MIKHA 6

Pěngangěnsilu Mawu e waugu Israel

1Pẹ̌daringihẹ̌ko apan niěnsilu Mawu e su tau Israel. Pẹ̌bangungke, o Mawu, kụ pěhabarẹ̌kong kabaratangʼU e! Kụ manga wul᷊ude ringangu manga wongkone e pẹ̌daringihe apan ipěhengetangʼU.

2Ei manga wul᷊ude, ei manga wal᷊ane, daringihẹ̌ko kạbaratang u Mawu! I Sie piạ pěrkarane ringangu Israelẹ̌ umatʼE ringangu sarung měnuntụ si sire.

3 Mawu e něhengetang, ”Ei umatẹ̌-Ku, apang kụ sen Takụ kinoạ baugʼi kamene? Su hal᷊ẹ̌ sude Iạ nakasigěsạ si kamene? Simbahẹ̌ko si Siạ! 4#Sas. 4:10-16, 12:50-51, 15:20 I kamene sen Takụ niapasěbang bọu Misirẹ̌, dingangu Takụ nipěllọ bọu pẹ̌tatahamawuang; Iạ e seng něndolohʼi Musa, i Harun, dingangu i Miryam baugu pěngahạ si kamene. 5#Pẹ̌t. 22:2–24:25; Yos. 3:1–4:19 Umatẹ̌-Ku, pẹ̌tahěndungko apan seng nipẹ̌karaking Balak datung Moab baugʼi kamene, dingangu apạeweng nisimbahʼi Bileam anạ i Beor si sie. Pẹ̌tahěndungko apan seng nariadi su raral᷊engang su wěllạu pẹ̌darasengang su Sitim dingangu Gilgal. Kereu i kamene makatahěndung kěbị ene, i kamene sarung makaěnna u apan sen Takụ kinoạ baugu mapakasal᷊amatʼi kamene.”

Sasěmba kụ ikẹ̌kapulung Mawu

6Kai apạe hinong isěmbang kitẹ su Mawu, Ruata su sorga, kereu i kitẹ duměnta mědeạu mẹ̌kal᷊iomaneng si Sie? Unụe i kitẹ e harusẹ̌ mẹ̌bawa sapi kawuhuang sahị baugu isěmba kere sasěmba tẹ̌tongkatenge ho si Sie? 7Mal᷊uasẹ̌ ngae Mawu kereu i kitẹ e mẹ̌bawa domba ringangu hiwune arau mahěmpal᷊iung kal᷊awọe lanang zaitun? I kitẹ e hinong apěněmba si Sie, anạ kaiakaneng i kitẹ e kere tatubusẹ̌ kal᷊awọu manga rosang kitẹ? 8Tala, Mawu e seng nělahẹ si kitẹ apang kụ mapia. Tẹ̌tuntukangʼE wọʼi kitẹ e ute kai tadeạu i kitẹ e mẹ̌koạbe su kaadile sěntiniạ mapạdal᷊engu pẹ̌kakěndagẹ̌, kụ dingangu kasasanạu naung mẹ̌biahẹ̌ masěmbaụ dingangu Ruatang kitẹ e.

9Apạ e limembong kapelesane waugu matakụ u Mawu. I Sie kụkahiorọ su manga tumanạ u soa, ”Daringihẹ̌ko e i kamene kụ mẹ̌tẹ̌tampung su soa! 10Su wal᷊eng taumata raral᷊akisẹ̌ e kẹ̌kaěbakeng arětạ kụ něnggạu pěngangakal᷊ẹ̌ e. I sire mẹ̌kẹ̌koạ sasupane konti, sěmbaụ kakanoạ kụ Takụ ikẹ̌kawěnsing. Taumata kụ mẹ̌kẹ̌koạ e sarung Takụ ihukung. 11Tawe masowa su akal᷊ẹ̌ kụ Iạ e mangampung taumata kụ mẹ̌kẹ̌koạ timbangeng tawe su katul᷊ide. 12Taumata kalạ su soanu e měmpěnẹ̌nẹ̌dạ tau kasiange, dingangu i kamene kěbị e tahakontiang. 13Kụ ini e Iạ manětạ e měměbahẹ̌ dingangu měnggagholọ i kamene ual᷊ingu kal᷊awọu rosang kamene. 14I kamene sarung mahungkaěng, kaiso tawe měngkal᷊aedẹ̌ – kụ sal᷊ạanune měngkai těbe lunusẹ̌. I kamene sarung měhengkẹ manga apal᷊iwụ, kaiso tawe makaambang. Walạewe apa sarung ěmpingang i kamene sarung Takụ gagholokang su ral᷊ungu pẹ̌seketang. 15I kamene měnawuhu gandung, kaiso sarung tawe měměnsạ buane. I kamene sarung mẹ̌koạ l᷊ana wọu wuan zaitun, kaiso tawe makapakẹ lanane. I kamene sarung měměhạ akẹ u anggorẹ̌, kaiso tawe měnginung bọu ene. 16#1Rat. 16:23-34, 21:25-26 Patikụ ene nariadi e ual᷊ingu i kamene tụtol᷊e kal᷊awọu kakanoạ u Ratu i Omri ral᷊akisẹ̌ e, ringangu anạe Ratu i Ahab. I kamene mẹ̌tẹ̌těno kakakoạ i sire. Ual᷊ingu ene Iạ e sarung měnggolọ i kamene, kụ i kamene sarung tongkeaneng dingangu hinakaneng u kal᷊awọu wansa.”

Currently Selected:

MIKHA 6: SXN

Highlight

Copy