MARKUS 6

Deside Isa tetolaq léq Nazaret

(Mat. 13:53-58; Luk. 4:16-30)

1Beterus Deside Isa berangkat léman derike dait rauh léq kampung asal-Ne, teiring siq pengiring-pengiring-Ne. 2Léq jelo Sabat Ie mulai ngajahang léq balé ibadah. Araq luwéq dengan léq derike. Waktu dengan-dengan nike dengah pengajahan Deside Isa, ie pade bengaq gati. Ie pade bebase, “Léman mbé dengan niki mauq selapuq nike? Hikmat macem napi saq araq léq Ie? Berembé Ie bau piaq muqjizat saq maraq nike? 3Tekan Ie niki tukang kayuq, bije Mariam, dait sanakne Yakub, Yoses, Yudas dait Simon? Sanak-sanak-Ne saq nine éndah araq ndot léq deriki.” Keranaq nike Deside Isa tetolaq siq ie pade.

4 # Yah. 4:44 Beterus Deside Isa bemanik léq ie pade, “Sopoq nabi tehormatin léq mbé-mbé, kecuali léq kampung asalne, léq antare semeton, kadang jarine dait keluargene mésaq.”

5Léq taoq nike Deside Isa nénten bau piaq sopoq juaq muqjizat, kecuali nyelahang dengan-dengan sakit siq care noloq gading-Ne léq atas ie pade. 6Deside Isa bengaq séngaq ie pade ndéq percaye.

Deside Isa ngutus due olas pengiring-Ne

(Mat. 10:5-15; Luk. 9:1-6)

Beterus Deside Isa lumbar ojok kampung-kampung léq sekiter nike, dait ngajahang. 7Ie ngemanikang kedue olas pengiring-Ne, terus ngutus ie pade due-due dait ngicanin kuase tipaq ie pade jari sediq roh-roh jahat. 8#Luk. 10:4-11 Ie ngicanin petunjuk niki tipaq ie pade, “Ndaq jauq napi-napi dalem kelampande, kecuali tunjang. Ndaq jauq keloran, atao takaq sangu atao képéng. 9Kadu sepatu, laguq ndaq jauq due kelambi.” 10Deside Isa éndah bemanik, “Lamun side pade tame ojok sopoq balé, ndot léq derike jangke side pade bilin taoq nike. 11#Kis. 13:51 Laguq lamun side pade dateng léq sopoq taoq, dait dengan-dengan léq derike ndéq mélé nerimaq dait dengahang side pade, bilin taoq nike. Dait kerapang kerepuk léman lampak naénde jari peringetan tipaq ie pade!”

12Beterus kedue olas pengiring Deside Isa nike lumbar. Ie pade lumbar nyampéang berite bahwe manusie harus tobat léman dose-dosene. 13#Yak. 5:14 Pengiring-pengiring Deside Isa nike sediq luwéq roh jahat, ngolésang minyak léq dengan sakit dait nyelahang ie pade.

Yahya Pembaptis tematéq

(Mat. 14:1-12; Luk. 9:7-9)

14 # Mat. 16:14; Mrk. 8:28; Luk. 9:19 Berite-berite mengenai selapuq peristiwe nike dateng éndah tipaq Raje Herodes, lantaran peséngan Deside Isa sampun kesohor léq mbé-mbé. Araq dengan saq bebase, “Yahya Pembaptis sampun idup malik! Keranaq nike Ie bedowé kuase jari miaq keajaipan nike.”

15Laguq dengan-dengan lain bebase, “Ie Elia.”

Araq éndah saq bebase, “Ie nabi maraq salaq sopoq nabi jaman laéq.”

16Sewaktu Herodes pireng hal nike, ie bebase, “Pasti niki Yahya Pembaptis saq piranan sampun tiang suruq penggal ulune. Mangkin ie sampun idup malik!”

17 # Luk. 3:19-20 Séngaq sendéqman nike Herodes sampun préntahang dengan bau Yahya, dait sékoqne ie léq dalem bui. Herodes ngelaksaneang hal nike lantaran Herodias, sebiniqne Pilipus sanakne mésaq. Séngaq Herodes sampun nikah kance Herodias, 18dait mengenai hal nike Yahya sampun peringet Herodes maraq niki, “Nénten kanggo pelungguh merariq kance sebiniq sanakde nike!”

