ZAKHARIA 7
7
Mawu e něněgung puasa kụ tawẹ katul᷊ide
1Su tanggalẹ̌ ěpạ bul᷊ang u Kislew, kụ kai wul᷊ang kasione, su ral᷊ungu taung kaěpạ e pẹ̌paparentan Datu i Darius, Mawu e timanata lai si siạ.
2Tumanạ u Betel seng něndolohʼi Sarezer dingangi Regem-Melekh dingangu taumatan sire sarang Bal᷊eʼm Mawu Kụ Limembong Kawasa baugu mẹ̌dorong al᷊amatʼE. 3I sire mal᷊aing nirolohẹ̌ pinakiwal᷊o su manga imang dingangu manga nabi, kere ini, ”Bědangbe wotonge i kami dumal᷊umpasiangu kaghagholọ u Wal᷊eʼm Mawu ringangu mẹ̌puhědang apaʼm bul᷊ang kal᷊imane kere nạung seng kẹ̌koateng i kami ringangu taunge karěngụ e?”
4Seng ini e tatanatam Mawu kụ nahumpạ u anuku. 5AngkuěngʼE, ”Paul᷊ịko su patikụ tumanạ u wanua ini ringangu su manga imang, u pẹ̌papuhědang dingangu ral᷊umpasiang kụ kẹ̌koateng i sire e su wul᷊ang kal᷊imane ringangu kapitune karěngụ u pitum pul᷊o su taunge ini e wal᷊inewe laadatẹ̌ si Siạ. 6Kerene lai piạ i sire kimaěng dingangu něnginung, i sire e mẹ̌dẹ̌deạu mạpakạsaheng batangeng.”
7Seng ene e piněhengetangu Mawu wọu manga nabi su tempo nal᷊iu su tempong Yerusalem bědang pẹ̌tẹ̌tanakeng dingangu tumanạ e mal᷊unsemahẹ̌. Su tempo ene taumata e bal᷊inewe tumbạu mẹ̌tẹ̌tanạ su manga weọ e mạngělikụ soane kaiso su wahageang timuhẹ̌ dingangu su manga pentọ u wongkone su sěmběkaʼm bahẹ.
Sasukung nakakoạ aị u pamamembang
8 Mawu Kụ Limembong Kawasa e něngonggọu tatanata ini e si siạ, 9”Dingangu taunge nal᷊iu Takụ nionggotangu manga parenta ini e su manga umatẹ̌-Ku, ’I kamene harusẹ̌ pẹ̌těngkaadilẹ̌, matal᷊ěntụ, naunge mapia su sěndinganengu. 10Kumbahang měnědạ taumata wal᷊u, manga rariọ kasisi ěndusẹ̌, taumata raghị kụ něngindunụ nẹ̌tanạ sutal᷊oarang kamene, arau walạewe i sai su ral᷊ungu kasasusa. Dingangu kumbahang lai mẹ̌karaking hal᷊ẹ̌ dal᷊akị baugu sěndinganengu.’
11Kaiso umatẹ̌-Ku e makětị těmbọ e ringangu mambeng mạdiri rumararingihẹ̌; i sire mẹ̌něnsing tul᷊in sire e tadeạu tawe makaringihẹ̌. 12I sire e mẹ̌tẹ̌tungkětị u naung i sire e hakịu nakětị kere watu. Iạ nẹ̌pědu marasai ual᷊ingu i sire tawe tumuhụ kal᷊awọu těntiro kụ sen Takụ nionggọ si sire wọu manga nabi nạung kal᷊imona e. 13Iạ e tawe simimbahẹ̌ kakal᷊iomaneng i sire, ual᷊ingu i sire e mal᷊aing tawe rumararingihẹ̌ kereu Iạ e mẹ̌bisara. 14Mẹ̌sul᷊ungu rěllang maihạ, Iạ e něnapu si sire, hakịu i sire e nasihasa nẹ̌tanạ su manga wanua raghị. Ěntana matawa ini e seng narěmasẹ̌ tawẹ mẹ̌tatanạ e ringangu nahusụ.”
Currently Selected:
ZAKHARIA 7: SXN
Highlight
Share
Copy
Want to have your highlights saved across all your devices? Sign up or sign in
