ZABUR 36
36
Kejahatan manusie dait kesetiean ALLAH
1Umaq pemimpin kor. Léman Daud, hambe ALLAH.
Kejahatan manusie
2 #
Rm. 3:18
Dose ngeraos léq atén dengan jahat, saq paling dalem,
rase takut léq Allah tetu-tetu ndéq araq léq dengan nike.
3Ie ngajum diriqne,
jangke kesalaqanne tedait siq dengan,
dait meriq léq ie.
4Ucapan-ucapanne jahat dait penoq siq tipu muslihat,
ie ndéq malik gawéq saq solah dait bijaksane.
5Léq petindoqanne ie ngerencaneang kejahatan;
perbuatanne ndéq araq saq solah,
saq jahat ndéq ie tolaq.
Kesetiean ALLAH
6Ya ALLAH, kasih Deside atasne maraq langit,
dait kesetiean Deside jangke dateng awan.
7Kesolahan Deside tinggang maraq gunung,
dait keadilan Deside dalem maraq segare saq galuh;
manusie dait héwan Deside peliharaq, ya ALLAH.
8Tetu-tetu beraji, kasih Deside, ya Allah,
manusie berlindung léq bawaq keléték Deside.
9Ie pade puas siq keloran saq limpah léq Gedéng Deside,
siq ineman léman kokoq Deside saq nyegerang.
10Deside sumber idup selapuq mahluk,
léq dalem terang Deside, kaji pade serioq terang.
11Semoge Deside tetep ngasihin dengan saq kenal kance Deside,
dait adil tipaq dengan saq tulus até.
12Sampunang menengang kaji teserang siq dengan sombong,
atao tetundung siq dengan jahat.
13Cingakin, dengan saq gawéq kejahatan sampun geriq,
ie pade tetimplak dait ndéq iniq ures malik.
Currently Selected:
ZABUR 36: LAISAS
Highlight
Share
Copy
Want to have your highlights saved across all your devices? Sign up or sign in
