ZABUR 26
26
Do'e dengan saq nénten salaq
1Zabur Daud.
Icanin keadilan tipaq kaji, ya ALLAH,
séngaq kaji idup siq até saq tulus.
Kaji beharep léq ALLAH,
dait sekediq juaq nénten ragu.
2Uji kaji, ya ALLAH, dait cobe kaji,
selidik batin dait atén kaji.
3Kaji tetep inget léq kasih Deside,
dait tetep setie léq Deside.
4Kaji nénten suke bekumpul kance penipu,
atao bebatur kance dengan munapik.
5Kaji meriq kumpulan dengan saq jahat,
dengan-dengan jahat kaji jaoqin.
6Kaji bisoq imen kaji tande nénten salaq,
dait lampaq ngiterin méje taoq kurban Deside, ya ALLAH,
7sambil nyanyiang lagu syukur,
dait beriteang perbuatan Deside saq ajaip.
8Kaji suke Gedéng Deside, ya ALLAH,
taoq Deside meneng siq penoq keagungan.
9Sampunang nyematéq kaji bareng kance dengan bedose,
atao ngembot nyawe kaji bareng kance tukang nyematéq.
10Ie pade terus-terusan gawéq jahat,
dait tetep siep nerimaq sogoqan.
11Laguq kaji idup siq tulus até,
periakang dait bébasang kaji.
12Tiang aman léman selapuq bahaye,
tiang gen memuji ALLAH léq dalem jemaah.
Currently Selected:
ZABUR 26: LAISAS
Highlight
Share
Copy
Want to have your highlights saved across all your devices? Sign up or sign in
