ZABUR 38
38
Do'e léq waktu susah
1Zabur Daud waktu ngaturang kurban peringetan.
2Ya ALLAH, sampunang ngukum kaji léq dalem kemenggahan Deside,
sampunang nyiksaq kaji léq dalem murke Deside.
3Panaq Deside nembus miaq awak kaji bakat,
gading Deside beridap berat ngendet kaji.
4Kaji sakit parah lantaran kemenggahan Deside;
nénten araq saq séhat léq awak kaji lantaran dose kaji.
5Kaji ketelep léq dalem kesalaqan kaji saq dateng maraq belabur,
dose kaji berat gati idapne.
6Bakat-bakat léq awak kaji benanaq dait ambune bais,
lantaran kaji sampun jari bodo gati.
7Kaji nunduk dait bungkuk,
sejeloan kaji bedukecite dait sedih.
8Awak kaji telih panas,
nénten araq saq séhat léq awak kaji.
9Kaji remuk dait bis balung,
kaji ngereng séngaq angen kaji susah.
10Junjungan kaji Saq Mulie, Deside wikan selapuq keméléq kaji,
keluhan kaji nénten araq saq teseboq léman Deside.
11Jantung kaji bentek-ntek, balung kaji telang,
maten kaji sampun jari rundam.
12Sahabat-sahabat kaji dait batur-batur kaji sampun nyedi lantaran penyakit kaji,
malahan semeton-semeton kaji sampun bilin kaji.
13Dengan saq melét nyematéq kaji masangang kaji set;
saq melét nyelakeang kaji ngancem gen binaseang kaji.
14Laguq kaji maraq dengan kedok saq nénten dedengah,
maraq dengan pakoq saq nénten ngeraos.
15Tetu, kaji maraq dengan saq nénten dedengah,
dait lantaran nike kaji nénten ngelawan.
16Laguq kaji beharep léq Deside, ya ALLAH,
Deside Junjungan kaji, Allah kaji, jawab kaji.
17Sampunang menengang musuh kaji demen serioq kesusahan kaji,
sampunang menengang ie pade nyombongang diriqne lamun kaji bimbang.
18Kaji aroh geriq,
terus-terusan kaji kesakitan.
19Kaji ngaku dose-dose kaji;
angen kaji kuatir mikirang kesalaqan kaji.
20Dengan-dengan saq ngemusuhin kaji luwéq dait kuat,
ndéq araq alasan ie pade meriq serioq kaji.
21Dengan saq bales kesolahan siq kejahatan musuhin kaji,
séngaq kaji gawéq saq solah.
22Ya ALLAH, sampunang bilin kaji,
sampunang jaoq léman kaji, ya Allah kaji.
23Gelis rauh nulung kaji,
ya Junjungan kaji Saq Mulie, penyelamet kaji.
Currently Selected:
ZABUR 38: LAISAS
Highlight
Share
Copy
Want to have your highlights saved across all your devices? Sign up or sign in
