MATIUS 21

I Yesus nusumu su Yerusalem dingang u kawawantughi

(Mrk. 11:1-11; Luk. 19:28-40; Yoh. 12:12-19)

1Su tempo kasasandighu Yerusalem, i sire nuratingu Betfage su Wul᷊uru Zaitun. Su se'e I Yesus nundoi tumatuhu-E sire rua paral᷊eng horo. 2“Dako e sarang kampong su tingo pai,” tatanata-Ngi Yesus si sire rua. “I rua turusi makawua pia keledai simbau mal᷊aiki dingang u anae. Wukate keledai e'e dang wawa mai. 3Boko pia ko makina, ul᷊i su tau e'e, ‘Mawu#21:3: Mawu: arako tataghuange. mupake,’ tau e'e dingang mamala keledai e'e pakiwawa.”

4Hal᷊i e'e mang sengkere'e, tadeau mariadi apang ko niul᷊i u nabi keri i.

5 # Za. 9:9 “Puhabari ko su Sion,

Ratu ngu seng kasongo nge sarang koa i kumu.

I Sie mangkate ko masana naunge dang simake su keledai

simbau,

ana u keledai ko paranggang.”

6Bou e'e tumatuhu-E rarua e'e natamai nukoa kere ko nitanata-Ngi Yesus si sire rua. 7I sire rua numbawa keledai e'e dingang u anae. Bou e'e i sire rua nangumpahi pal᷊ukangu keledai e'e dingang u kakingkaeng i sire rua. Bou e'e I Yesus nusumake. 8Maul᷊i taumata su se'e namila kakingkaengi sire su ral᷊eng, kere'e l᷊ai i sire kowal᷊inge namoto manga lelang u kau dang niantehi su tal᷊oara u ral᷊eng. 9#Mzm. 118:26Taumata maul᷊i ko karal᷊enge su horo dingang u su likur I Yesus nukumiha u, “Kaumuri Ahusi Daud! Al᷊amate I Sie ko nusumongo su areng u Mawu! Pundalo ko Mawu Ruata ko karangetange!”

10Bou e'e, su tempo-Ngi Yesus nusumu su Yerusalem, kaul᷊i u soa nughigho. “Ii ko i sai?” kakina u taumata singkasoang e'e.

11“I Sie Nabi Yesus, bou Nasaret su Galilea,” sasimbahu taumata maul᷊i ko katuhue si Yesus.

I Yesus nusumu su Wal᷊e-Ngu Mawu

(Mrk. 11:15-19; Luk. 19:45-48; Yoh. 2:13-22)

12Bou e'e I Yesus nusumu su Wal᷊e-Ngu Mawu, dang nanguseri kaul᷊i u taumata ko kapuwal᷊ue su se'e. I Sie nangal᷊intuing manga meda ngu mananukari doi, dingang u manga kakangianeng u muwawal᷊u paluma. 13#Yes. 56:7; Yer. 7:11Bou e'e i Sie nangul᷊i sumanga taumata e'e, “Su l᷊al᷊ungu Buki Susi kawawohe, Mawu nangul᷊i, ‘Wal᷊e-Ku sarung i sigho Wal᷊e tampa u pukakal᷊iomanengang.’ Kateho nikoa i kumu tampa u tahapuhampasi!”

14Manga taumata ko wuta l᷊au ko kesohi nusumongo si Yesus su Wal᷊e-Ngu Mawu, dang i Sie nupakaul᷊eng i sire. 15Arawe manga tumbonangu imam dingang u manga meteru agama nuwawal᷊uang nakawua manga hal᷊i ko makal᷊aherang nikoa I Yesus. Dang i sire nuwawal᷊uang l᷊ai nakaringihi manga rario nukumiha su Wal᷊e-Ngu Mawu, nangul᷊i, “Kaumuri Ahusi Daud!”

16 # Mzm. 8:3 I sire nangul᷊i si Yesus. “I Kau nakaringihi apang ko niul᷊i'i sire?”

“Iya, Ia nakaringihi,” sasimbahi I Yesus. “Apa i kumu mborong tanubasa sarang manga paghisa pia ayeti i'i su Buki Susi. Manga rario dingang u ana ko kasusu nge seng Daku nitintironang pusigho daralo ko nasuku?”

17Bou e'e I Yesus nanintangi sire, nusumuwang bou e'e nakoa sarang Betania dang natiki pai se'e.

