HOSEA 8

Mawu e něhukung u Israel ual᷊ingu i sire měnẹ̌němba mahang duata

1 Mawu e něhengetang, ”Apahěteko tatialam piạ silakạ! Sekẹ e něngalo wanua-Ku kere manụ kalěmba něnahedẹ̌ kinaěnge! Umatẹ̌-Ku lụlampa pẹ̌dariandi-Ku ringang i sire, ringangu rụdokạ manga těntiro-Ku. 2Maningbe i sire mẹ̌sẹ̌bạ u Iạ e Ruatan sire, ringangu mẹ̌berau i sire kai umatẹ̌-Ku kụ masingkạ u Iạ, 3kaiso i sire mạdiri měnarimạ u apang mapia. Ual᷊ingu ene i sire sarung sahusuang u manga sědụ i sire.

4Umatẹ̌-Ku němile ratu tawe makakiwal᷊o těgu-Ku. I sire mělẹ̌hengkẹ těmbonange su wěga-Ku. I sire kěbị něngal᷊a bul᷊aeng dingangu sal᷊akan sire kụ bọu ene němpẹ̌koạ tul᷊adang mahang duata kụ makạkadiading kaghagholọ i sire hala. 5Iạ e mạběnsing u sapi wul᷊aeng kụ isẹ̌sěmban tumanạ u soan Samaria. Iạ e wawal᷊uang kahěngang si sire. Sarang tempo sude i sire sěntiniạ sarung mẹ̌tẹ̌ngkal᷊amuhụ u watangeng i sire kụ maněmba mahang duata? 6Sapi wul᷊aeng kụ sẹ̌sěmbaěng su Samaria e kai koạ u manga měmamunaran tau Israel! Ene wal᷊inewe Ruata ringangu harusẹ̌ dombaěng! 7Umatẹ̌-Ku e mẹ̌sẹ̌suangu anging tangu i sire sarung měměnsạ u suwu-suwu! Ansedu gandung i sire tawe měngkaririhẹ̌ tangu sarung tawe makaual᷊i tapoěng mědeạu kanengang. Kaiso kereu ansedẹ̌ ene mal᷊aing měngkaririhẹ̌ tangú gandunge sarung ěnsueěngu manga wansa wal᷊ine. 8Kere kuring naběka, kerene Israelẹ̌ e semben tawẹ mangal᷊ene, kụ seng nakoạ bansa wiasa kere manga wansa wal᷊ine. 9Kere kalide maghaěng kụ lụl᷊ewang kerene kakakoạ u tau Israel tụtuhụ kapulune hala. I sire mẹ̌dẹ̌deạ tatongka wọu Asyur, dingangu mạmělli pẹ̌dal᷊ahapị u manga wansa wal᷊ine. 10Maningbe kerene Iạ sarung měnampung dingangu měhukung i sire.#8:10: Měhukung i sire arau: I sire tawe lai sarung měhengkẹ u ratu, arau manga mapapangkati sire hala. Tawẹ karěngụ e lai i sire sarung mẹ̌kẹ̌kiaratagu natědụ, kamagengu i sire sẹ̌sědakeng u ratung Asyur.

11Mangkeng kakạl᷊awọ e pananěmbaěng pětikangu tau Israel baugu ipěndẹ̌dasẹ̌ dosa e, kai mangkeng kakạl᷊awọe lai tampạ u pẹ̌koateng i sire rosa! 12Iạ e němohẹ u těntiro mal᷊awọ-l᷊awọ baugʼi sire, kaiso kěbị ene nihipen sire batụu su naung i sire tawẹ apa kal᷊ahěmpukange ringang i sire. 13I sire puluang němpẹ̌gěllịu sasěmba si Siạ, dingangu kuminạ gěsim binatang sasěmba ene, kaiso Iạ e kai Mawu, tawẹ karal᷊uase su manga sasěmba ene. Ini e Iạ sarung mẹ̌tahěndung dosan sire ringangu měhukung i sire ual᷊ingu kal᷊awọu rosan sire ene; Iạ e sarung měndingọ i sire kapia sol᷊ong Misirẹ̌!

14Tau Israel němangung manga istana, arawe i sire niwul᷊eng Měndariadi si sire. Tau Yehuda napakal᷊awọ u soa piạ bal᷊oarị e, arawe Iạ e sarung mapakatěntungu putung ipěhěngisẹ̌ pakaupu kal᷊awọu istana ringangu kal᷊awọu soan sire.”

Currently Selected:

HOSEA 8: SXN

Highlight

Copy