MIKHA 7

Kananawong lulung Israel

1Kạěngkěhang bue iạ e! Iạ mẹ̌sul᷊ungu tau kinal᷊unusang kụ tamai měnipo wuang kalu kụ seng kinapal᷊usangu musunge. Seng tawẹ apa lai manga wua-bua su manga kakaluange. Buang anggorẹ̌ dingangu manga wuang ara kụ mapapia e kěbị e seng nasuen tipone. 2Taumata matul᷊idẹ̌ e seng naparung bọu wanua, taumata kụ masatia su Mawu Ruata e seng tawe ipẹ̌sombang kapia. Apan taumata e mẹ̌ngampal᷊ẹ̌ lěsabe mẹ̌deạu měmate. Sěngkatau-sěngkatau e masịtaingu sedẹ e waugu sěndinganenge. 3Kěbị e tahakoạ dal᷊akisẹ̌. Mapapangkatẹ̌ dingangu mělahukunge měmpẹ̌dẹ̌dorong sasorokẹ̌, dingangu manga těmbonangu kawanua e měmpẹ̌nẹ̌nihasang kapulun sire, kerene kakakoạ i sire měmpẹ̌sẹ̌sěngkanaung. 4Kapapiange ringangu katatul᷊idange wọʼi sire e mal᷊aing mẹ̌sul᷊ungu sumpinị mahanggang tawẹ gunane.

Seng nịdating u tempone Ruata e měhukungu umatʼE kerẹewe seng nipaul᷊ịʼE si sire limiung manga nabi-Ne. Orasẹ̌ ini e seng siměpụ pẹ̌tatongkarasẹ̌ sutal᷊oaran sire. 5Kumbahangbe měmpangimang su manga lampungu, abe pěngumbala su manga hapị. Pakaingatẹ̌ bue su manga waweranu manilaing dumararingihe kawe kawingu hala e. 6#Mat. 10:35-36; Luk. 12:53 U, su tempo kere ini e ral᷊ohong lawọ mědẹ̌daral᷊akisẹ̌: anạ esẹ měndal᷊akị si amange, anạ bawine rumokạ si ninange, anạ mirarating bawine e mẹ̌darendehẹ̌ dingangi ninange mirarating.

7Arawe i kitẹ e kawe mělẹ̌harapẹ̌ su Mawu; ringangu napinunụ u kal᷊aiakingu i kitẹ e měngampal᷊ẹ̌ Duatang kitẹ e. I Sie sarung dumaringihẹ̌ kakal᷊iomaneng i kitẹ e ringangu měngambang si kitẹ.

Mawu e mapakasal᷊amatẹ̌

8Tawẹ apa hinong makoạ banggilu pahal᷊uasu manga sekẹ baugu kaghagholọ i kitẹ e. U manilaing i kitẹ e manawo, kaiso i kitẹ e sarung mẹ̌pětị kapia. Orasẹ̌ ini e i kitẹ kai su ral᷊ungu kararěndung, kaiso Mawu e sarung měnualagẹ̌ si kitẹ. 9I kitẹ e kai seng nẹ̌dosa su těngom Mawu, ual᷊ingu ene orasẹ̌ ini e i kitẹ harusẹ̌ makapěndang dal᷊angehʼE. Kaiso tawẹ kararěngụ e lai i Sie sarung tumatawang si kitẹ dingangu mẹ̌gěllịu kạadilẹ̌ si kitẹ. I Sie sarung mapasěbang i kitẹ e wọu sol᷊ong tualagẹ̌; i kitẹ e sarung makahombang hala u i Sie e mapakasal᷊amatʼi kitẹ e. 10Kal᷊imona sekẹ e mělẹ̌hinakang si kitẹ kụ nẹ̌bera u, ”Kai suapa Mawu, Ruatanu e?” Arawe ini e i sire sarung makasilo kai apạe nikoạ u Mawu e waugʼi kitẹ, kụ i sire sarung měngkamea. I kitẹ e sarung mẹ̌sahidim manga sědụ i kitẹ e kinawatạ dingangu tẹ̌tatahidaěng kere manga l᷊ěbo su ral᷊eng.

11Ei Yerusalem! Seng nidatingu tempone i kamene měmangung kapia manga meselu soanu. Su ěllo ene wanuanu e sarung ipakawěnahẹ̌. 12Taumatanu e sarung mẹ̌sul᷊e kapia su anunu walạewe wọu tampạ sude – wọu Asyur su sěmběkan daki, wọu Misirẹ̌ su sěmběkan timuhẹ̌, bọu wimbaengu Sal᷊ụ u Efrat, bọu sěmběkan taghal᷊oang dingangu wọu manga wawul᷊urange marau. 13Arawe runia e sarung maghinggihẹ̌ kahiang karal᷊akisu tumatanạ e.

Kakal᷊iomanengu mẹ̌gausẹ̌ tul᷊umangu Mawu e waugu Israel

14O Mawu, lukadeko umatʼU e, umatẹ̌ pinilenʼU e. I sire natanạ nagheang su kěhu mal᷊oang, sutal᷊oarang ěntana matawa. Balạekere i sire makaěbạ kaěng su wurasu rěmpugu Basan dingangu su Gilead kere nạung su tempo kal᷊imona.

15Pẹ̌koạko karal᷊inạu baugi kami e, o Mawu, mẹ̌sul᷊ungu nikoạʼU kal᷊imona e piạ i Kau e naněbang i kami e wọu Misirẹ̌. 16Manga wansa e sarung makasilo hal᷊ẹ̌ ene ringangu měngkamea ual᷊ingu nakahěngang u patikụ katoghasʼi sire e tawẹ mangal᷊ene apa. I sire sarung kailangeng u akal᷊ẹ̌ hakịu tawe makawisara arau makaringihẹ̌. 17I sire sarung humomang su ěntana kere těmpu. Dingangu katatakụ ore lai kạkendene i sire sarung mahunsěbang bọu wal᷊oarị i sire, bọu e ruměnta su anunʼU, o Mawu Ruatang kami.

18Tawẹ apa Ruata kere i Kau o Mawu, kụ nangampung dosang umatẹ̌ pinilenʼU e apang lěmbene. Tawe sarang karěngụ e i Kau e lumangehẹ̌; samurine, i Kau e mal᷊uasẹ̌ měnodẹ u kakěndagʼU e tawẹ kẹ̌takenge ene. 19I Kau sarung kuměndagẹ̌ lai si kami ringangu měngampung si kami. Manga rosang kami e sarung daral᷊indaěngʼU dingangu hipeěngʼU sol᷊ong běntan laudẹ̌ e! 20Baugu umatʼU e, hěnton Abraham dingangʼi Yakub, i Kau sarung mělahẹu satianʼU ringangu tatal᷊ěntụʼU kụ tawẹ kětakenge ene kerẹewe nikědonʼU su manga i upung i kami e nạung kal᷊imona.

Currently Selected:

MIKHA 7: SXN

Highlight

Copy