MARKUS 5

Deside Isa nyelahang dengan saq tekuasein siq roh jahat

(Mat. 8:28-34; Luk. 8:26-39)

1Beterus Deside Isa dait pengiring-pengiring-Ne rauh léq itoqan Danao Galilea, léq daérah dengan Gerasa. 2Waktu Deside Isa baruq turun léman perau, Ie tedatengin siq sopoq dengan mame saq sugul léman goe-goe kuburan. 3Dengan nike tekuasein siq roh jahat dait ndot léq kuburan-kuburan. Ie ndéq bau tetaliq malik; timaq kadu ranté. 4Ime dait naéne rimpes tetaliq, laguq tetep ranté-ranté nike tepegatang, dait besi léq naéne ie polakang. Ie kuat gati sehingge ndéq araq sopoq dengan juaq saq bau nahen ie. 5Kenjelo kekelem ie ngelamang léq kuburan dait léq bukit-bukit sambil nyurak-nyurak dait ngempuk awakne jangke bakat kadu batu.

6Sewaktu léman jaoq ie serioq Deside Isa rauh, ie pelai terus sujut léq arepan Deside Isa. 7Siq suare saq beléq ie bekuih, “Deside Isa, Bije saq asalne léman Allah Saq Maheagung! Gen Pelungguh kumbéqang tiang niki? Demi Allah tiang tunas, sampunang Pelungguh siksaq tiang!” (8Dengan nike matur maraq nike séngaq Deside Isa bemanik léq ie, “Roh jahat, sugul léman dengan niki!”)

9Beterus Deside Isa bemanik léq ie, “Sai arande?”

Jawab dengan nike, “Aran tiang ‘Legiun’ -- séngaq tiang pade luwéq gati!” 10Sanget siq ie tunas adéq Deside Isa sampunang préntahang roh-roh jahat nike sugul léman daérah nike.

11Léq dékét taoq nike araq luwéq gati bawi kenyeke boyaq kakenan léq tembéréng bukit. 12Roh-roh jahat nike tunas léq Deside Isa, “Manikang tiang pade tame ojok dalem bawi-bawi nike.” 13Petunasan ie pade tekabulang siq Deside Isa. Jari, roh-roh jahat nike sugul léman dengan nike terus tame ojok dalem bawi-bawi nike. Selapuq bawi saq luwéq nike pelai, terus nimproh léman sedin jurang ojok dalem danao, terus ketelep -- selapuqne araq kire-kire due iyu luwéqne.

14Penjage-penjage bawi nike pelai, terus nuturang hal nike léq kote dait léq dése sekiterne. Beterus dengan-dengan sugul jari serioq napi saq sampun telaksane. 15Ie pade dateng ojok Deside Isa. Terus serioqne dengan saq tekuasein siq Legiun nike, kenyeke tokol léq derike. Ie sampun kadu kelambi, dait pikiranne éndah sampun waras. Make ie pade selapuq jari takut. 16Dengan-dengan saq sampun nyaksiang mésaq peristiwe mengenai dengan nike dait bawi-bawi nike nyeriteang napi saq sampun telaksane. 17Beterus sanget siqne tunas siq penduduk daérah nike adéq Deside Isa bilin daérah nike.

18Léq waktu Deside Isa taék ojok dalem perau, dengan saq sendéqmanne tekuasein siq sétan nike tunas léq Deside Isa, adéqne teijinang ngiring Ie.

19Laguq Deside Isa nénten setuju, manik-Ne, “Uléq dait ceriteang léq kadang jarinde napi saq sampun telaksaneang Tuhan tipaq side dait berembé solahne Ie léq side!”

20Jari dengan nike lumbar, dait mulai nyeriteang léq daérah Dekapolis selapuq saq sampun telaksaneang siq Deside Isa léq ie. Selapuq dengan bengaq dengah hal nike.