I Yesus nangane kau ara

(Mrk. 11:12-14,20-24)

18Ndai mal᷊ou mal᷊uka-l᷊ukari, su tempo karal᷊enge mapul᷊e sarang soa, I Yesus nakapundang nahutung. 19I Sie nakawua pia kau ara singkau su wiwihu ral᷊eng. I Sie nusumandighi sarang pungu kau e'e, kuteu tanakarea wuange sarang manga simbau, kitang raunge si sane. I Yesus nangul᷊i su kau e'e, “I kau sarung ta muwua!” Kau e'e ringang nahango.

20Suapang manga tumatuhu I Yesus nakawua apa ko nariadi e'e, i sire naherang. “Kirapa nariadi sarang kau ara e'e turusi nahango?” kakina i sire.

21 # Mat. 17:20; 1Kor. 13:2 “Tingari” sasimbah I Yesus, “Boko i kumu mangimang kahingang, i kumu makakoa apa ko Daku nikoa su kau i'i. Dang wal᷊inge kitang e'e, kateho i kumu sarung makapuhabari su wul᷊ure i'i, kasapuae dang karume'e sarang l᷊auri; hal᷊i e'e mang mariadi. 22Apang l᷊ai ko i pundokang i kumu su l᷊al᷊ung u kal᷊iomaneng, mang sarung i katarima i kumu, asal᷊e i kumu mangimang.”

Kakina hal᷊i u haki I Yesus

(Mrk. 11:27-33; Luk. 20:1-8)

23Bou e'e I Yesus nusul᷊e sarang Wal᷊e-Ngu Mawu, nusumu dang nanintiro su se'e. Su tempong u I Sie kapanintironge, manga tumbonang u imam dingang u tumbonang u tau Yahudi nusumongo si Yesus dang nukina, “Apa dasare i Kau nukoa kaul᷊i tamai e'e? I sai nangonggo haki e'e si Kau?”

24I Yesus nusumimbahi, “Ia l᷊ai makina si kumu. Boko i kumu sumimbahi, Ia sarung mangul᷊i si kumu dingang u haki i sai Ia mukoa hal᷊i tamai e'e. 25I Yohanes nanahani dingang u haki i sai? Mawu Ruata arako taumata?”

Bou e'e manga tumbonang u imam dingang u tumbonang u tau Yahudi e'e nanita nughaghighili. “Boko i kite mangul᷊i, ‘Dingangu hakiu Mawu Ruata,’ i Sie mangul᷊i, ‘Boko kere'e apa sabapie i kumu tamangimang si Sie?’ 26Arawe boko i kite mangul᷊i, ‘Dingangu hakiu taumata’ i kite mataku su taumata maul᷊i, watu u sunaung i sire kaul᷊ie i Yohanes nae ko singkatau nabi.” 27Inau i sire nusumimbahi, “I kami wugha.”

Bou e'e I Yesus nangul᷊i si sire, “Boko kere'e, Ia l᷊ai tamangul᷊i si kumu dingang u haki i sai Ia nukoa kaul᷊ie hal᷊i i'i.”

Papinintu ana darua

28“Kirapa su sipirang u hal᷊i i'i?” Angkung I Yesus tuhue. “Pia singkatau i amang pia anae koese darua. Tau e'e natamai nakoa sarang koa u ana e ko iakang, dingang nangul᷊i, ‘Amang, taraiko silou i'i puhal᷊i su awuhu anggori.’ 29‘Ia mandiri,’ angkung u ana e'e. Kateho samuringe sipirange nuwal᷊u dang natarai nakoa sarang awuhi e'e. 30Bou e'e i amange e'e tamai nakoa sarang anae karuange nangul᷊i pandung ko musul᷊ung. ‘Kerete e wue, Pa,’ angkung u ana e karuange e'e. Kateho i sie ta natarai. 31Inau, bou tal᷊oara u ana darua e'e, sude'e ko nukoa kao i amange?”

“Ko i akang,” nisimbahu manga tumbonangu imam dang manga tumbonangu tau Yahudi e'e.