19Keranaq nike Herodias dendem léq Yahya dait beniat nyematéq Yahya, laguq ie ndéq bau ngelaksaneang hal nike. 20Séngaq Herodes sampun mréntahang dengan jagaq bagus-bagus keselametan Yahya léq bui, lantaran ie takut léq Yahya. Ie nenaoq bahwe Yahya nike dengan saq soléh dait suci saq teutus siq Allah. Dait mule lamun Yahya bebase, Herodes seneng éndah pirengang ie, timaq ie jari osah gati.

21Ahirne Herodias mauq kesempatan léq jelo ulang taun Herodes. Waktu nike Herodes ngaraqang gawé umaq selapuq pembeléq-pembeléq kerajaan, prewire-prewire, dait tokoh-tokoh masyarakat Galilea. 22Léq gawé nike, bije Herodias saq dedare ngigel, dait igelanne nike sanget nyenengang angen Herodes dait temué-temuéne. Make Herodes bebase léq dedare nike, “Tunas léq tiang napi juaq saq side melétang. Tiang gen béng side!” 23Beterus Herodes bejanji léq dedare nike kadu sumpah. Herodes bebase, “Napi juaq saq side tunas gen tiang béng, timaq separo léman kerajaan tiang.”

24Make dedare nike sugul dait beketuan léq inaqne, “Inaq, napi saq harus tiang tunas?”

Jawab inaqne, “Tunas ulune Yahya Pembaptis.”

25Dedare nike becat tulak tipaq Herodes, dait bebase, “Tiang tunas ulu Yahya Pembaptis teican léq tiang mangkin niki éndah kadu naré!”

26Pirengang petunasan nike Herodes sedih gati. Laguq ie ndéq bau nolaq petunasan nike séngaq ie sampun besumpah léq julu temué-temuéne. 27Jari, ie langsung mréntahang sopoq pengawalne bait ulu Yahya Pembaptis. Make dengan nike lumbar ojok bui, terus penggalne ulu Yahya. 28Beterus ie jauq ulu nike kadu naré dait nyerahang tipaq dedare nike. Dait dedare nike éndah nyerahang tipaq inaqne. 29Sewaktu pengiring-pengiring Yahya dengah hal nike, ie pade lumbar bait jenazah Yahya, terus nguburang ie.

Deside Isa ngicanin bekelor lime iyu dengan

(Mat. 14:13-21; Luk. 9:10-17; Yah. 6:1-14)

30Beterus rasul-rasul saq teutus siq Deside Isa nike tulak malik, dait bekumpul kance Deside Isa. Ie pade ngelaporang léq Deside Isa selapuq saq sampun ie pade laksaneang dait ajahang. 31Luwéq gati dengan saq dateng dait lumbar sehingge Deside Isa dait pengiring-pengiring-Ne nénten bedowé kesempatan medaran. Keranaq nike Deside Isa bemanik léq pengiring-pengiring-Ne, “Silaq ite lumbar ojok taoq saq sepi adéq ndéq araq dengan lain dait ite mauq mentelah seberaq.” 32Make ie pade lumbar kadu perau ojok taoq saq sepi.

33Laguq sewaktu ie pade bilin taoq nike, luwéq dengan serioq ie pade dait nenaoq ojok mbé ie pade lumbar. Beterus léman selapuq kote léq wilayah nike, dengan-dengan pelai langan darat senjuluq Deside Isa dait pengiring-pengiring-Ne. 34#Bil. 27:17; 1Raj. 22:17; 2Hik. 18:16; Yeh. 34:5; Za. 10:2; Mat. 9:36 Sewaktu Deside Isa turun léman perau, Ie cingakin dengan luwéq. Make Deside Isa periak léq ie pade séngaq ie pade maraq dombe saq ndéq bedowé pengarat. Make Ie mulai ngajahang mengenai luwéq hal tipaq ie pade. 35Sewaktu serep jelo, pengiring-pengiring Deside Isa matur léq Ie, “Taoq niki kesempil dait sampun serep jelo. 36Solahan Pelungguh manikang dengan-dengan niki lumbar, adéq ie pade mauq beli keloran léq dése-dése dait kampung-kampung léq sekiter niki.”

