WUKE NGU MANGA RASULI 2

Sasongo-Ngu Roh u Mawu Ruata

1 # Im. 23:15-21; Ul. 16:9-11 Suapang seng nurating l᷊ou ngu Pentakosta, kaul᷊iu taumata ko mangimang nukomol᷊i su tampa simbau. 2Singkahuwi pia tingihi nikaringihi bou l᷊angi kere tatiu u anging ko mauha. Wal᷊e tampa pukakomol᷊ang i sire napeneu tingihi e'e. 3Bou e'e i sire nakawua manga lila musul᷊ung u henang u putung nurumaki sarang manga tampa dang nurumoro si sire singkatau-singkatau. 4I sire kaul᷊ie nikawasa ngu Roh u Mawu Ruata, dang nanita nudidato su l᷊al᷊ung u haghi ngu bahasa kowal᷊inge. I sire nudidato tumuhu manga ko nionggo u Roh e'e si sire pakiul᷊i.

5Su tempo e'e napene tau Yahudi, bou manga tampa su kaul᷊iu dunia natana su Yerusalem. I sire e'e ko manga taumata marararingihi su Mawu Ruata. 6Su tempo nikaringihi tingihi e'e maul᷊i kahingang taumata nusumongo nuhumbung. I sire kaul᷊i e nahuwi nakaringihi manga taumata mangimang e'e kapudidatonge su l᷊al᷊ung u wisara ngi sire singkatau-singkatau. 7Dingang u kal᷊aherang dang tinanoe i sire nangul᷊i, “Manga taumata ko kapudidatonge i'i kaul᷊ie ko tau Galilea, aru? 8Kirapa hal᷊i i'i nariadi sarang i kite nakaringihi si sire kapudidatonge su wisara ngi kite singkatau-singkatau? 9I kite manga taumata bou Partia, Media, Elam; bou Mesopotamia, Yudea dang Kapadokia; bou Pontus dang Asia, 10bou Frigia dang Pamfilia, bou Mesir dang bou manga tampa bageang u Libia ko masandighu Kirene; pia bou tal᷊oarai kite ko nasongo bou Roma, 11pia manga tau Yahudi dang pia l᷊ai manga taumata bou bangsa kowal᷊inge ko seng nasowa su agama Yahudi; pia l᷊ai ko nusumongo bou Kreta dingang u bou Arab. I kite kaul᷊ie nakaringihi i sire kapudidatonge su l᷊al᷊ung u wisara ngi kite singkatau-singkatau bou kaul᷊iu hal᷊i ko makal᷊aherang ko nikou Mawu Ruata!” 12Dingang u kal᷊aherang dang tinanoe i sire kaul᷊ie mangkate kapukakinae simbau dingang u kowal᷊inge, “Ko apa mangal᷊enge i'i?”

13Kateho pia l᷊ai manga taumata ko kapuhinakange. I sire nangul᷊i, “Ah, manga taumata e'e ko kitang nabukang!”

Nasi i Petrus

14Bou e'e i Petrus nurumarisi dingang i sire mapul᷊unsau Rasuli ko wal᷊inge, dang nudidato su taumata maul᷊i e'e. Dingang u tingihi ko mauha i sie nangul᷊i, “Manga ana u simbau, manga tau Yahudi dang kaul᷊ie ko natana su Yerusalem! Daringihe ko paka pia-pia, watu'u hal᷊i i'i hinonge daku i pakal᷊ahe si kumu. 15Manga taumata i'i wal᷊ingewe ko bukang, kere ko nitika i kumu; watu'u i'i mbuhue pukul᷊i sio mal᷊ukari. 16Arawe hal᷊i i'i ko seng mbuae nihabaru Mawu Ruata bo i Nabi Yoël:

17 # Yl. 2:28-32 Mawu Ruata nangul᷊i, su tempong panginsuenge

Ia sarung mangonggo Roh-Ku su kaul᷊iu taumata.

Manga ana i kumu kol᷊aese l᷊au manga ana i kumu kowawine sarung muhabari si kumu kaul᷊iu hal᷊i ko Daku i habari si sire.

Manga taumata ngu ko makakuda sarung makawua kaul᷊iu hal᷊i ko Daku i andaghi si sire.

