ZABUR 25
25
Do'e nunas bimbingan dait perlindungan
1Zabur Daud.
Tipaq Deside, ya ALLAH, kaji sampéang do'e kaji,
2ya Allah kaji, kaji percaye léq Deside!
Sampunang menengang kaji teperilaq,
dait tesurak siq musuh-musuh kaji.
3Dengan saq behianat léq Deside gen teperilaq,
laguq saq percaye léq Deside nénten gen tekecéweang.
4Nyatayang tipaq kaji pekayunan Deside, ya ALLAH,
nyatayang napi saq harus kaji laksaneang.
5Ajah dait bimbing kaji
adéq kaji idup menurut pekayunan Deside,
séngaq Deside Allah saq nyelametang kaji,
kaji tetep beharep léq Deside.
6Iling léq kesolahan dait kasih Deside, ya ALLAH,
saq Deside nyatayang léman jaman laéq.
7Ampunin dose dait kesalaqan kaji léq waktu kaji masih bajang,
iling léq kaji sesuai kance kasih dait kesolahan Deside.
8Séngaq ALLAH solah dait adil,
Ie petitoqang langan tipaq dengan saq sesat.
9 ALLAH bimbing dengan saq rendah até,
dait ngajahang pekayunan-Ne léq ie pade.
10Dengan saq taat léq perjanjian dait hukum-Ne,
Ie perlakuang siq kasih dait setie.
11Ya ALLAH, ampunin kaji sesuai kance janji Deside,
séngaq kesalaqan kaji beléq.
12 ALLAH nyatayang tipaq dengan saq takut léq Ie
langan saq harus ie pade piléq.
13Ie pade gen tetep idup makmur,
anak bai ie pade gen ngewarisin tanaq pusake.
14 ALLAH nike sahabat dengan saq takut léq Ie,
Ie nyatayang maksut-Ne léq ie pade.
15Maten tiang tetep tetujuang ojok ALLAH,
séngaq Ie nyelametang tiang léman bahaye.
16Perhatiang kaji, dait periakang kaji,
séngaq kaji kesepian dait sengsare.
17Kesusahan atén kaji sayan beromboq
bébasang kaji léman kesulitan kaji.
18Perhatiang sengsare dait kesulitan kaji,
dait ampunin selapuq dose kaji.
19Cingakin luwéq gati musuh kaji;
ie pade meriq gati léq kaji.
20Jagaq dait selametang kaji,
adéq kaji nénten ilaq,
séngaq kaji berlindung léq Deside.
21Semoge kesolahan dait kejujuran ngawal kaji,
séngaq kaji beharep léq Deside.
22Ya Allah, bébasang dengan Israel
léman selapuq kesulitanne.
Currently Selected:
ZABUR 25: LAISAS
Highlight
Share
Copy
Want to have your highlights saved across all your devices? Sign up or sign in
