ZABUR 45
45
Nyanyian léq gawé nikah raje
1Umaq pemimpin kor. Zabur kaum Korah. Nyanyian kasih. Menurut lagu: Kembang bakung.
2Ucapan-ucapan saq solah sugul léman atén tiang,
tiang ngaturang lagu tiang tipaq raje.
Maraq ucapan sopoq pujangge saq mahir,
élaq tiang siep ngucapang syair.
3Pelungguh saq paling gagah léq antare manusie,
ucapan-ucapan pelungguh penoq siq hal saq solah,
keranaq nike pelungguh teberkahin siq Allah
selaéq-laéqne.
4Taliq kléwangde léq kéng, hai raje perkase,
léq dalem keagungan dait kemuliean pelungguh!
5Maju siq gagah tipaq kejayean
bejuang demi kebenaran dait keadilan;
siq kekuatan pelungguh rebut kemenangan saq beléq!
6Panaq pelungguh saq tajep nembus jantung musuh pelungguh,
bangse-bangse geriq léq bawaq cokor pelungguh.
7 #
Ibr. 1:8-9
Allah ngicanin pelungguh kuase jari mréntah,
kuase pelungguh tahen selaéq-laéqne;
siq adil pelungguh mréntah rakyat pelungguh.
8Pelungguh suke léq keadilan dait meriq saq jahat;
Nike lantaranne Allah, Allah pelungguh, sampun miléq pelungguh,
dait miaq pelungguh bahagiean léman raje-raje saq lainne.
9Kuace pelungguh sengéh siq mur, garu dait cendane;
pemaén musik léq istane gading miaq pelungguh seneng.
10Léq antare dayang-dayang istane
araq putri-putri raje.
Léq kanan tahte nganjeng permaésuri
kadu periasan léman emas tulén.
11Hai Putri, pirengang ucapan-ucapan tiang,
lupaqang bangse dait kaum kerabatde.
12Keingesande mikat angen raje,
ie tuande, pade sujut léq ie.
13Penduduk Tirus jauqang pelungguh persembahan;
dengan sugih berusahe mikat angen pelungguh.
14Putri raje tame penoq kemuliean,
kelambine besulam emas.
15Siq kelambi saq bewarne-warne ie tearak ojok raje,
teiring siq dedare-dedare, batur-baturne,
ie pade éndah tejauq ngadep raje.
16Ie pade besurak-surak siq senengne
waktu teatong tame ojok dalem istane raje!
17Pelungguh, raje tiang, gen mauq luwéq bije
jari mréntah léq tahte leluhur pelungguh.
Ie pade gen pelungguh jariang penguase
léq seantéro gumi.
18Siq lagu niki tiang jariang pelungguh kesohor turun-temurun;
bangse-bangse gen memuji pelungguh selaéq-laéqne.
Currently Selected:
ZABUR 45: LAISAS
Highlight
Share
Copy
Want to have your highlights saved across all your devices? Sign up or sign in
