AMOS 5

Kakui tadeạu mětobatẹ̌

1Pẹ̌daringihẹ̌ko ei umatʼu Israel! Iạ hědo mẹ̌kantarịu kakantarị u ral᷊umpasiang u susa naung sěmbua waugʼi kamene:

2Israel seng nanawo i sie rem bědang parawang,

kụ i sie sen tawe saụ makapẹ̌bangung kapia!

Su wowong ěntanane hala, i sie niwala,

kụ tawẹu reng naontol᷊ẹ̌ si sie nipararisị.

3 Mawu Kasěllahenge něhengetang, ”Soa sěmbaụ su Israel napasěbangu sordado sěhiwu su kataune, arawe nẹ̌sul᷊e tumbạeng mahasụ; soa wal᷊ine napasěbang u mahasụ su kataune, kụ nẹ̌sul᷊e tumbạeweng mapul᷊o.”

4 Mawu e něhengetang su manga umatu Israel, ”Pẹ̌sul᷊ẹ e su anu-Ku, tangú i kamene sarungbe mẹ̌biahẹ̌. 5Kumbahang tamai sol᷊ong Bersyeba waugu mẹ̌tahamawu. Kumbahang mẹ̌deạ si Siạ su Betel, u Betel kai sarung matadise. Abe lai kakoạ sol᷊ong Gilgal, u tumanạu soa ene sarung hengketang sol᷊ong pinamembangeng.”

6Pẹ̌sul᷊ẹ e su anum Mawu, tangú i kamene sarung mẹ̌biahẹ̌. Kereu i kamene tawe měmpẹ̌sul᷊e su anun Sie, i Sie sarung duměnta kere putung mẹ̌dẹ̌darakị dingangu měnutung tau Israel pakasue. Su Betel tawẹ u sarang sěngkatau makasěbu putung ene. 7Kạěngkěhang i kamene, i kamene apang měmpạngal᷊intuing kaadilẹ̌ dingangu lụl᷊ia tataghuaneng u taumata!

8 # Ayb. 9:9, 38:31 Mawu e nẹ̌koạ manga wituing su winangaeng –

wituing Katělluang dingangu wituing Pahi.

I Sie měmẹ̌mal᷊ui kararěndung makoạ tualagẹ̌ dingangu ěllo makoạ hěbi;

akẹ u sasị sẹ̌sěbohangʼE surul᷊unge.

Mẹ̌kakoạ kěbị ene tangú arengʼE kawe Mawu.

9I Sie mạminasa taumata kawasa ringangu wal᷊oarị i sire.

10I kamene mạběnsing u taumata kụ dụdokạ tạ kaadile ringangu apang měmpẹ̌bẹ̌bisarang katul᷊idẹ̌ su ral᷊ungu kạadilẹ̌. 11I kamene měnẹ̌nědạ taumata kasiang dingangu gandung i sire lẹ̌hampaseng i kamene. Ual᷊ingu ene i kamene sarung tawe matanạ su manga wal᷊eng kamene maral᷊ěnggihẹ̌, kụ seng nipětị i kamene ene. I kamene tawe sarung měnginung anggorẹ̌ bọu manga waelu anggorẹ̌ nạung nisuang i kamene. 12Iạ e masingkạ u enẹ e kasariane karal᷊akisu ringangu apạe kal᷊awọe rosanu. I kamene němpěnědạ taumata mapapia; i kamene němpěnarimạ u sasorokẹ̌ dingangu němalan tau kasiang nikoạ tạ kaadile su pěnggaghutaěng. 13Ual᷊ingu kakanoạu ene, tangu kal᷊awọu taumata apang pelesa makạpěndang u mạpiaěngbe marěmasẹ̌ su tempong karal᷊akisẹ̌ kerene.