Deside Isa ngidupang bije Yairus dait nyelahang dengan nine saq sakit pendarahan

(Mat. 9:18-26; Luk. 8:40-56)

21Deside Isa tulak malik ojok itoqan danao. Léq sedin danao nike luwéq dengan dateng bekerimpun léq sekelining Deside Isa. 22Beterus parek sopoq dengan aranne Yairus, ie kepale balé ibadah léq kote nike. Sewaktu Yairus serioq Deside Isa, ie sujut léq arepan-Ne, 23dait sanget siqne tunas, “Bapaq, anak tiang saq nine sakit parah. Tunas Pelungguh rauh jari jamah ie adéq ie selah dait tetep idup!”

24Beterus Deside Isa lumbar teiring siq Yairus. Luwéq dengan ngiring Ie, dait bedesek-desekan léq dékét-Ne.

25Léq antarene araq éndah sopoq dengan nine saq sampun due olas taun sakit pendarahan. 26Ie sampun kereng gati teowat siq tabib-tabib, jangke bis selapuq dowéne, laguq ndéq araq gati manpaatne malahan sebalikne keadaanne sayan parah. 27Dengan nine nike sampun luwéq dengah mengenai Deside Isa. Make léq tengaq-tengaq dengan luwéq nike, ie rapetin Deside Isa léman mudi dait kintur jubah-Ne, 28séngaq ie pikir, “Asal tiang kintur jubah-Ne, tiang gen selah!”

29Dait langsung waktu nike éndah pendarahanne engkah. Ie beridap bahwe ie sampun selah. 30Léq waktu nike éndah Deside Isa wikan bahwe araq kekuatan saq sugul léman diriq-Ne. Beterus Ie cingakin andang dengan luwéq nike dait beketuan, “Sai saq kintur jubah Tiang?”

31Pengiring-pengiring-Ne bejawab, “Pelungguh cingakin araq luwéq dengan bedesek-desekan. Pelungguh masih beketuan sai saq kintur jubah Pelungguh?”

32Laguq Deside Isa terus doang cingakin léq sekelining-Ne jari boyaq dengan saq sampun gawéq hal nike. 33Dengan nine nike nenaoq napi saq sampun telaksane léq diriqne, siq rase takut dait leger ie sujut léq arepan Deside Isa, terus ie ngakuq selapuq hal nike. 34Beterus Deside Isa bemanik léq dengan nine nike, “Anak Tiang, imande sampun miaq side selah! Silaq Lumbar dalem damé, side tetu-tetu sampun selah!”

35Sewaktu Deside Isa masih bebaos, araq pelayan-pelayan dateng léman balé Yairus. “Bijende sampun ninggal,” basen ie pade tipaq Yairus. “Sampunang pelungguh nyusahang Bapaq Guru malik.”

36Laguq Deside Isa nénten peduli napi saq tesampéang siq dengan-dengan nike, terus Ie bemanik léq Yairus, “Ndaq takut, percaye doang!” 37Deside Isa tetep bemargi, laguq Ie nénten ngijinang sopoq dengan juaq ngiring Ie, kecuali Petrus, Yakub dait Yahya, semetonne Yakub. 38Sewaktu ie pade rauh léq balé Yairus, Deside Isa cingakin dengan-dengan pade uyut gati, pade nangis dait pade ngerung keras-keras dait pada éroq aséq. 39Beterus Deside Isa tame dait bemanik léq ie pade, “Kembéq uyut-uyut dait nangis? Kanak nike ndéq milinang, ie cume tindoq!”

40Ie pade ngeréréqang Deside Isa. Beterus Deside Isa manikang ie pade selapuq sugul, terus Ie jauq inaq amaq kanak nike dait ketelu pengiring-Ne tame ojok dalem kamar kanak nike. 41Deside Isa tegel ime kanak nike terus bemanik léq ie, “Talita kum,” saq artine, “Kanak nine, Tiang bemanik léq side: Ures!”

42Kanak nike langsung ures dait lampaq séngaq umur kanak nike sampun due olas taun. Selapuq saq nyaksiang peristiwe nike takjub gati! 43Laguq Deside Isa balaq ie pade ndaq gati nyeriteang hal nike tipaq sai-sai. Beterus manik-Ne, “Béng kanak nike bekelor.”

Currently Selected:

MARKUS 5: LAISAS

Highlight

Copy