Mrk 14

Marengu ya kudlaya Yesu

(Mt 26:1-5; Lk 22:1-2; Yhn 11:45-53)

1Afa kusali ntsena masiku mabiri akuva Paska ni nkhuvu wa makati lawa mangekena handrelo swiva kone. A vaprista lava vakulu ni vadondrisi va Nawu afa vadjula a rengu dra ku khoma Yesu, akuva vamudlaya. 2Hikusa afa vaku aswifanekeli kumukhoma ankhubyini suka swipfuxa a dzolonga amakari ka xitrhungu.

Yesu atxheliwa a mafura ya kunun'hwela

(Mt 26:6-13; Yhn 12:1-8)

3Kuti loko Yene ali Betaniya, andlwini ya Simoni, lweyi wa nhlokonho, na atrhami atafuleni kutrhindrekela ku yene wansati, lweyi afaka atameli nhlembeto ya vumba dra ntlhohe na yini mafura ya kunun'hwela ya lisima, mahambiwi hi xinsinyana xa nardo; adlaya a nhlembeto, kutani atxhela mafura anhlokweni ya Yesu. 4Van'we vhanu afaka vali kolahaya vahlundruka swone, atimbilwini tavu, vasungula a kunu'nunu'ta vaku: Xana a mafura hinkwawu lawa mahalateliwela yini? 5Hikusa afa mangaxavisiwa hi mali ya kutlula madzana mararu (300) leyi afa yitanyikiwa a swisiwana. Kutani afa vahlundrukela lweyi wansati. 6Kolahu Yesu aku ku vone: Mutrikani lweyi wansati, n'wingamusoleni, hikusa yene anitireli ntiro wa kuxonga. 7A swisiwana n'wina swone minkama hinkwayu, kutani n'wingaswiyentxela a mintxhumu leminene, loko n'wiswirandra, kambe mine n'wingave na mine hi minkama hinkwayu. 8Yene ayentxi leswi aswikotiki, ahantli anitota hi mafura mayelano nikuyisiwa kwanga axireni. 9Nihlayelamfuri nili ku n'wine: Amisaveni hinkwayu lomu kutakareriwa Ivangeli, kutahlayiwa leswi ahaka kuswiyentxa wansati akuva atadrimukiwa ha swone.

Kuwonga ka Yudasi

(Mt 26:14-16; Lk 22:3-6)

10Yudasi Iskariyota, mun'we wa vadondrisiwa lava va khume na vabiri, ayikhanela ni vaprista lava vakulu akuva avanyiketa Yesu. 11Vone vanyoxa ngopfu ha swone, vamudumbisa kumunyika mali; kolahu adjuletela a nkama wunene wa kuvanyiketa Yene.

Xilalelo xa vugamu xa Yesu

(Mt 26:17-30; Lk 22:7-23; Yhn 13:21-30)

12Hi siku dra kusungula dra nkhuvu wa makati lawa mangeke na handrelo, loko kutlhabyiwa a xihambana xa Paska, a vadondrisiwa vakwe vamuvutisi vaku: Xana urandra leswaku hilulamisela kwini akuva uda a Paska? 13Kolahu Yene aruma vabiri ku vadondrisiwa vakwe, aku: Fambani amutini, n'witatlhangana ni wanuna na arwali a hotro ya mati. Mulandrani lomu atakanhingena kone, 14byelani a n'winyi wa yindlu n'wiku: A Mudondrisi avutisa leswaku: Xi kwini xilawu lexi ni takadela ku xone a Paska kun'we ni vadondrisiwa vanga? 15Yene atan'wikomba xilawu xa yindlu ya le henhla, lexi xilongisiwiki hi hinkwaswu leswi swifanekeliki. Bekisani kone a Paska dreru.

