PĚNDARIADI 38
38
I Yehuda rẹ̌duang Tamar
1Itẹ̌takaserẹ̌ su tempo ene tangu i Yehuda e kai naněntang u manga tuhange ringangu tuarine kụ timapị nẹ̌tanạ dingang i Hira, tau esẹ bọu soang Adulam. 2Sene i Yehuda e nẹ̌dal᷊ahapịkon sěngkatau rariọ mahualang Kanaan anạ i Sua, kụ bọu ene i rẹ̌dua e němpẹ̌kawing. 3Anạ i rẹ̌dua i akange esẹ kụ kaghiang i amange nisěbạ e si Er. 4Anạ karuane mal᷊aing esẹ kụ nisěbạ e si Onan. 5Anạ katěllune e mal᷊aing esẹ kụ nisěbạ e si Syela. Su tempong i Syela kinawantelẹ̌ e i Yehuda kai natarang su Kezib.
6I Yehuda e napẹ̌kawing i Er anạ e i akang dingang i Tamar. 7Lulung Er tangu enẹ e karal᷊akise, hakịu Mawu e limangehẹ̌ kụ namate si sie. 8Bọu ene tangu i Yehuda e nẹ̌bera si Onan tuaring Er, ”Dakọ e sol᷊ong anum bal᷊ung tuhangu, kụ pẹ̌tikị e ringange. Kụ pěngganapẹ̌kong tundun sěntahipageng, u i kau e kawe tuaring kawinge; kụ ual᷊ingu ene tangu, tuhangu e wotongewe makahombang pal᷊ahite.” 9Kai i Onan kawe masingkạ u manga anạ e sarung tawe makoạ tataghuanenge. Kụ apạeweng darěduhe su ipage, měngkate iwẹ̌bala kal᷊aelehe su l᷊ikude winen taumata e tadeạu tuhange tawe makahombang pal᷊ahite. 10Kahian lulune kerene, tangu Mawu e limangehẹ̌, kụ Mawu e namate lai si i sie. 11Bọu ene nẹ̌berạ e i Yehuda si Tamar anạ e mirarating ene, ”Pẹ̌sul᷊e e su wal᷊eng gaghurangu, kụ pẹ̌tanạ e sene kere sěngkatau taumata wal᷊u, sarangkewe anạku i Syela e masaria.” I sie nẹ̌bera kerene ual᷊ingu i sie matakụ kibasị u i Syela e pateěng u Mawu lai, kere i rẹ̌dua tuhange. Tangú napul᷊ẹ e i Tamar sol᷊om bal᷊eng gaghurange.
12Pira ěllo samuring ene, kawingken Yehuda e kai nairị. Sarangke tempom pělal᷊utu e napal᷊use, i Yehuda němaringangken hapị e i Hira wọu Adulam ene, kụ nakoạ sol᷊ong Timna, tampạ u pěngangul᷊ukang dukụ u manga dombane. 13I Tamar nakahombang habarẹ̌ u i Yehuda i amange kinaratingange sarung duměnta sol᷊ong Timna mědeạu měngul᷊ụ dukụ u manga dombane. 14Tangú i sie něluạ e pakeange, pakeangkem bal᷊ue, kụ niawengangu pakeang bal᷊ine. Ghatine nitimbokongu tatimbuhung, kụ bọu ene naiangke i sie su pasěllangeng u soang Enaim, sural᷊eng makoạ sol᷊ong Timna. Kụ i Tamar e masingkạ-singkạ u i Syela, anạ i Yehuda e kahembokange, seng gẹ̌guwạ, kaiso i sie wědangbelain tawe nipẹ̌kẹ̌kawingu umbaseng ěndaị e.
15Ene, sarạeng i Yehuda nakasilo si Tamar, sunaunge katihọ e wawine ěndaị e kai wawine tahapẹ̌sundal᷊ẹ̌, batụu ghatine kawe mạtatimbuhung. 16Mase i Yehuda e nẹ̌tengkaranị e su wiwihu ral᷊eng ene, kụ nẹ̌bera, ”Kai pirạ e ghausangu e?” I sie wěga wue watụ u wawine ěndaị e kawe anạ e mirarating.
I Tamar simimbangu, ”Ene walạewe i Tuang.”
17Tangu i Yehuda e saụ něbera u, ”Iạ hědoeng mẹ̌gěllịu kambing kawuhuang sěmbaụ.”
Angkuěng i Tamar, ”Botonge wue, asal᷊u piạbe papaiange, sarạeweng i Tuang měndohong kambing ene.”