14Pẹ̌tawakal᷊iko pẹ̌koạ mapia ringangu kumbahang mẹ̌koạ dal᷊akisẹ̌, tadeạu i kamene mẹ̌biahẹ̌. Tangu Mawu Limembong Kawasa e sarung kahěnga-hěngang matanạ su tal᷊oarang kamene kere iwẹ̌berang kamene. 15Kawěnsingken dal᷊akisẹ̌, karalọkoʼm mapia ringangu pẹ̌disịkong kạadilẹ̌. Kiwuạu Mawu e sarung kuměndagu taumata apan nal᷊ěmbe wọu tau Israel.

16 Mawu Limembong Kawasa e něhengetang, ”Su manga ral᷊engu soa, taumata e sarung mẹ̌kẹ̌kiạ dingangu lụlungkangu susa naung. Sarang manga mělahěnsinuang sarung kuiang mědeạu apasangị sěngkasangị dingangu taumata kụ bẹ̌baehang mědeạu lumungkangu tau nate. 17Su patikụ baelu anggorẹ̌ e taumata sarung mahungkiạ u Iạ diměnta ringangu měhukungu i kamene. Iạ e kai Mawu, kụ seng něhengetang.”

18Mambeng kạěngkěhang i kamene kụ mẹ̌kẹ̌karalọ u ěllong Mawu! Apa wue gunane ěllo ene si kamene? Ěllo ene kětạeng nakoạ kere ěllo kụ marěndung, bal᷊inewe ěllo kụ matualagẹ̌ si kamene. 19Kakakoạ e ute mẹ̌sul᷊ungu taumata kụ timal᷊angu watangenge wọu singa, kutẹu kawe nẹ̌sombangu běruang. Arau kere taumata kụ napul᷊ẹ sol᷊ong bal᷊e kụ nẹ̌tiningkondọu l᷊imane su meselẹ̌, kụ bọu ene nikikiʼn těmpu! 20Ělloʼm Mawu mambeng makạkaděntang kararěndung, bal᷊inewe tualagẹ̌ – ěllo e mal᷊uẹ̌ kụ masunaubẹ̌.

21 # Yes. 1:11-14 Mawu e něhengetang, ”Iạ e mạběnsing dingangu seng masahe makasilo tundung pěngangagamang kamene. 22Kamagengu i kamene mẹ̌bawa sasěmba tẹ̌tutungang dingangu sasěmba gandung, Iạ e tawe měnarimạ u ene. Iạ mạdiri měnarimạ u manga binatang i kamene matatawa ene kụ isẹ̌sěmbang kamene si Siạ kere sasěmbang pẹ̌darame. 23Ědọ e kal᷊awọu kakantarị i kamene makạsěmbeng ene; Iạ madiri rumaringihẹ̌ tingihu kobị u kěcapinu. 24Mạěndokangbe pẹ̌tawakal᷊i tadeạu kạadilẹ̌ melehẹ̌ kere akẹ, dingangu katul᷊idẹ̌ e mẹ̌sul᷊ungu sal᷊ụ kụ tawẹ maral᷊ẹ̌sa.

25 # MMR. 7:42-43 Ei umatʼu Israelẹ̌, su tempong Iạ něngahạ i kamene limiu ngara l᷊inggi ěpạ u pul᷊o su taunge karěngụ e, Iạ e tawe něnuntụ sasěmba ringangu ghaghěllị bọʼi kamene. 26Arawe orasẹ̌ ini e i kamene kawe mạněmba si Sakut ikẹ̌koạ datung kamene e, ringangu i Kewan, kere wituing sẹ̌subaěng i kamene. Ual᷊ingu ene manga tul᷊ada kụ nikoạ i kamene ene, harusẹ̌ hengkẹ i kamene hala. 27Su tempong Iạ měnděmmẹ i kamene sarang banua sěmbaụ kụ limembong karaune wọu Damsyik. Iạ e kai Mawu Ruata Limembong Kawasa e seng něhengetang.”

Currently Selected:

AMOS 5: SXN

Highlight

Copy