoa kal᷊abokang e su tal᷊oara u manga apang sasuang. Lelange kaul᷊ie matubung hakiu manga burung susongo dang musal᷊ehi su naue.”
33Kere'e I Yesus manga papinintu maul᷊i i panintiro taumata. Sarang i sire makahingang. 34I Yesus sintinia mang mangal᷊a papinintu boko I Sie manintiro manga taumata e'e. Boko kitang sisane nge, dingang u manga tumatuhu-E, I Sie mupakal᷊ahe kaul᷊ie'e si sire.
I Yesus nupakal᷊enehu anging mauha
(Mat. 8:23-27; Luk. 8:22-25)
35Su singkawawul᷊aeng e'e l᷊ai, I Yesus nudidato su manga tumatuhu-E, “Maite i kite musenggo sarang su simbukangu rano.”
36I Yesus naawi su sakaeng, dang manga tumatuhu-E nanintang u taumata maul᷊i su wiwihu rano, bou e'e i sire naawi su sakaeng. Su se'e pia l᷊ai sakaeng ko wal᷊inge. Bou e'e I Yesus dingang u manga tumatuhu-E nuwua. 37Ta nal᷊iwue bou e'e nutumiu anging mauha, l᷊ua nanita namungkusi sakaeng dang ake nusumu sarang l᷊al᷊unge hakiu sakaeng seng napene u l᷊imasi. 38I Yesus katikie mal᷊uma su peto nge nangul᷊eleng sulalengang. Manga tumatuhu-E namuko si Sie. Sire nangul᷊i, “Tuang, I Tuang ta mupandung, i kite seng masilaka?”
39I Yesus nuwangung, bou e'e nuheang anging e'e dang nangul᷊i su rano, “Karumasi, kal᷊enehi!” Anging nangiro dang rano dingang u nutingkal᷊enehi. 40Bou e'e I Yesus nungul᷊i su manga tumatuhu-E, “Apa makataku si kumu? Nakurawe i kumu ta mangimang si Sia?”
41Kuteu i sire mmbuhue nataku dang kapudidato nge i sire l᷊au i sire, “Ko i sai inau taumata i'i, hakiu anging dingang u l᷊ua tumuhu si Sie.”
Currently Selected:
MARKUS 4: LAISXN
Highlight
Share
Copy
Want to have your highlights saved across all your devices? Sign up or sign in
2014 Indonesian Bible Society (Lembaga Alkitab Indonesia)
