MARKUS 2

Mawu Yesus napakapian tau nipeose

(Mat. 9:1-8; Luk. 5:17-26)

1Pira ěllo nal᷊iung ene Mawu Yesus nẹ̌sul᷊e sol᷊ong Kapernaum. Tangu nakekẹ e habarẹ̌ u i Sie kai su wal᷊e. 2Kụ l᷊awọ taumata němpẹ̌děnta. I sire němpẹ̌tampung sene, hakịu seng tawẹ apa l᷊oahe. Kal᷊ingung tukadẹ̌ e mal᷊aing nasěsẹ u taumata. Mase Mawu Yesus e něhabareng hengetang u Mawu Ruata e si sire. 3KạpěhengetangʼE i Sie, piạ e i sire ěpạ měbẹ̌bawenteng tau nẹ̌peose tadeạu wawaěng sarang anum Mawu Yesus. 4Kai kahian kal᷊awọu taumata, i sire tawe nakakahaung sarang děduhʼE. I sire nawị kụ nělekesẹ̌ atụ su l᷊antehʼu Mawu Yesus e. Bọu ene i sire němpangul᷊uhʼu tau peosẹ̌ ene ringangu těpihe. 5Sarạeng Mawu Yesus nakasilo kasariang pangangimang i sire, i Sie něhengetangke su tau peosẹ̌ e, ”Amang, kal᷊awọu rosanue seng niampungang.”

6Ene piạ e mananěntirong agama pirang katau kạpahungkaiange sene, nanětạe nahěngkiwal᷊o su ral᷊ungu naung i sire, 7”Kawahani i anu ěndaịe nẹ̌bera kerene! I Sie kai mělẹ̌hinakang Mawu Ruata. I sai wotonge makaampung dosa e sul᷊iun Mawu Ruata e sẹ̌sane?”

8Su tempo ene lai Mawu Yesus masingkạu tiněnnang sire. Mase i Sie něhengetangke, ”Kawe unụe i kamene měmpẹ̌tẹ̌tiněnna kerene su naung i kamene? 9Sude limembong mahaěng: mẹ̌berang, ’Dosanu seng niampungang’, arau měberang ’Pẹ̌bangungke, hengkẹ e těpihu kụ dal᷊engke’? 10Arawe ini Iạ sarung mělahẹ si kamene u su wowon dunia ini e, Ahusʼu Taumata e kai kawasa měngampung dosa.” Mase Mawu Yesus něhengetang su tau peosẹ̌ ene, 11”Pẹbangungke, hengkẹ e těpihu e kụ kapul᷊ẹ e!”

12Nẹ̌bangungke i sie kụ apidʼu něngal᷊ạ těpihe mase simẹ̌bangke tẹ̌tatinganeng i sire kěbị. I sire e němpẹ̌dal᷊inaụ, kụ mase němpẹ̌dalọe Mawu Ruata. Angkuěng i sire, ”Bẹ̌daweng tanakạsilo i kitẹ hal᷊ẹ̌ kere ini e!”

Mawu Yesus kimui si Lewi

(Mat. 9:9-13; Luk. 5:27-32)

13Mawu Yesus nẹ̌sul᷊e kapia sol᷊ong apeng u Ranong Galilea. Mal᷊awọ taumata e himaung si Sie, mase i Sie naněntiro si sire. 14Piạ e Mawu Yesus kapẹ̌daral᷊enge sene, i Sie nakasilo sěngkatau maghaghělle bea arenge i Lewi, anạ i Alfeus, kụkaiang su kantorẹ̌ u bea. ”Tol᷊ẹ e Siạ,” ungkuěngu Mawu Yesus si sie. Tangu i Lewi e měngkatewe nẹ̌buạ kụ timol᷊e Mawu Yesus.

15Kutẹu Mawu Yesus kapẹ̌sẹ̌simokol᷊e su wal᷊eng Lewi,#2:15: Su wal᷊eng Lewi: arau su wal᷊enʼE (kụ kai wal᷊en Yesus). tangu narěntạ e ghapaěngu maghaghělle bea ringangu taumata apạewen pẹ̌pandaěngu taumata l᷊awọ e taumata ral᷊akisẹ̌ kụ nahungkaěng sěngkakaěng dingangu Mawu Yesus sire manga muritʼE. U kai lawọ su tal᷊oaran sire nahuntol᷊e su Mawu Yesus. 16Mananěntirong agama pirang katau wọu ghapaěng u tau Farisi nakasilo Mawu Yesus sěngkapahungkaěng dingangu manga maghaghělle bea ringangu taumata lẹ̌ěnnaěng barạdosa e. Kụ i sire němpẹ̌kibal᷊o su manga muritʼu Mawu Yesus, ”Kawe unụe mananěntirong kamene e kawe kụkaěng dingangu manga maghaghělle bea ringangu taumata apan dal᷊akisẹ̌ e?”

