MARKUS 1

Kotbang Yohanes Mananahani

(Mat. 3:1-12; Luk. 3:1-18; Yoh. 1:19-28)

1Ini e kai Injilẹ̌ mạanun Mawu Yesus Kristus, Ahusʼu Ruata e.#1:1: Su ral᷊ungu winohẹ nạung kal᷊imona tawẹ apa Ahusʼu Ruata e. 2#Mal. 3:1 Injilẹ̌ e nitětạ kerẹewe nịbawohẹ u Nabi Yesaya kere ini,

” ’Kai ini e rarolohang-Ku,’ angkuěngu Mawu Ruata;

’Iạ e něndolohʼi sie niapěngal᷊imona si Kau,

tadeạu i sie apẹ̌děndiahi raral᷊engangʼU.’

3 # Yes. 40:3 Piạ e tau mạmohang su wanua l᷊inggi,

’Riahiko ral᷊eng baugu Mawu;

teneko raral᷊engang apan dal᷊engange.’ ”

4Mẹ̌sul᷊ungkewen mạbawohẹ e kerene lai rarěntang Yohanes su wanua l᷊inggi. I sie měnẹ̌nahani taumata ringangu mẹ̌děndal᷊engken habarʼu Mawu Ruata e.#1:4: Kerene lai ... mẹ̌děndal᷊engken habarʼu Mawu Ruata e, su winohẹ u nạung kal᷊imona pira-pira: kerene i Yohanes siměpụ su kěhu l᷊inggi kụ něndal᷊engken habaru Mawu Ruata. ”I kamene harusẹ̌ pěmpẹ̌tobatẹ̌ bọu kal᷊awọu rosanu ringangu harusẹ̌ sahaniang, tadeạu Mawu Ruata e mẹ̌gěllịu ampung si kamene,” kerene angkuěng i Yohanes. 5Kěbị taumata wọu wanuang Yudea e ringangu soang Yerusalem nahuntamai němpẹ̌daringihẹ̌ si Yohanes. I sire němpangakung kal᷊awọu rosan sire, kụ i Yohanes něnahani si sire su Sal᷊ụ u Yordan.

6 # 2Rat. 1:8 I Yohanes měpẹ̌pakeangu pakeang bọu rukụ u onta. Papehẹ e wọu pisị, ringangu kinạe kal᷊imbotong dingangu kaěnge ghul᷊an katiupang. 7I sie kai mạul᷊ị u habarẹ̌ ini, ”Samurin iạ e sarung duměnta sěngkatau nangělembong kasěllahe wọu iạ e. Kal᷊ingung kumakurung měluka tal᷊ing sapatunʼE e, iạ e tawe wotonge. 8Iạ měnẹ̌nahani si kamene e kai ringangu akẹ arawe i Sie kụ sarung měnahani si kamene ringangu Rohkẹ̌ u Ruata.”

I Yohanes něnahani Mawu Yesus

(Mat. 3:13-17; Luk. 3:21-22)

9Su tempo ene tangu Mawu Yesus narěnta wọu Nazaret su wanuang Galilea, kụ i Yohanes něnahani si Sie niurung su Sal᷊ụ u Yordan. 10Sarạeng Mawu Yesus e nasěpụ bọu akẹ ene, i Sie nakasilo langị natope kụ Rohkẹ̌ u Ruata e natěntung kere manụ paluma kụ dimorọ si Sie. 11#Pěnd. 22:2; Mzm. 2:7; Yes. 42:1; Mat. 3:17, 12:18; Mrk. 9:7; Luk. 3:22 Bọu e kinaringihẹ̌ tingihʼu Mawu Ruata mělẹ̌hengetang, ”I Kau e kai Ahusẹ̌-Ku ikẹ̌kěndagẹ̌. I Kau e mětẹ̌tal᷊ahino su naung-Ku e.”

Mawu Yesus nisal᷊ukatengu Setang

(Mat. 4:1-11; Luk. 4:1-13)

12Bọu ene Rohkẹ̌ u Ruata apidʼu něngahạ Mawu Yesus sol᷊ong banua l᷊inggi. 13Ěpạ u pul᷊o su ěllone i Sie sene nisal᷊ukatengu setang. Manga binatang dul᷊u e mal᷊aing ene ringangkewen Sie sene e, kụ manga malaekatẹ̌ e měmpẹ̌tẹ̌tangkiang si Sie.

Mawu Yesus nẹ̌kui ěpạ u katau měnanomạ

(Mat. 4:12-22; Luk. 4:14-15, 5:1-11)

14Sarạeng i Yohanes nitahungkụ, Mawu Yesus e nakoạ sol᷊ong Galilea, kụ něhabarʼu Injilʼu Mawu Ruata e paịse. 15#Mat. 3:2 AngkuěngʼE, ”Kararatun Mawu Ruata e seng masandigẹ̌. Kụ pěmpẹ̌tobate i kamene wọu kal᷊awọu rosang kamene, kụ pangimangke su Injilʼu Ruata!”

