ZAKHARIA 5
5
Papasilong mạanung bukẹ̌ dul᷊ung kụ tụtěllạ
1Iạ saụewue měnẹ̌naung kapia, kụ ini e kinasiloku bukẹ̌ dul᷊ung sěmbaụ kụ timěllạ su winangaeng. 2Malạekatẹ̌ ene e nakiwal᷊o kai apa takụ kinasilo. Sasimbangku, ”Bukẹ̌ dul᷊ung sěmbaụ e timěllạ sarang binangaeng, nandụ e sio meterẹ̌ dingangu wěnahe ěpạ u meterẹ̌ sitenga.”
3Bọu e i sie nakiwal᷊o si siạ, ”Su bukẹ̌ dul᷊ung ene e kạbawohẹ laane waugu patikụ banua ini. Piạ su sěmbilang kạbawohẹ u apan tahatako e isěbang bọu wanua ini. Ringangu su sěmbilang bal᷊ine e lai kạbawohẹ u apan taumata kụ mẹ̌salu konti e mal᷊aing sarung isěbang. 4Mawu Kụ Limembong Kawasa e nẹ̌bera u laane ene sarung ipakatuhung su wal᷊eng apan tahatako ringangu su wal᷊eng apan taumata tahapẹ̌salu konti. Manga wal᷊e ene sarungbe tiniạ kahinoěngu laane ene sarang makoạ kate manga opehe.”
Papasilo mạanung bawine su ral᷊ungu hiang
5Malạekatẹ̌ ene saụ siměpụ dingangu nẹ̌bera, ”Kakělla! Piạ u l᷊ai riměnta!”
6”Apa ene?” kakiwal᷊oku.
Sasimbange, ”Hiang sěmbaụ. Ene e kai tatialaʼn dosang#5:6: Piram baụ tungkangu nạung: dosa; Ibrani: mata. kasěllahu wanua ini.”
7Hiang ene e piạ tatakạ e wọu timběha. Těntal᷊ang takụ tẹ̌tatinganeng, tatakạ e ene nal᷊ekesẹ̌ dingangu sěngkakakělla kawe su ral᷊ungu hiang ene maiang sěngkatau wawine.
8Malạekatẹ̌ ene nẹ̌bera, ”Bawine ini e mělẹ̌lahẹ u karal᷊akisẹ̌.” Bọu ene nisědạ e wawine ene kapia sarang dal᷊ungu hiang mase nitakạ e hiang ene. 9Ene iạ dimal᷊ingarạ e taraị mase nakasilọ e wawine ruang katau timěllạ sarang lantehẹ̌ku. I rẹ̌dua e piạ papanide matoghasẹ̌ kere papanidu wahoa. Hiang kanini e nial᷊ạ i rẹ̌dua mase niwawan dědua timěllạ.
10Iạ nakiwal᷊o su malạekatẹ̌ ene, ”Sarang apa i rẹ̌dua nẹ̌bawa hiang ene?”
11Sasimbange, ”Sarang Babel, paị sene i rẹ̌dua sarung měmangung pangkunang pananěmbaěnge. Kụ pangkunang ene e nasueng koạ e, hiang ene hědom pělokang sene mědeạu sěmbaěng.”
Currently Selected:
ZAKHARIA 5: SXN
Highlight
Share
Copy
Want to have your highlights saved across all your devices? Sign up or sign in