18”Kaia papaiange tangu?” i Yehuda nakiwal᷊o, sasimbang i Tamar, ”Gěllị e si siạ sinsing sasegelu e ringangu tal᷊ine, ringangu těking ěndaị su l᷊iman Tuange.” I Yehuda tangu nẹ̌gěllị e kal᷊awọu apal᷊iwụ ěndaị e si sie, kụ bọu ene i rẹ̌dua e nẹ̌tatambạ e kụ i Tamar tangu piạ e kapapia. 19I Tamar napul᷊ẹ e sol᷊om bal᷊ene kụ nělekese pedesẹ̌ tatimbuhung gatine, kụ bọu ene saụewe něluhengkem pakeange, pakeangkem bal᷊ue.
20Ta nararěnnạ wọu ene i Yehuda e rimolohʼi Hira, hapị e iapẹ̌něnondang kambing ene ringangu ipẹ̌ngẹ̌ngul᷊e kapia kal᷊awọu apal᷊iwụ nionggọ e kere papaiang kutẹu i Hira e sen ta nakapẹ̌sombang u tau wawine ene. 21I Hira e makịbal᷊o suapan taumata su Enaim, ”Měnsang suapa tahapẹ̌sundal᷊ẹ̌ nạung tiasa e měngẹ̌ngampal᷊ẹ̌ su wiwihu ral᷊eng ini e?”
”Tawẹ apa ghahị u wawine tahawuang ene sini e,” angkuewen sire e.
22Bọu ene nẹ̌sul᷊ẹ e i Hira e su anung Yehuda kụ nẹ̌bera, ”Iạ e tawe nakapẹ̌sombang u wawine ene. Tumuhụewe taumata sene e, tawẹ gahị u tahawuang ene e pai sene.”
23Angkuěng i Yehuda u, ”Walạekere apal᷊iwụ ene si sie, asal᷊eweng i kitẹ e tawe mamea. Iạ e seng nẹ̌tawakal᷊i mědeạu mamaehẹ̌, kaiso i kau e tawe nakareạ si sie.”
24Mangạe těllu wul᷊ang samuring ene e i Yehuda nakareạ habarẹ̌ u i Tamar anạ e mirarating e kawe nawuang, kụ kai seng matiang.
Tangú i Yehuda e nangoro, ”Sěbangke i sie kụ tutung sarang mate!”
25Ene piạ i Tamar lẹ̌ahakeng ipasěbang, i sie kai nakipaul᷊ị si amange kinaratingange ungkuěng, ”Iạ e kai natiang su tau esẹ taghuang u apal᷊iwụ ini e. Kụ sẹ̌suieko měnsang kai i sai taghuangu sinsing sasegelẹ̌ dingangu tal᷊ine ringangkewen těking ini e.”
26I Yehuda e nakakiral᷊ạ e apal᷊iwụ ene, kụ nẹ̌bera u, ”Bawine ěndaị e tawẹ sal᷊ane. Kai iạ e nẹ̌sal᷊a; batụu tuhụ hinone iạ e kai mapẹ̌kawing i sie ringangu anạku i Syela.” Kụ i Yehuda e selaing tawe saụ nẹ̌tatamba ringangi Tamar.
27Kutẹu nạung seng tempone i Tamar měhěndinge, kutẹu limětạ e nạung i sie kai mẹ̌tẹ̌tahasenggọ u anạ e hindua. 28Ene i sie kapẹ̌tẹ̌tahasenggọ e sěngkatau wọu rariọ hindua ene nangul᷊uheng limane, mase biang nangumbelẹ e l᷊imane ene kụ niikị e ringangu banaěng mahamụ. Angkuěnge, ”Rariọ ini e riměnta kal᷊amona.” 29Kutẹu rariọ e kai nangul᷊e limane, kụ dariọ sěmbaụ lai e riměnta kakal᷊imonaěnge. Bọu e biang nẹ̌bera u, ”O kai nạung kerene kakakoạ u manekehẹ̌ mědeạu suměbang.” Tangu rariọ kụ nạung diměnta kakal᷊imonaěnge ene e nisěbạ si Peres.#38:29: Peres: Areng ini su werang Ibrani e mangal᷊ene ”manekehẹ̌ mědeạu suměbang”. 30Bọu ene wuhụewe tuarine kụ l᷊imane piạ laikị e banang mahamụ e. Kụ i sie nisěbạ si Zerah.
Currently Selected:
PĚNDARIADI 38: SXN
Highlight
Share
Copy
Want to have your highlights saved across all your devices? Sign up or sign in