I Yesus nangul᷊i si sire, “Pangimangte: Mananuntu balasteng dingang u manga kowawine ko nawuang sarung makahoro si kumu mariadi umat u Mawu Ruata bo i kumu.#21:28-31: su l᷊al᷊ung u pirambau wohe horo pia pal᷊uhe kiri'i: 28 “Su orasi i'i kirapa tumuhu sipirang u hal᷊i i'i?” angkung I Yesus tuhue. “Pia singkatau iamang ko pia ana e koese darua, i sie nakoa sarang ana e ko kahimotongange dang nangul᷊i. ‘Amang tamai ko puhal᷊i su anseru anggori silou i'i.’ 29 Ana e'e nusumimbahi, ‘Ho, papa!’ Kateho i sie ta natamai. 30 Bou e'e iamang e'e nakoa sarang ana e ko karuange dang nangul᷊i hal᷊i ko musul᷊ung. Anae nusumimbahi, ‘ia mandi,’ kateho bou e'e sipirange nuwal᷊u bou e'e mang natamai. 31 bou tal᷊oara u ana darua e'e, sude e ko nukoa kao i papange?” “Ko karuange,” nisimbahu manga tumbonang u imam l᷊au manga pangaha u tau Yahudi e'e. 32#Luk. 3:12, 7:29-30Watu u i Yohanes Mananahani nusumongo dingang nupakal᷊ahe si kumu kakakoa u muwiahi su kao u Mawu, kateho i kumu mandiri mangimang tintironge; arawe mananuntu balasteng dingang u manga kowawine ko nawuang mangimang si sie. Kateho maneng ikumu seng nakawua kaul᷊i e'e, i kumu l᷊ai mang ta namal᷊u sipirang i kumu l᷊au ta mangimang su Mawu.”

Papinintu mul᷊ahal᷊i awuhu anggori

(Mrk. 12:1-12; Luk. 20:9-19)

33 # Yes. 5:1-2 “Raringihe ko papinintu simbau i'i l᷊ai,” angkung I Yesus. “Pia singkatau tataghuang tana namuka awuhu anggori. Nipagarenge nal᷊iku, dingang nukoa l᷊ohangu pamamuhukang anggori, bou e'e nupararisi u menara pudadiagateng. Nasue e'e nisewange su mul᷊ahal᷊i, mbuhue i sie nakoa sarang wanua ko wal᷊inge. 34Suapang seng nurating tempo ngu manipo wua ngu anggori, tataghuange nundoi su manga paparentange sarang koa u mul᷊ahal᷊i awuhi e'e, panarima bahageange. 35Arawe mul᷊ahal᷊i awuhi e'e naname manga paparentang u tataghuang tana e'e: Singkatau nidudu, ko wal᷊inge nipate, dang ko wal᷊inge l᷊ai nipal᷊o u watu. 36Tataghuang u tana e'e sau nundoi paparentang kowal᷊inge, nangilebe maul᷊i bou ko horo. Kateho i sire e'e mang l᷊ai nikoa kere'e. 37Panginsuenge tataghuang u tana e'e nundoi ana e sisane. ‘Nal᷊ahe anaku mang adateng,’ su sipirange. 38Kateho suapang mul᷊ahal᷊i awuhi e'e nakawua ana u tataghuang tana e'e, i sire nudidato simbau dingang u ko wal᷊inge, ‘Seng i sie i'i muhinggo rarotong. Maite pateng i kite, tadeau i kite makarea pusakae!’ 39Kuteu ana e'e nisame, nirume sarang l᷊ikure, mbuhue nipate.”

40I Yesus nukina, “Ho, boko tataghuang u awuhi anggori e'e musul᷊e, apa sarung koatenge su mul᷊ahal᷊i e'e?”

41I sire nusumimbahi, “Seng nal᷊ahe i sie mamate manga taumata ko dal᷊ai e'e, mbuhue awuhu anggori e'e i sewange su taumata kowal᷊inge ko mo mamahia bageang bou l᷊uang u tana e'e si sie su temponge.”

42 # Mzm. 118:22-23 Kute I Yesus nangul᷊i si sire, “Mborong ta manga paghisa i kumu nubasa ko mawawohe su Buki Susi?

‘Watu ko ta napake su manga base u wal᷊e

seng nakoa watu Kahimotongange.

Ii hal᷊i ko nikoa u Mawu;

wal᷊inge gampang kasidadae!’ ”

43“Inau tinaungete,” angkungi Yesus, “saul᷊i u haki kere umat u Mawu Ruata sarung al᷊akeng bo i kumu, bou e'e inggile su simbau kawanua ko sarung muparal᷊eng u parentang u Mawu Ruata. 44[Taumata ko manawo su watu e'e, sarung malalul᷊e; dang taumata ko kaumpisangu watu e'e sarung makoa awu.]”

45Su tempo manga tumbonangu imam dang manga tau Farisi nakaringihi manga papinintung I Yesus e'e i sire natitong himoneu I Yesus mul᷊uhabaru hal᷊i i sire. 46Kuteu i sire kapundeae ral᷊eng maname si Sie. Kateho i sire mataku su taumata maul᷊i, watu u sunaung u kaul᷊i u taumata maul᷊i e'e I Yesus ko singkatau nabi.

Currently Selected:

MATIUS 21: LAISXN

Highlight

Copy