16Ene, Mawu Yesus kạdal᷊enge su apengu Ranong Galilea e, i Sie nakasilo měnanoma duang katau, kụ i Simon dingangu tuarine i Andreas. I rẹ̌dua e kai kapẹ̌nẹ̌nomane su rano. 17Mawu Yesus něhengetang si rẹ̌dua, ”Pěmpẹ̌tol᷊eko si Siạ. Iạ e sarung maněntiro si kamene měnomạ taumata.” 18Ene i rẹ̌dua měngkatewe naněntangu somạ i rẹ̌dua e mase timol᷊e su Mawu Yesus.

19Mawu Yesus mang kạdal᷊enge, tangu i Sie saụewe nakasilo si rẹ̌dua tahatuari wal᷊ine, i Yakobus dẹ̌duang Yohanes, manga anạ i Zebedeus. I rẹ̌dua kinaẹ̌bakeng su ral᷊ungu sakaeng, kạpěnẹ̌naminge somạ i rẹ̌dua. 20Mawu Yesus apidʼu kimui si rẹ̌dua. Ku i rẹ̌dua e měngkatewe naněntang i amangi rẹ̌dua e su sakaeng, ringangkewen i sire mělahal᷊ẹ̌ bal᷊ine e. Bọu e i rẹ̌dua němpẹ̌tol᷊e e Mawu Yesus.

Tau nạung nisawelangu rohkẹ̌ dal᷊akisẹ̌

(Luk. 4:31-37)

21Mawu Yesus dingangu manga muritʼE nahumpạ su soang Kapernaum. Kụ su ěllon Sabatẹ̌ tuhụe, Mawu Yesus nasuẹ̌ su wal᷊em pẹ̌kakal᷊iomanengang kụ nanětạe naněntiro. 22#Mat. 7:28-29 Taumata kụ apan dụdaringihẹ̌ e mangkewen dụdal᷊inaụ u pananěntironʼE. U i Sie naněntiro e kai piạ pěhěngkinge, wal᷊inewe kere manga mananěntiro agama e.

23Su tempo ene piạ sěngkatau kinasuẹ̌kangu rohkẹ̌ dal᷊akị kụ simuẹ̌ su ral᷊ungu wal᷊eng pẹ̌kakal᷊iomanengang, kụ němansagẹ̌, 24”Ei Yesus tau Nazaret, kai pẹ̌kapuraěngu i kami e? I Kau e ruměnta waugʼu mapakawinasang kami e? Iạ e masingkạ i sai i Kau e: I Kau e kai rarolohang masusi wọu anun Duata!”

25”Karěmasẹ̌ko!” angkuěngu Mawu Yesus něhěkadẹ̌ rohkẹ̌ dal᷊akị ene, ”Sẹ̌bangke wọu tau ini!”

26Ene rohkẹ̌ dal᷊akị e měngkatewe něnggaghinggọ tau ene maihạ-ihạ, bọu e simẹ̌bang bọu ral᷊ungu tau ene kạbansage. 27Kěbị taumata e měngkatewe něngkaherang hakịu i sire němpẹ̌bera sěmbaụ su wal᷊ine, ”Hu, kai apạe ini? Piạewe těntiro wuhu! Makạl᷊ahěngking rẹ̌děndinganengu kawasa i Sie nanokol᷊ẹ̌ rohkẹ̌ dal᷊akisẹ̌ niapasẹ̌bang, kụ i sire měngkawe mararingihẹ̌ si Sie!”

28Tangu habarʼu Mawu Yesus e měngkatewe masahawụ nẹ̌kakeke su kaguwạu wanuang Galilea.

Mawu Yesus napakaul᷊en taumata l᷊awọ

(Mat. 8:14-17; Luk. 4:38-41)

29Mawu Yesus dingangu manga muritʼE naněntangu wal᷊em pẹ̌kakal᷊iomanengang ene, kụ nakoạ sol᷊ong bal᷊en Simon dẹ̌duang Andreas. I Yakobus dẹ̌duan Yohanes mal᷊aing natol᷊e ringangi sire. 30I ninangi Simon kinaratingang nilěhabe sural᷊okaěng. Kụ ene piạ e Mawu Yesus dingangu manga muritʼE simuẹ̌ su wal᷊e ene, Mawu Yesus e nihabareng u hal᷊ẹ̌ ene. 31Tangu Mawu Yesus tamai himaung si ninang i Simon kinaratingang, kụ nangumpaedẹ̌ l᷊imane apidʼu němangung si sie. Kutẹu l᷊ěhabe napiạ e, kụ i sie nanětạe nakapẹ̌siliwirẹ̌ si sire.

