ZABUR 44
44
Do'e nunas perlindungan
1Umaq pemimpin kor. Zabur kaum Korah. Nyanyian pengajahan.
2Ya Allah, kaji pade sampun dengah mésaq
kisah saq teceriteang siq leluhur kaji pade
mengenai karye saq sampun Deside laksaneang
léq jaman laéq.
3Deside mésaq saq sediq bangse-bangse
adéq umat Deside ndot léq negeri ie pade.
Bangse-bangse lain Deside celakeang,
laguq umat Deside, Deside menengang bejari.
4Tanaq nike nénten ie pade rebut siq kléwang;
nénten siq kekuatanne mésaq ie pade menang,
laguq siq kuase dait cahaye hadirat Deside,
séngaq Deside suke léq umat Deside.
5Deside Raje kaji dait Allah kaji,
saq ngicanin kemenangan tipaq umat Deside.
6Siq kuase Deside kaji pade kalahang musuh kaji pade,
dait naklukang dengan-dengan saq nyerang kaji pade.
7Séngaq kaji nénten ngandelang panaq kaji,
kléwang kaji éndah nénten gen nyelametang kaji.
8Laguq Deside saq nyelametang kaji pade léman musuh,
dait ngalahang dengan-dengan saq meriq léq kaji pade.
9Make kaji pade gen tetep mulieang Deside,
dait nénten araq tutuqne besyukur léq Deside.
10Laguq mangkin Deside bilin kaji pade
dait menengang kaji pade tekalahang.
Deside nénten malik maju bareng tentere kaji pade.
11Deside menengang kaji pade pelaiqang diriq léman musuh kaji pade,
dait ie pade ngerampas dowé bande kaji pade.
12Deside menengang kaji pade tesembeléh maraq dombe,
dait Deside kelin kaji pade sopoq kance saq lain léq antare bangse-bangse.
13Deside jual umat Deside nénten araq ajine,
dait nénten mauq bati napi-napi.
14Deside jariang kaji pade oloqan tetangge-tetangge,
ie pade ngoloq-oloq dait ngeréréqang kaji pade.
15Deside jariang kaji pade sindiran bangse-bangse;
ie pade ngintek léq kaji pade sambil menghine kaji pade.
16Sejeloan kaji tecele,
nanggung ilaq dait teperilaq,
17lantaran dengah oloqan dait penghinean
léman biwih musuh dait dengan saq dendem.
18Selapuq nike sampun nimpe kaji pade
timaq kaji pade nénten ngelupaqang Deside
atao behianat léq perjanjian Deside kance kaji pade.
19Atén kaji pade nénten nilas Deside;
préntah Deside nénten kaji pade lupaqang.
20Laguq Deside bilin kaji pade léq dalem peteng;
kaji pade lemah léq antare binatang buas.
21Seandéne tiang pade engkah nyembah Allah tiang pade,
dait bedo'e tipaq déwe lain,
22segerah Allah nénten wikan hal nike?
Séngaq Ie wikanang rahasie atén tiang pade.
23 #
Rm. 8:36
Demi Deside kaji pade terus teancem siq maut,
dait teperlakuang maraq dombe saq gen tesembeléh.
24Silaq bangkit, ya Junjungan Saq Mulie! Kembéq Deside meneng?
Bangkit! Sampunang nolaq kaji pade selaéq-laéqne.
25Kembéq Deside nyeboq,
dait ngelupaqang sengsare dait kesusahan kaji pade?
26Kaji pade geriq lebur léq tanaq,
tindoq léq kerepuk lantaran kalah.
27Bangkit dait rauh nulung kaji pade,
selametang kaji pade lantaran kasih Deside.
Currently Selected:
ZABUR 44: LAISAS
Highlight
Share
Copy
Want to have your highlights saved across all your devices? Sign up or sign in