16A vadondrisiwa vafambiki, vanhingena amutini, vakuma hinkwaswu swanga hi leswi Yesu ava byelisiki xiswone kutani vabekisa a Paska. 17Driku drapela, Yene afamba kun'we ni lava va khume na vabiri. 18Vaku na vatrhami atafuleni vada, Yene aku: Nihlayelamfuri leswaku mun'we ku n'wine, adaka na mine ataniwonga. 19Vone va vaviseka ngopfu vasungula kumuvutisa ha mun'we ha mun'we vaku: Xana hi mine? 20Kutani Yene ayangula aku: I mun'we wa lava khume na vabiri, hi lweyi apetaka a kati kun'we na mine ambengeni.#14:20 A varambiwa afa vada ku mbenga mun'we. 21#Lavisa Mps 22:2-19; Ezy 53. Hi xihlayelamfuri a N'wana wa Mhunu atafa swanga hileswi switraliwiki ku Matralwa hikola kwake. Kambe yowee, ku lweyi a N'wana wa Mhunu atakanyiketiwa ha yene! Afa swili swa hombe ku yene loko afa angapswaliwanga!

22Amakari ka xilalelo, Yesu ateka kati, adrikatekisa, adrikhemelela, anyika vadondrisiwa, aku: Tekani, leyi i miri yanga. 23Ntrhaku ateka ntrheko, awukatekisa anyika vadondrisiwa vanwa ha wone hinkwavu. 24Kutani aku ku vone: Leswi i ngati yanga, ngati ya xipfumelelanu (lexi ximpswha), leyi yihalateliwaka lava vanyingi. 25Kutani nihlayelamfuri nili ku n'wine, leswaku ningahatlheli ninwa vhinyo, kukondra kutlhasa siku ledri nitakanwa vhinyo drimpswha Afun'wini wa Xikwembu Nkulukumba.

26Ntrhaku ka loko vayimbeleli lisimu vayi Nhaveni ya Minhlwari. #14:26 A Swidrumiso 115-118 afa swiyimbeleliwa ntrhaku ka kuheta kuda ka xilalelo xa pasika.

Yesu ativisa Petrosi

(Mt 26:31-35; Lk 22:31-34; Yhn 13:36-38)

27 # Lavisa Zk 13:7. Yesu aku ku vadondrisiwa vakwe: Hinkwenu n'witanitrika, hikusa a Matralwa mali: Nitaba a mubyisi a tihamba titahangalaka. 28Kambe ntrhaku ka kuva nipfuki kufeni nitayan'wirangela akuya Galileya. 29Kolahu Petrosi aku: Nambi hinkwavu vakutrika mine ningakutriki! 30Kambe Yesu aku ku yene: Lavisa, Petrosi! Avusikwini byolebyi, na nkuku wungasinayimba kubiri, utava unilandruli kuraru. 31Kambe Petrosi afa ahundrisa akuhlaya aku: Nambi swifanekela akuva nifa na Wene, ningaka ningakulandruli. Na vone a van'wana hinkwavu vahlayisa xiswoswo.

Xikhongoto xa Yesu a Getsemani

(Mt 26:36-46; Lk 22:39-46)

32Ntrhaku vayi mbangwini lowu valiki i Getsemani, Yesu aku ku vadondrisiwa: Trhamisani kola, nahayakhongota. 33Atekiki Petrosi, na Yakobe, na Yohana, asungula a kutxhuka ngopfu ni kukamiwa ka mbilu, 34kutani aku: Nitwa kuvaviseka ka kufa. Salani kolahu n'wilavelela. 35Aya mahlweninyana, akinsama, akombela ngopfu ku Xikwembu Nkulukumba leswaku loko swingakoteka, angamuhuluxa ku nkama wa nhlomulo. 36Afa aku: Abba, Tatana, ku Wene hinkwaswu swakoteka. Trhindreta a ntrheko lowu kule na mine. Kambe, kungayentxiwi a kurandra kwanga, kambe im'na, akuyentxiwi a kurandra kwaku.#14:36 A tralwa dra kusungula laha dritirisa a ritu dra Xiaramu ledri dra Abaa, ledri hi kutolovela dri kombisaka tatana lweyi kukhaneliwaka ha yene kumbe lweyi akhanelaka.