32Ene nawawěllọe, kụ matangělloe seng simědạe,#1:32: Matangěllo e seng simědạe: Ual᷊ingken sasědạ u matangěllo e tangu ěllon Sabatẹ̌ e seng nal᷊iu, hakịu tau Yahudi e seng botonge měhal᷊ẹ̌ kapia. i sire tangu němpangěntudẹ̌ kal᷊awọu taumata apan masakị dingangu nikasuẹ̌kangu rohkẹ̌ dal᷊akịe sol᷊ong anun Mawu Yesus. 33Kakẹ̌pal᷊ewen pěmamanuan soa ene e němpẹ̌tampungke su těngon bal᷊e ene. 34Mase Mawu Yesus napakapiạen taumata l᷊awọ apan piạ sakịe mědẹ̌dal᷊ahaghi e, kụ nanokol᷊ẹ̌ko lai rohkẹ̌ daral᷊akịe malawọ. I Sie tawe napakawalang rohkẹ̌ daral᷊akị e pěběbera, watụ u i sire masingkạu kai i sai i Sie.

Mawu Yesus něnasẹ̌ su Galilea

(Luk. 4:42-44)

35Sěngkariọěllone reng marěndung-děndung, Mawu Yesus nẹ̌bangung kụ limintụ naněntangu wal᷊e. I Sie nakoạ sol᷊ong tampạ marěmasẹ̌ su l᷊ikudʼu soa, kụ nẹ̌kal᷊iomaneng sene. 36Arawe i Simon dingangu manga hapịe natamai němpẹ̌deạ si Sie. 37Kụ sarạeng i sire nẹ̌sombang i Sie, i sire němpẹ̌berạe, angkuěng, ”Kěbị taumata e měmpědẹ̌deạ si Tuang.”

38Mawu Yesus e kai simimbang, ”Bọete i kitẹ maněpasẹ̌kon daral᷊eng i kitẹ sol᷊ong apan soa wal᷊ine kụ mararani e wọu ini. Iạ harusẹ̌ lai maněntiro tamai sene, u kai ene tẹ̌gal᷊u rarěntakue.”

39 # Mat. 4:23, 9:35 Kai ual᷊ingu ene Mawu Yesus e rụdal᷊eng mạměpidẹ̌ kạguwạu Galilea e, mạněntiro su manga wal᷊eng pẹ̌kakal᷊iomanengang apidẹ̌ měnẹ̌nokol᷊u manga rohkẹ̌ dal᷊akị e.

Mawu Yesus napakapian sěngkatau piạ sakị e su pisị

(Mat. 8:1-4; Luk. 5:12-16)

40Tau nirorokangu sakịe su pisị makạtatakụe#1:40: Sakịe su pisị makạtatakụe: Tumuhụ atorangu agaman tau Yahudi e, sakị ini makạdiading taumatane tawe wotonge měněmba Ruata su wal᷊eng pẹ̌kakal᷊iomanengang (kakělla Kamusẹ̌). riměnta su anum Mawu Yesus. Tau ene němul᷊angeng kụ nẹ̌bera, ”Kereu i Tuang tumal᷊ěntụ u iạ, ute i Tuang botonge mapakaul᷊en iạ e.”

41Mawu Yesus timal᷊ěntụen#1:41: Timal᷊ěntụen: Binohẹ u nạung piram baụ e: nẹ̌pědu. tau ene. Kụ i Sie něnenggehe tau ene apidʼu nẹ̌bera, ”Iạ e mapulu kụ kapiạ e!” 42Su orasẹ̌ ene tangu sakịe nailang kụ i sie napia. 43Mase Mawu Yesus něndolohʼi sie pinakapul᷊ẹ apidʼu timanatang ini, 44#Imng. 14:1-32 ”Ene ěng abe pẹ̌běke si sai-sai, kaiso tamaiko sol᷊ong anung imang, kụ pẹ̌dorong si sie pẹ̌sahiding kau u i kau e seng napia. Mase waugʼu pěngangundangu e, pěnondangkon sasěmba kerẹewe nititan Musa, kere tatiala su taumata l᷊awọ u i kau e kahěnga-hěngang seng napia.”

45Kaiso taumata ene napul᷊ẹ, mang hanesẹ̌ mẹ̌bẹ̌běken karariadin hal᷊ẹ̌ ene suapan tampạ, hakịewen Mawu Yesus e tawe nakasuẹ̌ su soa ene ringangu waharia. I Sie kětạeng nẹ̌tanạ su l᷊ikudʼu soa su manga tampạ mararěmasẹ̌. Kai manilaing kerene taumata e mang tạ pontode mạhunděnta su anunʼE bọu apan beọ e.

Currently Selected:

MARKUS 1: SXN

Highlight

Copy