Manga taumata ngu ko maghaghurang sarung mipi hal᷊i u ipi ko Daku i onggo si sire.

18Su manga l᷊ang-Ku l᷊ai-mbaeng koese arako kowawine –,

sarung Daku onggol᷊ang u Roh-Ku su l᷊ou-l᷊ou e'e.

I sire sarung muhabari kaul᷊iu hal᷊i ko Daku i habari si sire.

19Ia sarung mukoa manga ko makal᷊aherang rasi su l᷊angi,

dang manga hal᷊i ko makaral᷊ingu su wawa si'i su dunia;

sarung pia daha dingang u putung, hiwu dingang u tipu.

20Matangutiti sarung makoa ko marundung,

Wul᷊ang makoa ko mahamu kere daha

Su horo L᷊ou ngu Mawu, l᷊ou ko l᷊abo dingang u mawantughi e'e sumongo.

21Su tempo e'e, taumata ko mukui Mawu

sarung ipakasal᷊amati.

22Manga anau simbau tau Israel! Daringihete manga ko Daku iul᷊i i'i: I Yesus tau Nasaret e'e seng ninggilenang u Mawu Ruata hal᷊i guna ngi kumu. E'e mal᷊ahe kahingang su manga ko makal᷊aherang dingang u manga hal᷊i ko makaral᷊ingu ko nikou Mawu Ruata su tal᷊oara i kumu bou pul᷊ahal᷊i I Yesus e'e. Ana u simbau sisane seng matitong kaul᷊i e'e. 23#Mat. 27:35; Mrk. 15:24; Luk. 23:33; Yoh. 19:18Mutuhu kiroung-E sisane, Mawu Ruata mamutusi tadeau manarakang I Yesus si kumu. Dang saritau I Sie nisarakang, i kumu namate si Sie dang namalangu manga taumata ko dal᷊ai nunggantong si Sie. 24#Mat. 28:5-6; Mrk. 16:6; Luk. 24:5Kateho Mawu Ruata sau nupuwiah I Sie bou tal᷊oara u manga taumata ko nate. I Sie nil᷊u'u papate, kateho Mawu Ruata namilo I Sie, watu'u tawe mariadi boko papate turusi mangawasa si Sie. 25#Mzm. 16:8-11I Daud seng mbuae nangul᷊i hal᷊i I Yesus i'i,

‘Ia nakawua Mawu sintinia su saruangku;

I Sie mahundingang u ia, tadeau ia tamaghiou manga apa.

26E'e sabapi e naungku mal᷊ua-l᷊uasi,

mohongku mul᷊uhabaru daralo

dang badangku i'i sarung mangampal᷊i

dingang u matatapi su l᷊al᷊ung u kubul᷊i

27Watu'u I Kau ta mupakawalangu jiwaku matintang su l᷊al᷊ung u dunia ngu taumata ko nate.

I Kau ta mupakawala l᷊ang-U ko masatia e'e mahene dingang u masue.

28I Kau seng nanibo si sia l᷊al᷊eng sarang puwawiahi kahingang.

Ral᷊uasiku tai kahabari watu'u I Kau ene mahundingang u ia.’

29Manga ana u simbau, pakawalako ia mudidato paka l᷊ahe-l᷊ahe hal᷊i i Daud, iupung i kite e'e. I sie seng nate dang seng nikubul᷊i l᷊ai; kubul᷊e mborong ene su tal᷊oara i kite sarang orasi i'i. 30#Mzm. 132:11; 2Sam. 7:12-13Mawu Ruata seng nudiandi si Daud, dingang u tewa, ware singkatau bou hintounge sarung i hengke u Mawu Ruata makoa Ratu. Ual᷊ingu i Daud matitong diandi e'e dang ual᷊ingu i sie l᷊ai ko singkatau nabi, 31i sie l᷊ai matitong manga ko sarung i koa u Mawu Ruata. Inau i sie seng nunubueti ware Ratu mananal᷊amati ko nidiandi ngu Mawu Ruata, sarung sau muwiahi bou papate. I Daud nangul᷊i,

‘I Sie taipakawala matintang su l᷊al᷊ung u dunia ngu manga taumata ko nate;

badang-E sarung ta mahene dang ta masue.’