37Ntrhaku atlhelela ku vadondrisiwa, kambe avakumi na vakhutriyela. Kolahu aku ku Petrosi: Simoni, wene wakhutriyela? Awuswikotanga kulavelela hi nkama mun'we xana? 38Hitekani, n'wikhongota, akuva n'wingatihluliwa hi ndringo. A moya waswirandra, kambe a miri mini gome.

39Asukiki mfuri, akuva ayakhongota, na ahlaya maritu wolawo. 40Atiki atlhelela ku vadondrisiwa, avakuma na vakhutriyela, hikusa a mahlu yavu afa mabindra. Kutani avativanga leswi vataka muyangula swone. 41Loko atlheleli ku vone hi dra vuraru, aku ku vone: N'wahakhutriyela ni kuwisa? Swadringana! A nkama wutlhasile, lowu a N'wana wa Mhunu atakanyiketiwa ha wone a mavokweni ya vadohi. 42Sekelekani, ahifambeni. Awata swoswi lweyi aniwongaka.

Kukhomiwa ka Yesu

(Mt 26:47-56; Lk 22:47-53; Yhn 18:3-12)

43Afa Yene ahakhanela loko kakutlhasa Yudasi Iskariyota mun'we wa vadondrisiwa lava va khume na vabiri. Afa atisa a vhanu vanyingi na vahlomi timpanga ni tinhonga. Afa varumiwi hi vaprista lava vakulu, ni vadondrisi va Nawu, ni vakulu va tiko. 44A muwongi afa ayingelani na vone hi xikombiso lexi aku: Lweyi nitakamulosa hi kumunyunta hi yene, mukhomani n'wimufambisa hi kutiyisela.

45Xikan'we loko Yudasi atlhasi kusuhi na Yesu, aku ku yene: Mudondrisi! Kutani amunyunta. 46Van'wana vayisa mavoko a henhla kwake, vamutrimba. 47#Fananisa na Yob 18:26. Ke mun'we wa lava afaka vali kone, ahlomula lipanga, a ba a nandra wa muprista lwenkulu, amutrema ndleve. 48Yesu aku ku vone: N'wihumi na n'witameli timpanga ni tinhonga, akuva n'witatanikhoma, swanga hi loko nili xiyivi? 49Afa nina n'wine masiku hinkwawu, na nidondrisa a Tempeleni, kambe an'wanikhomanga! Kambe hileswaku a Matralwa mahetiseka.

50Hi nkama wolowo a vadondrisiwa vakwe vamutrika kutani vatrutruma hinkwavu. 51Mun'we wa ndrisanyana, lweyi afaka afunekeli kapulana ntsena amirini afa alandra Yesu, vamukhoma, 52kambe yene asiya a kapulana amandleni yavu, kutani atrutruma na angayambalanga ntxhumu.

Yesu amahlweni ka huvu ya xi-Yuda

(Mt 26:57-68; Lk 22:54-55,63-71; Yhn 18:13-14,19-24)

53Ntrhaku vayisa Yesu a kaya ka muprista lwenkulu, lomu afaka kuhlengeletani a vaprista lava vakulu ni vakulu va tiko, ni vadondrisi va Nawu.

54Petrosi afa alandra Yesu hi le kule, akondra ayanhingena linxonxeni dra muprista lwenkulu. Atrhama kone ni malandra awora ndrilo.

