HOSEA 5
5
1 Mawu e něhengetang, ”Pẹ̌daringihẹ̌ko, ei manga imang! Tatinganeko, ei tau Israel! Daringihẹ̌ko, ei manga hěnton datu! Hukumang seng nipakanawo si kamene. Batụu, hinone i kamene kawe měhukung su kạadile, kaiso ral᷊iune i kamene kawe seng nakoạ kere sedẹ su Mizpa, kere wal᷊atị su Wul᷊udu Tabor, 2ringangu kere lohange maral᷊ung su Sitim. Ual᷊ingu ene Iạ sarung měhukung i kamene kěbị! 3Iạ masingkạ u kěbị e mạanung batangengu ei Israel! Tawe mariadi i kau e měndahasiang apa-apa e wọu anu-Ku. I kau e mạněmba mahang duata ringangu sen tawẹ lai satiane si Siạ. Ual᷊ingu ene, taumatanu e semben tawe hinone lai maněmba si Siạ.”
Tatahěndung mạanung pananěmba mahang duata
4Karal᷊akisẹ̌ kụ nikoạ u tau Israel nakariadin sire tawe nakapẹ̌sul᷊e sol᷊ong Duatan sire. I sire seng nihěngkung u pananěmba mahang duata, hakịu i sire sembelain tawẹ pandungange su Mawu. 5Kal᷊aobotu tau Israel seng natompẹ mal᷊ahẹ, kụ seng nakoạ karal᷊ahẹ u pẹ̌sasal᷊an sire. Dosan sire nakakariadin sire mitangga kụ manawo, kụ tau Yehuda e mal᷊aing manawo ringangi sire. 6I sire tamai nẹ̌deạ Mawu kụ nẹ̌bawa domba ringangu sapi baugu sasěmba, kaiso kěbị e tawẹ gunane. Batụu Mawu e seng naněntang i sire, kụ i sire tawe nakapẹ̌sombang i Sie. 7I sire tawẹ satiane su Mawu; manga anạ i sire wal᷊inewe manga anạʼE. Ual᷊ingu ene sen tawẹ kạděngụ lai i sire sarung ipakawinasa ringangu manga rahamin sire.
Pẹ̌sasekẹ u Yehuda ringangu Israel
8Tiụko slompretẹ̌ su Gibea! Apahěteko tandang kakui mẹ̌sekẹ su Rama! Pěmansagẹ̌kom bansagu paraěng su Betel!#5:8: Betel: Kakělla pasalẹ̌ 4:15. Mahịe hěntom Benyamin, tol᷊ọ e pẹ̌sekẹ! 9Israel sarung mawinasa, batụu seng narěnta tempone waugu měhukung i sie. Pẹ̌daringihẹ̌ko, ei kawanuang Israel, hal᷊ẹ̌ ene mamben sarung mariadi.
10 Mawu e něhengetang, ”Iạ e lumangehẹ̌ ual᷊ingu manga pangahạ u Yehuda e seng něngalo Israel dingangu něhampasẹ̌ ěntanane. Ual᷊ingu ene Iạ sarung mapakaěnsạ u hukumang si sire kere lěba. 11Israel nisědạ; i sie kinailangeng u pusakạ e su ěntanane, ual᷊ingu i sie mẹ̌tẹ̌tungkětị u makitul᷊ung su taumata kụ tuhụ hinone tawe makatul᷊ung i sie. 12Kai ual᷊ingu ene hakịu Iạ sarung mapakawinasan tau Israel, dingangu měmate tau Yehuda.
13Tau Israel dingangu tau Yehuda nakaěnna u kakakoạ i sire kawe ral᷊akisẹ̌, tangú Israel nakoạ sol᷊ong Asyur mědeạu mẹ̌dorong ontol᷊ẹ̌ bọu ratu mawantugẹ̌. Kaiso ratu ene tawe nakatul᷊ung arau napakapiang kakakoạ i sire. 14Mẹ̌sul᷊ungu singa něngalo, kerene Iạ e sarung měngalo tau Israel dingangu Yehuda. Iạ sẹ̌saku sarung měnggaghaghehẹ i sire bọu e Takụ itěntang. Kereu Iạ měnahěsẹ si sire pakapul᷊ẹ, tawẹ u sarang sěngkatau makapěllọ i sire.
15Umatẹ̌-Ku e sarung Takụ itěntang sarang i sire seng tumanịu masunsara ual᷊ingu kal᷊awọu rosan sire, bọu e ruměnta mẹ̌deạ si Siạ. Aramanung su ral᷊ungu sunsarane, i sire sarung mẹ̌tawakal᷊i mẹ̌sombang u Iạ.”
Currently Selected:
HOSEA 5: SXN
Highlight
Share
Copy
Want to have your highlights saved across all your devices? Sign up or sign in
