HOSEA 7

1 Mawu e něhengetang, ”Suapang kewe Iạ mapulu mapakaul᷊eng umatẹ̌-Ku Israel dingangu mapakaul᷊ị u kakakoạ i sire, tangú Takụ kẹ̌kasilo tumbạeng karal᷊akisẹ̌ dingangu rosan sire. I sire lawọ mẹ̌pẹ̌papangakal᷊ẹ̌, i sire měmpạhunsuẹ̌ bal᷊en taumata wal᷊ine mědeạu mẹ̌tako, ringangu i sire měmpẹ̌lěhampasẹ̌ su apan dal᷊eng. 2Tawẹ běke reng masal᷊ěnsawụ su ral᷊ungu naung i sire u Iạ sarungbe makatahěndung kal᷊awọu karal᷊akisẹ̌ ene. Arawe kal᷊awọu rosan sire mělẹ̌lakubẹ̌ si sire hakịu mal᷊ahẹ Takụ ikasilo.”

Komol᷊angu taharugalẹ̌ su wal᷊en datu

3 Mawu e něhengetang, ”Nẹ̌dingangken tondol᷊ikụ dingangu kakanoạ dal᷊akisẹ̌, kawanua e mẹ̌tẹ̌tawakal᷊i mapakal᷊uasu naungu ratu ringangu mapapangkatu mẹ̌paparenta. 4I sire kěbị e tahakontiang dingangu taumata tawẹ satiane. Kawawěnsing i sire e mẹ̌sul᷊ungu putung su ral᷊ungu sunggilẹ̌ kụ tawe nikẹ̌kalabu mẹ̌kakoạ borotẹ̌ těntal᷊ang tapoěng seng bọu nikaugẹ̌ e seng kate mẹ̌tongkạ. 5Su ěllong sal᷊imbang u ratu, i sire napěnginungu ratu ringangu manga mapapangkatu kawanua e sarang niwukang mase nẹ̌koạ haghing hal᷊ẹ̌ u kawawodokẹ̌. Pěngěnsueěnge ratu e mẹ̌dẹ̌dal᷊uasẹ̌ dingangu manga taha kontiang ene. 6Kere putung su ral᷊ungu sunggilẹ̌ e, kerene karaki ral᷊akisẹ̌ e dingangu ral᷊ěnggihʼi sire nẹ̌tětuhẹ̌ su ral᷊ungu naung i sire kanandung hěbi, ringangu su tempong mal᷊ukadẹ̌ e rimaẹ nakoạ děllị u putung nẹ̌tondaisẹ̌.

7Su ral᷊ungu sahokaʼm pědun sire tangu i sire němate kal᷊awọu měngangahạ si sire. Kěbị datun sire seng nipate mẹ̌tẹ̌tatuhụ. Kaiso manilaing seng kakakoạ e nariadi kerene karal᷊akise, kai man tạu sěngkatau lai nẹ̌kal᷊iomaneng si Siạ mědeạu makitul᷊ung.”

Israel dingangu manga wansa

8 Mawu e něhengetang, ”Tau Israel nẹ̌těngkasěmbaụ dingangu manga wansa mạngělikụ si sire, hakịu i sire nakoạ kere borotẹ̌ nasasạ sěmběka. 9I sire tawe nakapěndang u kawe nạung ual᷊ingu kasasěmbaụ dingangu wansa ene, tangú nailangke katoghasʼi sire. Pěngěnsueěngu wěkeng mạanun sire seng marani, kaiso i sire wěga wue. 10Kal᷊aobotu tau Israel kẹ̌kasilo mal᷊ahẹ dingangu nakoạ karal᷊ahẹ u pẹ̌sasal᷊an sire. Maningbe kěbị ene seng nariadi, i sire tawe lai nẹ̌deạ si Siạ arau mẹ̌sul᷊e su anu-Ku, Mawu Ruatan sire. 11Israel tamai ramahi kere manụ paluma kụ bodo. Kahumotong-motongange taumatane makịontol᷊ẹ̌ su Misirẹ̌, bọu ene i sire tumal᷊ang sol᷊ong anun tau Asyur! 12Kaiso kasaun sul᷊ene i sire sumahe, Iạ sarung mẹ̌taingu somạ kụ měnamẹ si sire kere taumata měnamẹ manụ u winalangeng. Iạ hědo měhukung i sire kụ sen Takụ kinasingkateng, patikụ karal᷊akisi sire.

13Kạěngkěhang i sire, batụu i sire seng naněntangu Iạ. I sire sarung magholọ u kawe seng dimokạ si Siạ. Iạ mapulu mapakasal᷊amatʼi sire, kaiso pẹ̌kakal᷊iomaneng i sire si Siạ e kai mělle samatang. 14I sire mamben tawe mẹ̌kakal᷊iomaneng kahěngang si Siạ. Kereu i sire mẹ̌doa, i sire mẹ̌tẹ̌těngkaěnsạ u watangeng i sire su raral᷊okaěng, kụ mahul᷊ungkang kere kẹ̌koatengu taumata kụ tawe mangangimang si Siạ. Kereu i sire mẹ̌doa waugu mẹ̌dorong gandung dingangu anggorẹ̌, i sire mělẹ̌lesẹ badang i sire kere kẹ̌koatengu taumata kụ měnẹ̌němba mahang duata. I sire e kahěnga-hěngang lụlawang si Siạ! 15Maningbe seng Iạ e mapakạsaria ringangu mapakạtoghasʼi sire, kaiso i sire kawe měmpẹ̌gẹ̌gihingangu rumokạ si Siạ. 16I sire měngkate sěntiniạ měmpạhuntol᷊e mahang duata kụ mamben tawẹ kawasane apa. I sire tawe kapěngumbalaěng kere naěnakeng tawe mal᷊aěnạ. Apạeweng pangahạ i sire e měmpẹ̌bisara mal᷊aobotẹ̌, ual᷊ingu ene i sire sarung pateěng u peda, ringangu lěgeěng u apan tau Misirẹ̌.”

Currently Selected:

HOSEA 7: SXN

Highlight

Copy