ZABUR 27
27
Do'e pujian
1Zabur Daud.
ALLAH nike cahaye tiang dait keselametan tiang,
ndéq araq saq tiang takutang.
ALLAH nike bénténg perlindungan tiang,
sai saq gen tiang takutang.
2Lamun tiang teserang siq penjahat saq mélé nyematéq tiang,
ie pade saq kedampes dait geriq.
3Timaq tiang tekepung siq pasukan saq luweq,
tiang ndéq gen takut.
Timaq araq perang ngelawan tiang,
tiang tetep beharep.
4Sopoq hal saq sampun tiang tunas léq ALLAH,
cume nike saq tiang melétang:
Ndot léq Gedéng ALLAH seumur idup tiang,
jari ngeraseang kesolahan ALLAH
dait nunas bimbingan-Ne.
5 ALLAH ngelindungin tiang sewaktu kebucuq;
Ie seboq tiang léq dalem Gedéng-Ne,
dait ngangkat tiang ojok atas gunung batu.
6Mangkin tiang menang léman musuh léq sekelining tiang;
make siq surakan cemoh tiang
ngaturang kurban syukur léq Gedéng ALLAH;
tiang mélé benyanyi dait memuji ALLAH.
7Ya ALLAH, pirengang kaji lamun kaji bekuih tipaq Deside,
periakang kaji dait jawab kaji!
8Deside bemanik, “Dateng sembah Tiang.”
Kaji bejawab, “Kaji aru parek, ya ALLAH ;
9sampunang nyeboq léman kaji.”
Sampunang murke dait nolaq hambe Deside,
séngaq Deside saq sampun nulung kaji.
Sampunang tetéh atao bilin kaji,
ya Allah, penyelamet kaji.
10Timaq kaji tebilin siq inaq amaq kaji,
ALLAH gen meliharaq kaji.
11Nyatayang tipaq kaji pekayunan Deside, ya ALLAH,
bimbing kaji léq langan saq lomboq,
séngaq musuh kaji luwéq gati.
12Sampunang nyerahang kaji tipaq napsu musuh kaji,
saq nyerang kaji siq duste dait anceman.
13Tiang yakin gen ngalamin kesolahan ALLAH
dalem idup tiang dunie niki.
14Pade beharep léq ALLAH,
kuatang dait teguqang aténde;
pade beharep léq ALLAH!
Currently Selected:
ZABUR 27: LAISAS
Highlight
Share
Copy
Want to have your highlights saved across all your devices? Sign up or sign in
