WUKE NGU MANGA RASULI 3

Tau ko kesohi nipakaul᷊e

1Pia su silou su orasi mukal᷊iomaneng pukul᷊i tatilu wawul᷊aeng, i Petrus sire rua ngi Yohanes nakoa sarang wal᷊e ngu Mawu, e'e su tempo guna ngu mukal᷊iomaneng. 2Pai se'e su tukari sasukang ko nisigho “Tukari Masidada”, pia singkatau koese ko kesohi mborong bou gandongang. Sintinia l᷊ou tau e'e i wawa i sire sarang e'e guna ngu makikindaghi su manga taumata ko sumu su wal᷊e ngu Mawu. 3Su tempo ngu tau e'e nakawua si Petrus l᷊au i Yohanes kasue sarang wal᷊e ngu Mawu, i sie nundo makikindaghi u apa-apa bo i sire rua. 4I sire rua nutumaeri si sie, bou e'e i Petrus nangul᷊i, “Pumbawua si kami!” 5Bou e'e tau e'e nutumaeri si sire rua dang muharapi sarung makarea manga apa bo i sire rua. 6Kateho i Petrus nuhabari si sie, “Ia takoa-koae doi. Kateho apa ko pia si sia, e'e sarung daku i onggo si kau: Dingang u kawasa-Ngi Yesus Kristus tau Nasaret e'e, l᷊al᷊engte!” 7Bou e'e i Petrus nuhinggo l᷊ima kuanengu tau kesohi e'e dang nutul᷊ung si sie pararisi. L᷊aeru tau e'e dingang u kal᷊ento e turusi natoghasi. 8Bou e'e i sie nul᷊uminso nurumarisi, dang nanita nurumal᷊eng tarai namai. Bou e'e i sie nusumu su Wal᷊e-Ngu Mawu dingang i Petrus sire rua ngi Yohanes, mangkate kal᷊al᷊enge dang kal᷊insoe dang kapundalonge Mawu Ruata. 9Kaul᷊iu taumata katuhunge si sie kal᷊al᷊enge dang kapundalonge Mawu Ruata. 10Bou e'e i sire natitong himoneu i sie mundando ko biasange kakangiang su “Tukari Masidada” su Wal᷊e-Ngu Mawu. I sire naherang kahingang dang nal᷊al᷊ingu nakawua manga ko nariadi si sie.

Nasi i Petrus su l᷊al᷊ung u Wal᷊e-Ngu Mawu

11Tau e'e mangkate katuhue si Petrus dingang i Yohanes. Dang su tempo ngi sire tilu nasongo su poresi ko nisigho “Poresi Salomo”, kaul᷊iu taumata nusumongo nahumbung si sire ual᷊ingu nal᷊al᷊ingu. 12Su tempo ngi Petrus nakawua manga taumata e'e, i sie nangul᷊i si sire, “Ei i kumu manga tau Israel, nakura manga ana u simbau naherang u hal᷊i i'i? Nakurawe i kumu mangkate katuhunge si kami? Apa su naung i kumu tau i'i nakal᷊al᷊eng watu'u pia kawasa si kami, arako ual᷊ingu i kami matuhu su Mawu Ruata? 13#Kel. 3:15Mawu Ruata ko i sumba ngi Abraham, i Ishak, i Yakub, Mawu Ruata ngi upung i kite, Mawu Ruata e'e seng nupakawantughi L᷊ang-E, I Yesus. I Yesus e'e ko nisarakang i kumu su mangangawasa, dang nirokateng i kumu su tingo ngi Pilatus, su tempo ngi Pilatus mo mamilo si sie. 14#Mat. 27:15-23; Mrk. 15:6-14; Luk. 23:13-23; Yoh. 19:12-15I sie ko susi dang mapia, kateho i kumu nundoka si Sie dang nundo tadeau i Pilatus mamilo singkatau ko tahapate guna ngi kumu. 15Manga ana u simbau seng namate si Sie, sumbal᷊i ko I Sie pungu putatumbiahu kaul᷊iu taumata. Dang Mawu Ruata seng nupuwiah I Sie sau bou papate. I kami i'i nakawua mal᷊ahe hal᷊i e'e. 16Manga ana u simbau seng nakawua dang nakapuksaksi ngu apa ko nariadi su tau ko kesohi i'i. I sie seng natoghasi dang naul᷊e ual᷊ingu i sie mangimang si Yesus dingang u kawasa-Nge. Ual᷊ingu nangimang si Yesus hakiu tau i'i seng naul᷊e su tingo ngu manga ana u simbau.

17Manga anau simbau! Orasi i'i ia matitong himoneu manga ko nikoa i kumu dingang u manga pangaha i kumu si Yesus, e'e ko nikoa i kumu watu'u i kumu wugha manga ko kahikoa i kumu. 18Dang ual᷊ingu e'e naganapi l᷊ai manga ko seng nihabaru Mawu Ruata ndahuwite bou manga nabi-Nge, himoneu Ratu Mananal᷊amati ko nidiandi e'e mambeng mutatahangu singsara. 19Watu'u e'e manga ana u simbau, putobate bou kaul᷊iu dosa ngi kumu dang pusul᷊ete su Mawu Ruata, tadeau I Sie mangumu manga dosa ngi kumu. 20Mawu sarung sumongo si kumu dang i kumu sarung makapundang karal᷊oahi sunaung. Dang Mawu sarung mundoi I Yesus pasongo si kumu, watu'u I Sie seng nitantu u Mawu Ruata makoa Ratu Mananal᷊amati guna ngi kumu. 21I Sie mambeng matana su sorga sarang Mawu Ruata mukoa kaul᷊ie ko wuhu musul᷊ungu ko nihabaru Mawu Ruata bou manga nabi-Nge ndahuwite. 22#Ul. 18:15, 18I Musa mbuae nuhabari, ‘Mawu Ruata ngu sarung mundoi sarang koa i kumu singkatau nabi bou bangsa ngu sisane, musul᷊ungu I Sie nundoi u ia.#3:22: musul᷊ungu I Sie nundoi u ia: arako kere ia. I kumu mambeng pundaringihi kaul᷊iu ko nihabaru nabi e'e si kumu. 23#Ul. 18:19Taumata ko ta mangindakang manga ko nihabaru nabi e'e, tau e'e sarung ipakaghea bou umatu Mawu Ruata dang ipakawinasa.’ 24Manga nabi ko mbuae nuhabari hengetang u Mawu Ruata, nanita bo i nabi Samuel l᷊au manga nabi kowal᷊inge ko nasongo samuringe, kaul᷊ie nuhabaru kakakoau orasi i'i. 25#Kej. 22:18Manga diandi ngu Mawu Ruata ko nihabaru manga nabi e'e kaul᷊ie mang guna ngi kumu manga ana u simbau. Su l᷊al᷊ung u diandi ko nikoa u Mawu Ruata dingang i upung i kumu, Mawu Ruata nangul᷊i si Abraham kiri'i, ‘Bou hintou ngu Ia sarung mangal᷊amati kaul᷊iu bangsa su dunia.’ Diandi e'e ko guna ngi kumu l᷊ai. 26E'e sabapie Mawu Ruata namile L᷊ang-E, bou e'e nangoro si Sie pasongo horo sarang koa i kumu, tadeau I Sie mangal᷊amati si kumu. I Sie mangal᷊amati e'e tadeau i kumu kaul᷊ie manga ana u simbau mutobati bou kakanoa puwawiahu ko dal᷊ai.”

Currently Selected:

WUKE NGU MANGA RASULI 3: LAISXN

Highlight

Copy