MATIUS 20

Papinintu mul᷊ahal᷊i su awuhu anggori

1“Boko Mawu Ruata mamarenta, kakakoae musul᷊ungu papinintu i'i: Pia singkatau tataghuangu awuhi anggori nusumuwang mborong mal᷊ukari mundea taumata puhal᷊i su awuhu anggori. 2Suapang i sie nukumire mamaehi si sire doi sal᷊aka simbau silou, i sie nuparenta si sire puhal᷊i su awuhu anggore. 3Pukul᷊i sio mal᷊ukari, tataghuangu awuhi e'e sau nurumal᷊eng, dang nakawua pirang katau taumata kapul᷊ambaehange su pasari. 4Bou e'e i sie nangul᷊i si sire, ‘Dako i kumu tarai puhal᷊i su awuhu anggori ku. I kumu sarung makarea wawaehe ko mutatahino.’ 5I sire natarai. Pukul᷊i mapul᷊o dua kal᷊ihae dingang pukul᷊i tatilu wawul᷊aeng, tataghuangu awuhi e'e, nusau nusumuwang nukoa hal᷊i ko musul᷊ung. 6Patehang manga pukul᷊i l᷊ima wawul᷊aeng, i sie nusau nusumuwang dang nakawua mborong pia ko kapul᷊ambaehange. I sie nukina si sire, ‘Nakurawe i kumu kararisi pusil᷊ou matiwatu si'i takoae hambaki kumu?’ 7I sire nusumimbahi ‘Takoae ko mupuhal᷊i si kami.’ ‘Boko kere'e, angkungu tataghuangu awuhi e'e, dakoe i kumu tarai puhal᷊i su awuhu anggoriku.’

8 # Im. 19:13; Ul. 24:15 Nawawul᷊aeng, tataghuangu awuhi anggori e'e, nangul᷊i su mandiri e, ‘Kuieko apang mul᷊ahal᷊i dang waehe doingi sire simbau-simbau, manita bou ko nusumu nuhal᷊i kasamuriange sarang ko kahorokange.’ 9Bou e'e nasongo apang mul᷊ahal᷊i ko nuhal᷊i nanita bou pukul᷊i l᷊ima wawul᷊aeng. Pusingkatau i sire nanarima doi sal᷊aka tahapusimbau. 10Tuhue nasongo l᷊ai mul᷊ahal᷊i ko niwaehang mborong mal᷊ukari. Su naungi sire i sire makatarima doi lebe. Kateho i sire l᷊ai mang kitang nionggol᷊ang doi sal᷊aka e'e tahapusimbau. 11Su tempo ngu nanarima doi e'e i sire nahinu su tataghuangu awuhi e'e: 12‘Manga mul᷊ahal᷊i ko nusumongo samuri kitang nakapuhal᷊i singkaorasi. Arawe i kami nuhal᷊i silou matiwatu wati-wati su titi, kateho i Tuang namaehi si sire musul᷊ung si kami!’ 13Tataghuangu awuhi e'e nusumimbahi su singkatau boi sire, ‘Anu, ia tanusal᷊a si kau. Wal᷊inge we i kau seng nukumire manarima doi sal᷊aka simbau wawaehu muhal᷊i silou? 14Al᷊ate l᷊uangu, dang kapul᷊e'e. Ia sisaneku mo mangonggo su taumata ko nu sumu nuhal᷊i samuri e'e wawaehe musul᷊ung ko kere daku nionggo si kumu. 15Apa ia tawotonge mukoa kaoku sisaneku su rarotongku? Arako i kumu mananoi, ual᷊ingu ia mal᷊ondo?’ ”

16 # Mat. 19:30; Mrk. 10:31; Luk. 13:30 Bou e'e I Yesus sau nangul᷊i, “Kere'e l᷊ai taumata ko samuri sarung makoa ko kahorokange, dang ko kahorokange sarung makoa kasamuriange.”