37Laguq jawab Deside Isa, “Side pade saq harus ngebéng ie pade bekelor.”

“Napi tiang pade harus lalo beli ruti siq aji satak képéng perak jari béng bekelor dengan-dengan niki?” Maraq nike atur pengiring-pengiring Deside Isa nike.

38Beterus Deside Isa beketuan, “Araq pire ruti léq side pade? Cobaq lumbar serioq.”

Sesampun ie pade lumbar serioq, ie pade matur, “Araq lime ruti dait araq due empaq éndah.”

39Beterus Deside Isa ngemanikang selapuq dengan nike tokol bekelompoq-kelompoq léq pupaq saq ijo. 40Dengan-dengan nike tokol, araq saq satus dengan sekelompoq, dait araq éndah saq séket dengan sekelompoq. 41Beterus Deside Isa bait lime ruti dait due empaq nike, terus nengadah andang langit dait ngucap syukur tipaq Allah. Sesampun nike, Ie peleng-peleng ruti nike kadu gading-Ne terus icanin-Ne léq pengiring-pengiring-Ne jari tebagi-bagiang tipaq dengan luwéq nike. Dait due empaq nike tebagi-bagi éndah tipaq ie pade selapuq. 42Ie pade bekelor jangke besuh. 43Beterus salo keloran nike tekumpulang siq pengiring-pengiring Deside Isa -- selapuqne araq due olas bakaq penoq. 44Dengan-dengan mame saq ngelorang ruti nike luwéqne kire-kire lime iyu dengan.

Deside Isa bemargi léq atas aiq

(Mat. 14:22-33; Yah. 6:16-21)

45Sesampun nike, Deside Isa manikang pengiring-pengiring-Ne berangkat kadu perau senjuluq Ie ojok Betsaida léq itoqan danao. Léq waktu nike éndah Ie ngemanikang dengan luwéq nike uléq. 46Sesampun Deside Isa bekelin léman ie pade, Ie lumbar ojok bukit jari bedo'e. 47Sewaktu kekelem, perau pengiring-pengiring Deside Isa sampun araq léq tengaq-tengaq danao, léq waktu nike Deside Isa masih araq léq darat. 48Deside Isa cingakin ie pade sengke gati bedayung perau nike séngaq angin belawanan andang kance perau. Make kire-kire antare jam telu dait jam enem kelémaq, Deside Isa rauh tipaq ie pade bemargi léq atas aiq, dait Ie tetep bemargi maraqne gen liwatin ie pade. 49Waktu ie pade serioq Deside Isa bemargi léq atas aiq, Deside Isa teparan hantu siq ie pade, 50sehingge ie pade bekuih-kuih siq takutne, séngaq ie pade selapuq serioq Ie dait ie pade tinjot gati.

Laguq Deside Isa langsung bemanik léq ie pade, “Tenang! Tiang niki Isa, ndaq takut!” 51Beterus Deside Isa taék ojok perau ie pade, langsung waktu nike éndah angin jari tenang. Selapuq pengiring-pengiring-Ne bengaq gati. 52Séngaq sesampun peristiwe ruti nike ie pade ndéqman éndah ngerti dait ie pade tetep keras até.

Deside Isa nyelahang dengan-dengan sakit léq Genesaret

(Mat. 14:34-36)

53Sesampun rauh léq itoqan danao, ie pade mendarat léq Genesaret. 54Waktu ie pade turun léman perau, dengan-dengan serioq bahwe saq rauh nike Deside Isa. 55Terus ie pade pelai ojok mbé-mbé léq selapuq wilayah nike. Dait mulai jauq dengan-dengan sakit léq atas tipah ojok Deside Isa. Lamun ie pade dengah bahwe Deside Isa araq léq sopoq taoq, ie pade jauq dengan-dengan sakit ojok derike. 56Léq mbé juaq Deside Isa rauh -- timaq léq kampung, léq kote atao léq dése -- léq derike dengan tetep dateng dait noloq dengan-dengan sakit léq peken-peken. Ie pade tunas adéq dengan-dengan sakit nike teijinang kintur jubah Deside Isa, timaq cume potone. Selapuq saq kintur poton jubah-Ne jari selah.

Currently Selected:

MARKUS 6: LAISAS

Highlight

Copy