17Mawu Yesus e nakaringihẹ̌ kakiwal᷊on sire ene, kụ simimbang ungkuěng, ”Taumata apan mal᷊ahuweka e tawe mẹ̌gaghausẹ̌ dokterẹ̌, kaiso kawe apang masasakị e sidutu. Iạ diměnta e wal᷊inewe kumui apan kụ měpẹ̌pěndang batangenge seng mapia, kaiso kawe taumata apan baradosa e.”

Hal᷊ẹ̌ u pẹ̌tatělling

(Mat. 9:14-17; Luk. 5:33-39)

18Ene piạ su sěngkatempo manga muritʼi Yohanes Měnanahani ringangu tau Farisi e kạpẹ̌puasane. Bọu e kai piạ u himaung su Mawu Yesus kụ nakiwal᷊o angkuěng, ”Kawe unụe muritʼi Yohanes Měnanahani ringangu tumatol᷊e tau Farisi e kawe měpẹ̌puasa, arawe manga muritʼi Tuang kawe tala wue?”

19Mawu Yesus simimbang, ”Makoạ bue su sal᷊imbangu kawing, kụ manga sake ipẹ̌puhědang? Kereu kaghiang esẹ deng bẹ̌dang dingangi sire, nal᷊ahẹu i sire mang mahungkaěng. 20Kai sarung su tempone kaghiang esẹ e al᷊akeng bọu i sire. Su tempo ene ute wuhụewe i sire tawe měmpahungkaěng.

21Tawẹ apa taumata měnděpelu ririsẹ̌ buhu waugʼu ghědẹu pedesẹ̌ těbe. Batụu ririsẹ̌ buhu ene kai měngahěbụ dingangu makaghědẹ pedesẹ̌ ene, kụ sauneng makasaria ghehẹ e. 22Kerene lai tawẹu mẹ̌tahong anggorẹ̌ buhu su kawihẹ̌ pisị těbe. U anggorẹ̌ buhu e sarung makaběse kawihẹ̌. Samurine i rẹ̌dua e magholọ kěbị. Anggorẹ̌ buhu e kawe hinong itaho su kawihẹ̌ buhu e lai!”

Kakiwal᷊o mạanung ěllon Sabatẹ̌ e

(Mat. 12:1-8; Luk. 6:1-5)

23 # Pang. 23:25 Piạ sěnsul᷊e su ěllon Sabatẹ̌ e, piạ e Mawu Yesus simahe wọu rahaming gandung, manga muritʼE, nanětạ e němpanipo gandung. 24Kutẹu tau Farisi e němpẹ̌berạ e su Mawu Yesus, angkuěng, ”Kawe unụe manga muritʼU e kawe lụl᷊ampa atorʼu agamang kitẹ, kụ i sire kawe měmpẹ̌kẹ̌koạbe apang ipẹ̌pělli su ěllon Sabatẹ̌ e?”

25-26 # 1Sam. 21:1-6 #Imng. 24:9 Mawu Yesus simimbangke u, ”Kai wẹ̌dang ta nakạbasa i kamene apang kụ nịkakoạ i Daud, piạ i Abyatar kapẹ̌munarane kere sěngkatau imang mawantugẹ̌. Piạ i Daud dingangu manga taumatane něngkal᷊unusẹ̌, kụ nikawusangu kaěng, tangu i sie simuẹ̌ su Wal᷊em Mawu mase kimaěng borotẹ̌ sasěmba su Mawu Ruata. Ku borotẹ̌ ene mal᷊aing pinẹ̌gěllikange su taumatane. U sěmbal᷊iau su atorangʼu agamang kitẹ e kětạewen manga imang botonge kumaěng borotẹ̌ ene.”

27Mase Mawu Yesus bẹ̌dang nẹ̌bera lai u, ”Ěllon Sabatẹ̌ e nikoạ baugu taumata wal᷊inewe taumata waugu ěllon Sabatẹ̌; 28Kụ Ahusʼu Taumata e kai kawasa, ore lai su ěllon Sabatẹ̌.”

Currently Selected:

MARKUS 2: SXN

Highlight

Copy