I Yesus su katilunge nuhabaru papateng-E

(Mrk. 10:32-34; Luk. 18:31-34)

17Su tempo-Ngi Yesus karal᷊enge sarang Yerusalem, su ral᷊eng i Sie nukumui tumatuhu-E i sire mapul᷊o dua pukomol᷊i sire ha. Bou e'e i Sie nangul᷊i si sire, 18“Raringihe! Orasi i'i i kite makoa sarang Yerusalem. Pai se'e Ahusu Taumata sarung i sarakang su tumbonangu manga imam dang manga meteru agama. Bou e'e I Sie sarung manarima hukumang papate, 19bou e'e mbuhue i sarakang su umati ko wughangu Mawu Ruata. I sire sarung muhinakang si Sie, mamahang si Sie dang munggantong I Sie. Kaiso l᷊ou katilunge, i Sie sarung sau ipuwangung.”

Ndo i mama ngi Yakobus sirerua ngi Yohanes

(Mrk. 10:35-45)

20Bou e'e kawing i Zebedeus nusumongo dingang u manga anae sarang koa I Yesus. Su saruang I Yesus i sie nusuba ual᷊ingu pia ko ipundokange.

21I Yesus nukina, “Apa kao u?”

I mama ngi sire rua e'e nusumimbahi, “Ia mo tadeau ana ku rarua i'i makaiang singkatau su kuihi dang singkatau l᷊ai su kuanengi Tuang boko i Tuang mamarenta kere Ratu.”

22“I kumu wugha apang ko nipundokang i kumu.” I Yesus nangul᷊i si sire. “I kumu makatanggung manginung bou panganginungangu singsara ko mambeng Daku inungang?”

“Makatanggung,” sasimbahi sire.

23I Yesus nangul᷊i, “Tingari i kumu sarung manginung bou panganginungang-Ku. Kateho su hal᷊i i sai ko sarung kumangiang su kuihi dingang su kuaneng-Ku, e'e wal᷊inge we haki-Ku manantu. Apang tampa e'e seng su taumata ko tilahu nitantu I Yamang-Ku.”

24Su tempo i sire mapul᷊o tumatuhu-E ko wal᷊inge nakaringihi hal᷊i e'e, i sire nuwawal᷊uang si sire rua tamahuari e'e. 25#Luk. 22:25-26Ual᷊ingu e'e, I Yesus nukumui si sire kaul᷊ie mbuhue nangul᷊i, “I kumu matitong manga tumbonang u wanua ko wugha ngu Mawu Ruata, mul᷊inda ana u wanuange. Dang apang ko l᷊al᷊abo su tal᷊oara i sire sarung manira si sire. 26#Mat. 23:11; Mrk. 9:35; Luk. 22:26Arawe i kumu tawewotonge kere'e. Taumata ko mo mutingkakoa ko l᷊abo su tal᷊oara i kumu, mambeng makoa paparentangu. 27Dang taumata ko mo mutingkakoa kahimotongange su tal᷊oara i kumu, mambeng makoa l᷊angu. 28Musul᷊ung u l᷊ai Ahusu Taumata e'e; i Sie nusumongo wal᷊inge we tadeau makital᷊ung, kateho tadeau mutal᷊ung, dang manarakang u wadang-E guna ngu mul᷊iwiru taumata ko maul᷊i.”

I Yesus nupakaul᷊engu tau ko wuta sire rua

(Mrk. 10:46-52; Luk. 18:35-43)

29Su tempo ngi sire nanintang u Yerikho, maul᷊i taumata nutumuhu si Yesus. 30Pia i sire rua tau ko wuta kakangiang su wiwihu ral᷊eng. Suapang i sire rua nakaringihi I Yesus kasahenge, i sire rua nukumiha, “Ahusi Daud, kindaghite ko i kami!”

31Taumata maul᷊i su se'e nuwawal᷊uang si sire dingang u nangoro si sire pakarumasi. Kateho i sire rua kasaunge nukimiha, “Tuang, Ahusi Daud, kindaghite ko i kami!”

32Bou e'e I Yesus nangoro dang nukumui si sire, “Apa ko i kao i rua hino ngu Daku i koa si kumu rua?” kakina I Yesus.

33I sire rua nusumimbahi, “Tuang i kami mo makawua!”

34I Yesus nukumindaghi si sire rua, bou e'e namilo l᷊ima-Nge su mata ngi sire rua. Singkatempo e'e l᷊ai i sire rua dingang u nakawua. Bou e'e i sire nutumuhu si Yesus.

Currently Selected:

MATIUS 20: LAISXN

Highlight

Copy