HOSEA 9

Hukumang baugu Israel nihabarẹ̌

1Ei tau Israel, abe saụ pěmantugẹ̌ ěllong kamene masěllahẹ̌ e kere manga wansa wal᷊ine. I kamene seng naněntangu Ruatang kamene ringangu tawe nẹ̌těngkasatia si Sie. Su apang pěndal᷊utakeng gandung,#9:1: Su apang pěndal᷊utakeng gandung: Manga tampạ ini pẹ̌paketang lai makoạ tampạ u pẹ̌kakal᷊iomanengang. i kamene měmpẹ̌bẹ̌bal᷊ụ u wadang i kamene kere tahapẹ̌sundal᷊ẹ̌ su mahang duatam Baal, dingangu mal᷊uasẹ̌ měnarimạ u gandung kụ lẹ̌ěnnaěng i kamene e kere wawalaru mahang duata ene si kamene! 2Kaiso tawẹ kaděngụ e lai i kamene sarung kakawusangu gandung dingangu lanang zaitun, dingangu anggorẹ̌ e mal᷊ain sarung masue. 3I kamene, ei tau Israel, tawe sarung matatapẹ̌ mạtanạ su wanua kụ nionggọ u Mawu e si kamene. I kamene harusẹ̌ mẹ̌sul᷊e kapia sol᷊ong Misirẹ̌, dingangu harusẹ̌ kumaěng kaěng ipẹ̌tẹ̌tělling#9:3: kaěng ipẹ̌tẹ̌tělling: Su torati Musa, taumata isẹ̌sẹ̌ding kumaěng kaěng tani irẹ̌dekeng pẹ̌tẹ̌tělling u agama (kakělla Imng. 11). su Asyur. 4Su kal᷊awọu wanua ene i kamene tawe makapaněmbang anggorẹ̌ dingangu sasěmba binatang baugu mapakal᷊uasu naungu Mawu. Kaěng i kamene sarung makakariading apang měmpahungkaěng e měngkal᷊amuhụ, kere kaěng kụ kẹ̌kanengang su tempong pěnanampạ taumata nate. Kaěng ene tumbạeng piạ gunane mapakal᷊aedu tiangu, kaiso tawe ikawawa sarang kadidị-didị sol᷊ong Bal᷊eng Mawu mědeạu isěmba paị sene. 5Su apạeweng pěmamantugu ěllong agama ghaghuwạ e waugu měngadatẹ̌ Mawu, i kamene tawe wotonge mẹ̌koạ manga apa waugu měmantugẹ̌ e. 6Kereu silakạ e marěnta, kụ i kamene e iwawa sol᷊ong banua wal᷊ine, tangú apan natěntang sutal᷊oarang kamene sarung tampungang u tau Misirẹ̌ mědeạu pateěng dingangu lěbingang su Memfis! Pěpạ dingangu sumpinị sarung tumuwo měhěmbung kal᷊awọu tampạ nạung ěnnạu wal᷊eng kamene dingangu apal᷊iwụ i kamene sal᷊aka mal᷊aarěga.

7 # Luk. 21:22 Seng narěnta tempong pělahukung, tempo waugu měnarimạ pamamal᷊isẹ̌ baugu kal᷊awọu kakanoạ. Israelẹ̌ e sarung makapěndang!

I kamene nẹ̌bera, ”Nabi kụ pinẹ̌kawasaěngu rohkẹ̌ ini e wodokẹ̌! I sie kai pulu!” I kamene nẹ̌bera kerene ual᷊ingu i kamene mạběnsing-běnsing u iạ dingangu rosanu e mambeng masaria-saria. 8Duata e něndolohu iạ kere nabi, mědeạu maul᷊ị si kamene umatʼE, kaiso waewe sol᷊ong apa iạ e, i kamene kawe mědẹ̌deạu měnodẹ si siạ kere manụ u winalangeng. Su wanua tataghuaneng u Ruata sẹ̌sane, i kami manga nabi e nisědukangu kawanua. 9#Měl. 19:1-30 Apạe karal᷊akisẹ̌ kakanoạ u kere nạung nikoạ u taumata su Gibea.#9:9: Gibea: Su soa ini piạ taumatang Israel bọu hěntong Benyamin kụ limia rokạu sěngkatau tau Lewi; hal᷊ẹ̌ e makawodaị pẹ̌sasekẹ u anạ u sěngkatau ku maraning makaupu patikụ gal᷊ipohong Benyamin. (Kakělla Měl. 19:21). Duata e sarung mẹ̌tahěndung pẹ̌sasal᷊anu, ringangu měhukung i kamene ual᷊ingu rosang kamene.

Dosang Israel dingangu aị e

10 # Pẹ̌t. 25:1-5 Mawu něhengetang, ”Piạ nạung Iạ kahumotongange nẹ̌sombangu Israel, Iạ e mal᷊uasẹ̌ kere taumata nakareạ buang anggorẹ̌ su ngara l᷊inggi. Piạ Iạ nạung humotong nakasilo si upungu, Iạ e mal᷊uasẹ̌ kere taumata nakasilo wuang ara humotong. Kaiso piạ e i sire nakoạ sol᷊ong Bul᷊udu Peor, i sire nanětạe naněmba Baal, hakịu i sire nal᷊amuhụ kere mahang duata kụ sẹ̌samolokang i sire ene. 11Kawawantugu Israel sarung mapuạ mailang kere manụ u winalangeng; tawẹu sarang mẹ̌bawa kapapia, dingangu tawẹ apa manga rariọ darodọ kụ piněhěnding. 12Kaiso manilaing piạ manga rariọ ipěhěnding dingangu ipakasaria, i sire sarung Takụ al᷊akeng; tawẹu sarang sěngkatau Takụ iwala wiahẹ̌. Silakạ bue i kamene, ei tau Israel, kereu Iạ e maněntang i kamene!”

13 Mawu, iạ nakasilo manga anạ i sire pẹ̌sẹ̌sahusuang dingangu pateěng. 14Kai apạe hinon takụ dorongang si Kau waugʼi sire ene? Apakariadiko manga wawinen sire e wantọ! Koạko sarang i sire tawe mapasusung anạ i sire!

Mawu e něhukungu Israel

15 Mawu e něhengetang, ”Kěbị karal᷊akisʼi sire e nanětạ bọu Gilgal. Kụ seng sene e Iạ nanětạ e mạběnsing i sire. Ual᷊ingu kakanoạ i sire ral᷊akisẹ̌ e, Iạ sarung měnokol᷊ʼi sire wọu wanua-Ku ini. Iạ e seng tawe kuměndagʼi sire lai; kal᷊awọu pangahạ i sire e seng dimokạ si Siạ. 16Tau Israelẹ̌ e sarung Takụ ihukung. I sire sarung makoạ kere sasuang kụ tawe něbua ringangu manga hamụ e seng nahěgu. I sire sarung tawẹ anạ i sire, kaiso manimbelai piạ anạ i sire, Takụbe pateěng manga anạ i sire kụ ikẹ̌kěndagʼi sire ene.”

Nabi měbẹ̌bisara mạanung Israel

17Duata kụ takụ tẹ̌tangkianeng e sarung tawe měnarimạ u umatʼE, batụu i sire e madiri rumaringihẹ̌ si Sie. I sire e sarung mẹ̌palilị su tal᷊oarang manga wansa.

Currently Selected:

HOSEA 9: SXN

Highlight

Copy