ZABUR 37
37
Nasib dengan jahat dait dengan solah
1LĂ©man Daud.
Ndaq sili lantaran dengan jahat,
ndaq talon até léq dengan saq gawéq salaq.
2SĂ©ngaq ie pade becat telang maraq pupaq,
dait layu maraq tetaletan saq ijo.
3Pade percaye léq ALLAH, dait gawéq saq solah,
ndot léq negeri nike dait pade setie.
4Boyaq kebahagieande léq ALLAH,
Ie gen ngicanin side napi saq jari keméléq aténde.
5Serahang idupde léq ALLAH,
percaye léq Ie, Ie gen nulung side.
6Ie gen nyatayang kesetieande maraq jelo,
dait ketulusande maraq terang léq waktu tengari.
7Pade antos ALLAH siq até saq tenang,
dait sabar ngantos Ie.
Ndaq sili lantaran dengan saq berhasil idupne,
atao saq gawéq tipu muslihat.
8Ndaq sili dait gedek,
nike cume datengang celake.
9Séngaq dengan saq gawéq jahat gen temusnahang,
laguq saq beharep léq ALLAH gen ngewarisin negeri.
10Dengan jahat gen becat musnah,
lamun teboyaq, ie sampun ndéq araq.
11 #
Mat. 5:5
Dengan saq rendah até gen ngewarisin negeri,
dait nikmatin kemakmuran saq belimpah.
12Dengan jahat ngerencaneang saq jahat tipaq dengan saq solah,
dait meriq lamun serioq ie.
13Laguq Junjungan Saq Mulie ngeréréqang dengan jahat,
séngaq Ie wikan bahwe penutuq dengan nike sampun rapet.
14Dengan jahat nyerét kléwang dait papahang panaqne
jari nyematéq dengan miskin dait sengsare,
jari nyematéq dengan saq idup solah.
15Laguq dengan jahat jaqne tegalah siq kléwangne mésaq,
busur ie pade gen tepolakang.
16Barang saq sekediq saq teépéang siq dengan saq solah
solahan ketimbang barang saq belimpah-limpah léq dengan jahat.
17SĂ©ngaq kuase dengan jahat gen tepolakang siq ALLAH,
laguq dengan solah Ie lindungin.
18 ALLAH jagaq idup dengan saq soléh,
dowé pusake ie pade tetep selaéq-laéqne.
19Léq waktu kesusahan ie pade ndéq gen menderite,
léq waktu kelapahan ie pade ndéq gen kekurangan.
20Laguq dengan jahat gen binase,
musuh ALLAH gen telang maraq kembang léq lendang pupaq,
ie pade gen telang maraq pendet.
21Dengan jahat nyinggaq dait ndéq nulakang,
laguq dengan solah ngebéng secare murah até.
22Dengan saq teberkahin siq ALLAH gen ngewarisin negeri,
laguq dengan saq Ie kutuk gen tesediq.
23 ALLAH bimbing dengan léq langan saq harus ie tempuh,
Ie neguqang dengan saq idupne nyenengang Ie.
24Lamun geriq, ie ndéq gen babak belur,
séngaq ALLAH negel imene.
25LĂ©man tiang bajang jangke toaq,
ndéq uwah tiang serioq dengan saq idupne soléh tebilin siq ALLAH,
atao anak baine jari tukang pekir.
26Ie tetep mesinggaqang dait ngebéng,
anak-anakne jari berkah.
27Bilin saq jahat, gawéq saq solah,
make side gen tetep ndot léq negeri nike selaéq-laéqne.
28SĂ©ngaq ALLAH suke perbuatan saq solah dait adil,
dengan saq setie léq Ie nénten Ie menengang kesie-sie.
Ie ngelindungin ie pade jangke selaéq-laéqne,
laguq keturunan dengan jahat gen temusnahang.
29Dengan soléh gen ngewarisin negeri,
dait ndot léq derike selaéq-laéqne.
30Dengan saq solah ngeraos secare bijaksane,
ie tetep lomboq léq ucapan-ucapanne.
31Préntah Tuhane tesimpen léq dalem aténe,
ie ndéq nyimpang léman hukum nike.
32Dengan solah teinté siq dengan jahat
saq boyaq kesempatan jari nyematéq ie.
33Laguq ALLAH nénten nyerahang ie tipaq musuh,
atao tehukum sewaktu teadilin.
34Pade beharep léq ALLAH dait taat léq préntah-Ne,
make Ie ngangkat side jari ngewarisin negeri;
side gen serioq dengan jahat temusnahang.
35Tiang sampun serioq dengan jahat saq sombong;
ie maraq lolo saq seger dait akahne dalem.
36Waktu tiang liwat, ie ndéq araq malik,
tiang boyaq ie, laguq ndéq tiang ndait.
37Perhatiang dengan saq solah dait saq tulus até;
dengan saq suke damé bedowé mase depan.
38Laguq dengan bedose gen tebinaseang;
keturunan ie pade gen temusnahang.
39 ALLAH nyelametang dengan soléh,
dait ngelindungin ie pade sewaktu kebucuq.
40Ie nulung dait nyelametang ie pade,
dait luputang ie pade léman dengan-dengan jahat,
séngaq ie pade berlindung léq Ie.
Currently Selected:
ZABUR 37: LAISAS
Highlight
Share
Copy
Want to have your highlights saved across all your devices? Sign up or sign in