32I Yesus i'i ko sau nipuwiahu Mawu Ruata bou papate. I kami kaul᷊ie seng nakawua sisane hal᷊i e'e. 33I Sie nihengke su kakangianeng ko marange dang ninggilenang u Mawu Ruata kawasa, mbuhue nanarima Roh u Mawu Ruata ko seng nidiandingi I Yamang. Dang ko nikaringihi dingang u nikawua ngi kumu su orasi i'i ko Roh e'e nionggo-E si kami. 34#Mzm. 110:1I Daud sisane ta napua sarang sorga, arawe i Daud nangul᷊i,

‘Mawu nangul᷊i su Mawuku:

35Kangiangte su kuaneng-Ku,#2:35: Kangiangte … kuaneng-Ku: Tumuhu adati tau Yahudi, ko nionggol᷊ang adati dang kawasa mukumangiang su simbuka kuaneng.

sarang manga roka-U Daku i pakawata si Kau!’

36E'e sabapie kaul᷊iu tau Israel mambeng matitong kahingang himoneu I Yesus ko nighantong i kumu e'e, I Yesus e'e l᷊ai ko seng nikoa u Mawu Ruata nakoa Mawu dang Ratu Mananal᷊amati!”

37Suapangu manga taumata e'e nakaringihi hal᷊i e'e, naung i sire maghawang kahingang. Bou e'e i sire nakina si Petrus dingang u su manga rasuli kowal᷊inge, “Manga anau simbau, apa mambeng koateng i kami?”

38I Petrus nusumimbahi, “Putobate bou manga dosa ngi kumu. Dang i kumu pu singkatau-singkatau pakisahani su areng I Yesus Kristus, tadeau kaul᷊iu dosa ngi kumu iampungang. Manga ana u simbau sarung manarima l᷊aonggo Roh Mawu Ruata bou Mawu Ruata. 39Watu'u ko nidiandi-Ngu Mawu Ruata e'e ko guna ngi kumu dang manga hintou ngi kumu dingang u manga taumata ko su manga tampa marau – manga taumata ko nikui ngu Mawu Ruata Mawu ngi kite guna ngu pasongo si Sie.”

40Kere'e i Petrus nupakal᷊ahe si sire. Dang dingang u didato maul᷊i kowal᷊inge i sie l᷊ai nundo si sire tadeau i sire mul᷊iwiru badang i sire bou umati ko dal᷊ai i'i ko sarung i hukung u Mawu Ruata. 41Maul᷊i taumata nangimang manga ko niul᷊i i Petrus, bou e'e i sire nisahani. Inau kaul᷊iu taumata ko nangimang su l᷊ou e'e sau natamba tiluhiwu su kataunge. 42Dingang u mangaking i sire turusi mangundung bou manga rasuli dang hanesi mukomol᷊i singkahindo. I sire nukumang singkahindo dang mukal᷊iomaneng singkahindo.

Puwawiahu manga taumata ko mangimang

43Maul᷊i kahingang ko makal᷊aherang nikoa u manga rasuli e'e hakiu kaul᷊i u taumata naherang dang nataku. 44#Wuk. 4:32-35Manga taumata ko mangimang e'e kaul᷊ie turusi nasimbau dang manga ko koa i sire, i pake i sire singkahindo. 45I sire nuwal᷊u manga apal᷊iwu dingang u rarotongi sire, bou e'e doinge nipahia i sire kaul᷊ie tumuhu manga ko ipake u singkatau-singkatau. 46L᷊ou-l᷊ou i sire turusi mukomol᷊i su Wal᷊e-Ngu Mawu; kumang singkahindo, dingang u karal᷊uasi dang kasasana u naung suapang wal᷊e ngi sire. 47I sire turusi mundalo Mawu Ruata dang i kao u manga taumata. L᷊ou-l᷊ou rekenang i sire mang katatambange watu'u Mawu nunggil᷊e si sire manga taumata ko ipakasal᷊amati.

Currently Selected:

WUKE NGU MANGA RASULI 2: LAISXN

Highlight

Copy