55A vaprista lava vakulu ni huvu hinkwayu afa vadjula vumboni bya kurambela Yesu, vatakota a kumudlaya, kambe avabyikumanga. 56#Fananisa ni Mps 27:12; 35:11. Vanyingi afa vabeka vumboni bya madrimi bya kumurambela, kambe a vumboni byavu afa byingapfumelelani. 57Kolahu van'wana vasekeleka akuva vatanyika vumboni ni kuhlaya leswaku: 58#Lavisa Ywl 2:19. Hine hamuyingeli aku: Nitabutrhuta a Tempele leyi yiyakiwiki hi mavoko ya vhanu, na hi masiku mararu nitayaka yin'wanyana, leyi yakuka yingayakiwanga hi vhanu. 59Kambe nambi swili tanu, amhakeni leyi akuhlaya kwavu afa kungayamukeleki. 60Kolahu a muprista lwenkulu ayima amakari ka huvu, kutani avutisa Yesu aku: Xana awuyanguli ntxhumu? Hi swini leswi lava va kurambelaka ha swone? 61Kambe Yesu amiyela angayanguli ntxhumu. Kolahu a muprista lwenkulu atlhela amuvutisa aku: Hi wene Kriste, N'wana wa Xikwembu Nkulukumba lweyi akhensiwaka, xana? 62#Lavisa Mps 110:1; Dn 7:13. Yesu aku: Hi mine. Mfuri n'witavona a N'wana wa Mhunu na atrhami axineneni xa Xikwembu Nkulukumba wa mintamu hinkwayu, apfa hi le henhla ka matlavi ya tilo.

63Hi kuyingela leswo a muprista lwenkulu ahandrula a swiyambalu swake, xikombiso xa kukaneta, aku: Ahahadjuli swikombiso swimbeni. 64#Lavisa Lv 24:16. N'wiyingelile hi laha Yene asandriki Xikwembu Nkulukumba ha kone! N'wiswivonisa ku yini? Ntrhaku ka leswi, a huvu hinkwayu yitremi leswaku Yene afanekela kuyavanyiseliwa lifu.

65 # Fananisa na Ezy 50:6. Van'wana vasungula kumuntsekela mari. Vamupfala mahlu, vamuyamasa hi swihahati, ni kumuvutisa vaku: Pfhumba lweyi akubiki loko uli muprofeta. Kutani a malandra mamuyamukela hi kumuba hi swihahati.

Petrosi alandrula Yesu

(Mt 26:69-75; Lk 22:56-62; Yhn 18:15-18,25-27)

66Loko Petrosi ahali hansi alinxonxeni, kuhumelela mun'wana wansati, a nandra wa muprista lwenkulu. 67Yene avona Petrosi na awora ndrilo, amulavisisa, aku ku yene: Na wene afa uli na Yesu mu-Nazarete! 68#14:68 A matralwa ya Kuhlawa amana maritu ya leswaku a nkuku wu yimbelelile. Kambe Petrosi alandrula, aku: Animutivi, nambi leswi uswihlayaka, aniswiyingelisisi. Kolahu, ahumi aya lixonxeni alikupakupeni kutani hi nkama lowo a nkuku wuyimba. 69Kambe a nandra atlhela amulavisisa kutani aku ku lava afaka vali ku mbangu wolowo: lweyi i mun'we wavu. 70Kutani yene atlhela alandrula. Hi nkamanyana, lava afaka vali kone vatlhela vaku ku Petrosi: Akuna kuganaganeka ka leswaku u mun'we wavu, hikusa na kone u mu-Galileya. 71Kutani yene asungula kuhlaya leswaku Xikwembu Nkulukumba amukhatise loko ange xihlayelamfuri. Kutani afunga aku: Animutivi a mhunu lweyo n'wihlayaka yene. 72#14:72 Lavisa 14:30 tolokiwo drin'wana drili: yene ahumi hi kuhangwesa Mt 27:33 ni xikombiso. Hi nomu lo a nkuku wuyimba ka vubiri. Petrosi ahangadrimuka a maritu ya Yesu lawa yaku: A nkuku wungasinayimba utava unilandruli kuraru. Kutani atlhaveka, adrila.

Currently Selected:

Mrk 14: NTX2007

Highlight

Copy