PĚNDARIADI 39

I Yusup dingangu kawingʼi Potifar

1I Yusup seng niwawa sol᷊ong Misirẹ̌ kahian tau Ismael ene, dingangu niwal᷊ụ si Potifar, pěrwiran datu kụ diabatange kai těmbonangu měndal᷊ukadẹ̌ istana. 2#MMR. 7:9 Mawu e mẹ̌tẹ̌tul᷊ung i Yusup hakịu i sie měngkate sěntiniạ lẹ̌al᷊amateng su patikụ munarane. I sie mạtanạ su wal᷊em mawune, tau Misirẹ̌ ene. 3Mawune makạsilo u Mawu e mětul᷊ung i Yusup dingangu ual᷊ingu ene i Yusup lẹ̌al᷊amateng mapia su ral᷊ungu patikụ munarane. 4I Potifar měngkai mal᷊uasẹ̌ naunge si Yusup kụ něhengkẹ i sie nakoạ mẹ̌tatangkiang batangenge, kụ bọu ene i Yusup niruị e nakoạ sadaham bal᷊ene ringangu kal᷊awọu rarotonge. 5Nanětạ bọu tempo ene, ual᷊ingu i Yusup, tangú Mawu e něngal᷊amatẹ̌ kal᷊awọu ral᷊ohom bal᷊en tau Misirẹ̌ e ringangu patikụewe apan darotong i sire e, baewe apang su ral᷊ungu wal᷊e arau walạewe apang su waelẹ̌ e. 6Patikụ apạeweng tẹ̌taghuaneng i Potifar ilẹ̌umbalane si Yusup. Ual᷊ingu kerene tangu i Potifar, mangkewen tawẹ sěmpị e su urusangu ral᷊ungu wal᷊ene, sul᷊iung kětạeweng piạ pandungange su hal᷊ẹ̌ u kaěng kẹ̌kanengang.

I Yusup e měngkate apạe maholẹ kutẹu lai mal᷊epatẹ̌. 7Tawe nararěnnạ kawingʼi Potifar piạ naunge si Yusup, kụ bọu ene umbaseng ene e gẹ̌gighilang e mẹ̌tikị sěngkapẹ̌tikị. 8I Yusup tawe mapulu kụ nẹ̌bera si sie, ”Mẹ̌dorong ampung, iạ bawụ! I Tuang Potifar kai sen něnarakang u patikụ darotonge nasue niumbalane si siạ. I sie seng tawahal᷊uasʼu mẹ̌tiněnnang apa-apa lai su wal᷊e ini. 9Tawẹ u l᷊imembong kakawasane su wal᷊e ini wọu iạ e. Tawẹ u sarang sěmbaụ kụ tawe niumbalane si siạ tabeạu katewe i wawụ. Kụ kereapa wue iạ makapẹ̌koạ dal᷊akị ene kụ mẹ̌dosa l᷊umawang Mawu Ruata?” 10Manilaing kawingʼi Potifar meloke si Yusup apang kal᷊aěllo e, kai umbaseng ene e mang tawe mapulu mẹ̌tikị dingange.

11Su sahěllo piạ i Yusup kasuẹ̌ e sol᷊ong dal᷊ungu wal᷊e mẹ̌koạ hal᷊ẹ̌ e, tawẹ u sarang piạ u sěngkatau ěndaị e sene. 12Ene kawingʼi Potifar něhiude si Yusup sul᷊akụ e apidu nẹ̌bera u, ”Ěndaị e i kaduạ dumal᷊oka.” I Yusup měngkate nẹ̌kal᷊uwiwadẹ̌ dingangu nakapěllọ, mase timal᷊ang sol᷊ong likude, arawe lakụ e natěntang su l᷊imam bawine ene. 13Piạ e kawingʼi Potifar nakasilo u i Yusup kawe nakatal᷊ang, mase lakụ e kawe natěntang, 14tangú i sie kimui e manga ěllange kụ nẹ̌bera, ”Kakěllaiko kěnang! Tau Ibrani nạung niwawang kawingku su wal᷊e ini e, kai něhinakang si kitẹ. I sie simuẹ̌ su ral᷊ungu kamarẹ̌kụ kụ mapulu mẹ̌barạdosa si siạ, kai iạ e kai nẹ̌kiạ maihạ. 15Sarạeng i sie nakaringihẹ̌ kakiạku, i sie timal᷊ang sol᷊ong likude kụ lakụ e natěntang.”

16Bọu ene kawingʼi Potifar něndesọ u lakụ ene sarang kawinge nasongom bal᷊e. 17Su sasongong kawinge, i sie masahawụ neběkeng ene si sie, angkuěnge, ”Tau Ibrani nisuẹ̌ u ramahi e, simuẹ̌ su ral᷊ungu kamarẹ̌ kụ mẹ̌tingkaị si siạ. 18Kai sarang iạ nẹ̌kiạ e maihạ, tangu i sie timal᷊ang sol᷊ong likude kụ lakụ e natěntang.”

19I Potifar mangkeweng nisawelangu pědune. 20Kụ i sie nangoro tadeạu i Yusup lighạ pakịsamẹ kụ mase pakisuẹ̌ su ral᷊ungu tahungkụ, su piạ i sire nipakitahungkụ u ratu e. 21#MMR. 7:9 Tangú Mawu kasěllahenge měngkai rụděndingang si Yusup kụ mangkeweng kụkěndagẹ̌ si sie, hakịu těmbonangu tahungkụ e měngkai lụl᷊ahimpulun sie. 22Kụ i sie nanarakangkeng kěbị taumata mạtatahungkụ e si Yusup, kụ i Yusup tangu piněnarakanengkeng kěbị munara walạewe apang kẹ̌koateng su ral᷊ungu tahungkụ ene. 23Těmbonangu tahungkụ ene selaing tawe měnanahimata kal᷊awọu apạewen nisarakange si Yusup, batụu Mawu e mẹ̌tẹ̌tul᷊ung i sie hakịu i sie mangkeweng apạtendang su ral᷊ungu patikụ munarane.

Currently Selected:

PĚNDARIADI 39: SXN

Highlight

Copy