ZAKHARIA 6
6
Papasilong mạanung karentan sekẹ ěpạ
1Iạ e nakahombang papasilo wal᷊ine e. Sěnsul᷊e ini takụ kinasilo karetan sekẹ ěpạ u waụ siměbang bọu wěllạu wul᷊udu witụ darua e. 2#Pěl. 6:4, 5 Manga kareta ene e niwol᷊engu apang kawal᷊o pinẹ̌paparẹ̌, humotong kawal᷊o mahamụ, karuane kawal᷊o mitung, 3#Pěl. 6:2 katěllune kawal᷊o mawira ringangu kaěpạ e kawal᷊o kambal᷊ọ. 4Iạ nakiwal᷊o su malạekatẹ̌ ene, ”Tuang, apa mangal᷊ene manga karetan sekẹ ini?”
5 #
Pěl. 7:1
I sie simimbang, ”I sire e nẹ̌buạ nẹ̌timona ěpạ u kawunakeng sarětạeng bọu nẹ̌těngong Mawu kasěllahu sarul᷊uang. 6Karetan sekẹ kụ niwol᷊engu kawal᷊o mitung nẹ̌timona sarang Babel su sěmběkan sawěnahẹ̌ e. Kawal᷊o mawira mẹ̌tẹ̌timona sarang sěmběkaʼm bahẹ dingangu kawal᷊o kụ kambal᷊ọ e mẹ̌tẹ̌timona wanua su sěmběkan timuhẹ̌.”
7Piạ e kawal᷊o nạung kambal᷊ọ ene siměbang, i sire kakělaěng mamben tawe makasabarẹ̌ mědeạu tamai měmarikěsa wanua. Malạekatẹ̌ ene něbera, ”Dakọe pěmarikěsa wanua!” Tangu wọu ene tamaị e i sire. 8Bọu ene malạekatẹ̌ ene nẹ̌kui si siạ, ”Kawal᷊o kụ nakoạ sarang Babelẹ̌ e ene seng nakaputị dal᷊angehu Mawu e.”
Tita waugu mapakaratun Yosua
9 Mawu e nẹ̌gěllịu tatanata ini e si siạ. 10AngkuěngʼE, ”Pěngal᷊ạko sasěmba kụ nionggọ i Heldai, Tobia ringangu i Yedaya, kụ kai taumata apam buhu kawawal᷊ị bọu pinaměmbangeng su Babelẹ̌ e. Lighạko wawa sasěmban sire ene sorong bal᷊eng Yosia anạ i Zepanya. 11Bọu wul᷊aeng dingangu sal᷊aka laonggọ i sire ene, pẹ̌koạko makotane sěmbaụ kụ takạko su těmbọ u Imang Mawantugẹ̌ i Yosua anạ i Yozadak. 12#Yer. 23:5, 33:15; Za. 3:8 Paul᷊ịko si sie, u Iạ e Mawu Kụ Limembong Kawasa e nẹ̌bera, ’Taumata kụ isẹ̌sěbạ si Anu Tumbal᷊e, sarung makaual᷊i su tampạ suapang i sie ene sene dingangu i sie sarung měmětị kapia Wal᷊em Mawu. 13Seng i sie e sarung měmangung Bal᷊e-Ku ringangu měnarimạ u kal᷊aadatẹ̌ kere sěngkatau ratu, ringangu i sie sarung mẹ̌parenta kawanuane. Sěngkatau imang sarung dumingang si sie ringangu i sire e sarung mẹ̌sěngkapěhal᷊ẹ̌ dingangu maghaghighilẹ̌.’ 14Makota ene niresọ su Wal᷊e-Ku waugu mẹ̌tahěndung si Heldai,#6:14: Tungkangu nạung sěmbua: Heldai; Ibrani: Helem. si Tobia, si Yedaya ringangu si Yosia.#6:14: Tungkangu nạung sěmbua: Yosia; Ibrani: Hen. 15Taumata e sarung duměnta wọu tampạ kụ marau ringangu mẹ̌tul᷊ung měmangung Bal᷊e-Ku. Kereu bangunang ene e masueng koạ e, i sire sarung masingkạ u Iạ e Mawu Kụ Limembong Kawasa e seng něndingọ i kau e su anun sire. Kěbị ene e sarung mariadi kereu i sire e kahěnga-hěngang tụtuhụ manga tita-Ku e, Mawu Ruatan sire.”
Currently Selected:
ZAKHARIA 6: SXN
Highlight
Share
Copy
Want to have your highlights saved across all your devices? Sign up or sign in
