AMOS 6

Israel nagholang

1Kạěngkěhang i kamene apaʼm mẹ̌bẹ̌biahẹ̌ masědapẹ̌ su Sion, dingangu i kamene kụ makạpěndang mal᷊enehẹ̌ su Samaria e – i kamene apan těmbonangu kawanuang Israelẹ̌ mapapiane ini, i kamene nạung tundune rẹ̌děntaěng u kawanua pẹ̌darorongang tul᷊umang. 2Dakọko pandai su Kalne, bọu ene ral᷊engko tiniạ sol᷊ong soang Hamat kụ masaria ene, bọu ene kakoạ sol᷊ong soang Gat su Pilistin. Katihokangu manga soa ene kawe limembong kapiane wọu kararatuangu Yehuda ringangu Israel? Lẹ̌ěnnaěng banuan sire limembong kạguwạe wọu wanuang kamene tangu? 3I kamene kawe rụdendehu ěllong kawawinasa e reng bědang marěngụ, arawe kakanoạ i kamene kětạembeng mạpakarol᷊ạ u rarěntang ěllo makạtatakụ ene.

4Kạěngkěhang i kamene kụ dụdal᷊oka su wowong katatikilang maral᷊ěnggihẹ̌ e ringangu měmpẹ̌sẹ̌sal᷊iwang u ghěsin sapi ringangu domba kawuhuang! 5I kamene makakěhagẹ̌ mělanging kakantarị, kere nạung kẹ̌koateng i Daud, kụ kẹ̌kantarikang i kamene ringangu kapěnẹ̌nalange kěcapi. 6I kamene mạnginung anggorẹ̌ su galasẹ̌ lohone mạpenẹ, dingangu mẹ̌pẹ̌pakẹ u l᷊ana kawěngiange, kaiso i kamene tawe masasusang Israelẹ̌ e mawinasa. 7Ual᷊ingu ene seng i kamene humotong-motong sarung ihengkẹ sol᷊ong pěmamembangeng. Kal᷊awọu sal᷊imbang dingangu manga pẹ̌sasasimokol᷊i kamene e sarungbe masue.

8Kụ dingangu mahatedẹ̌ Mawu Limembong Kasěllahenge ringangu Limembong Karangetange seng něgěllịu laingate kere ini, ”Iạ e mạběnsingu obotu tau Israel; Iạ e tawẹ karal᷊uase su istanan sire mạhěmpal᷊iung kal᷊ěnggihe. Niupunangu soaʼn sire ringangkewelain sire kěbị su ral᷊unge Takụbe sarung isarakang su sědụ.”

9Mạeng u wědang piạ u mapul᷊ong katau kụ mẹ̌kẹ̌kěmbuni su ral᷊ungu wal᷊e sěmbaụ, i sire sarungbe lai mate. 10Sěngkatau ral᷊ohong bal᷊e hal᷊ẹ̌ e mẹ̌tẹ̌tangkuang pěndal᷊ẹ̌bingange, sarung duměnta kụ maněbangu maietu anạ u sěngkataune. I sie sarung mẹ̌kui taumata su l᷊ikudu wal᷊e ene, ”Měnsang bědangbe piạ u wiahẹ̌ su l᷊ikudʼi kau?”

Tangú sarung karingihẹ̌ sasimbahe, ”Tala!”

Dal᷊ohong balagẹ̌ kụ hal᷊ẹ̌ e mělẹ̌lěbing u maietẹ̌ ene e sarung mẹ̌bera, ”Kumbahang delaing mẹ̌bisara! I kitẹ tawe wotonge mẹ̌sẹ̌bạ arengu Mawu.”

11Kereu Mawu měngonggọu parenta, apam bal᷊e ghaghuwạ arau lai rarodọ e sarung ipakagholang. 12Botonge kawal᷊o makatal᷊ang su wul᷊ude watu? Botonge tahapěhampasẹ̌ su l᷊audẹ̌ kụ sumake sapi? Arawe i kamene kawe seng němal᷊intuị kạadilẹ̌ e nakoạ doti makapate, ringangu apang kahěngange nakoạ nẹ̌sal᷊a.

13I kamene lụl᷊awitị u i kamene seng nakawatạ Lodebar.#6:13: Lodebar: Areng ini daringihang kere werang Ibrani kụ mangal᷊ene ”tawẹ manga apa-apa”. I kamene mal᷊aing naul᷊ị u, ”I kami e mambeng matoghasẹ̌ kahěngang mědeạu makapul᷊aho Karnaim.”#6:13: Karnaim: Arengu soa kadodọ ini mangal᷊ene ”sunge,” sěmbaụ tatialang katoghasẹ̌.

14 Mawu Kasěllahenge ore Limembong Kawasa e hala něhengetang, ”Umatu Israel, Iạ e sarung měndingọ u sordado wọu wansa wal᷊ine ipěngalo wanuanu. I sire sarung měmpěnědạ si kamene wọu ral᷊eng sol᷊ong Hamat sěmběkan sawěnahẹ̌ sarang Ngaran Araba su sěmběkan timuhẹ̌.”

Currently Selected:

AMOS 6: SXN

Highlight

Copy