Mrk 13

Yesu akhanela hi kubutrhutiwa ka Yindlu ya Hosi

(Mt 24:1-2; Lk 21:5-6)

1Loko Yesu ahuma Tempeleni, mun'we ku vadondrisiwa ate ku yene: Mudondrisi! Ahikuxonga ka maribye lawa, ni kuxonga ka tiyindlu leti! 2Kutani Yesu aku ku yene: Wativona tiyindlu tikulu, leti? Lavisa leswaku kungaka kungatrikiwi ribye ni drin'we a henhla ka ribye, ledri dringatikibutrhutiwa.

Masungulu ya mahlomulu

(Mt 24:3-14; Lk 21:7-19)

3Ntrhaku Yesu ayi Nhaveni ya Minhlwari, atrhama alavisana ni Tempele. Kolahu Petrosi, na Yakobe, na Yohana na Andreyasi vamuvutisa na vali vuswavu vaku: 4Hibyele a nkama lowu switakahumelela ha wone, ni xikombiso xa hinkwaswu leswi switakahumelela.

5Yesu ahangasungula kuvabyela, aku: Tivonelani leswaku a mhunu angatin'wikanganyisa! 6Vanyingi vatahumelela hi kukanganyisa vaku hi mine lweyi: Hi mine Kriste! Na vatakanganyisa vhanu vanyingi. 7Loko n'wiyingela kuhlayiwa leswaku kuni tiyimpi hi matlhelo hinkwawu, n'wingavitxhava. Leswo swifanekeli kuhumelela, kambe abyisiva vugamu. 8Hikusa drin'we tiko dritapfukela drin'wana, ni mfumu mun'we wutapfukela wun'wana; na kone kutava ni kutrekatreka ka misava, ku mimbangu min'wana kutava ni tindlala. Hinkwaswu leswo atava masungulu ya mahlomulu.

9Tivonelani swinene! Vatan'wiyisa tihubyini, n'witabiwa masinagogeni. Nakone n'witanyiketiwa amahlweni ka tindruna ni vafumi hinkonta yanga, akuva n'wiva timboni. 10Swifanekeli leswaku a Ivangeli yiranga yihlayiwa matikweni hinkwawu. 11Loko van'wiboha, van'winyiketa vuhosini n'wingahlatiyeleni hi leswi n'wita kayangula swone. Kambe hlayani leswi n'witakanyikiwa hi wolowo nkama, hikusa ahi n'wine n'wiyangulaka, kambe hi Moya wa Kuxwenga. 12#Fananisa na Mik 7:6. Mun'we makwavu atanyiketa makwavu akudlaweni, ni tatana atanyiketa a n'wana. Ni vana vatapfukela vapswali vavanyiketa kudlayiweni. 13N'wine n'witavengiwa hi hinkwavu hinkonta yanga. Kambe lweyi atiyiselaka kutlhasa vugan'wini, atahuluxiwa.

Nhlomulo lowu wukulu

(Mt 24:15-28; Lk 21:20-24)

14 # Lavisa Dn 9:27; 11:31; 12:11. Loko n'wivona swakutxhavisa a mbangwini lowu wungafanelikiki lweyi a hlayaka leswi adjulisise akuswiyingelisisa hi lowo nkama lava vanga lana Yudeya avatrutrumele tinhaveni. 15Lweyi anga henhla ka yindlu, angaxiki ayanhingena ku yone akuva atisusela kone xantxhumu. 16Lweyi anga masin'wini, angahatlheleli kaya, akuya teka a swiyambalu. 17Yowee, ku vavasati lava vatakavani tinyimba, ni lava vayan'wisaka amasikwini lawo! 18Khongotani, akuva hinkwaswu leswo swingahumeleli hi Vuxika, 19#Fananisa na Dn 12:1. hikusa amasikwini lawo kutavani nhlomulo wukulu ngopfu, lowu wungasamikiki wuva kone, kusukeli loko Xikwembu Nkulukumba atumbuluxi misava, kutlhasa swoswi, mfuri wungahatikiva kone. 20Mfuri, loko afa a Hosi yingapumbanga a masiku lawo, afa kungatihuluka mhunu ni mun'we. Kambe hinkonta ya vahlawuliwa, lava Xikwembu Nkulukumba avahlawuliki, agomisi masiku wolawo. 21Loko a mhunu an'wibyela aku: Lavisani, Kriste akola, kumbe Kriste alahaya, n'wingapfumeleni! 22Hikusa kutahumelela lava vatihlayaka vaku mine ni Kriste, hi madrimi, ni profeta va madrimi vatakahamba ni swikombiso ni mahlolana, akuva vakanganyisa vahlawuliwa va Xikwembu Nkulukumba, loko swingakotekaka. 23N'wine ke tivonelani, ngopfu, hikusa nin'wibyela ku hinkwaswu leswi na swingasanganahumelela.

Kubuya ka N'wana wa Mhunu

(Mt 24:29-31; Lk 21:25-28)

24Ntrhaku ka masiku lawo ya nhlomulo, a dambu dritava munyama, ni hweti yingatihumexa a kuvaninga ka yone. 25#Kutindrimana ta 24-25, fananisa na Ezy 13:10; 34:4; Ez 32:7; Ywl 2:10; 3:4. A tinyeleti titawa, ni mintamu ya le tilweni mitatrekatreka.

26 # Lavisa Dn 7:13. Kolahu vatavona N'wana wa Mhunu, ahumelela matlavini hi ntamu lowu wukulu ni hi lidrumu. 27Kutani yene ataruma swirun'wa, kuhlengeleta vahlawuliwa vakwe. Kusukela avugan'wini byin'we bya misava, kuyatlhasa ku vugamu byin'wana.

Xifaniso xa nkuwa

(Mt 24:32-35; Lk 21:29-33)

28Dondrani hi xikombiso xa nkuwa: Loko wone wuni tinkambu ta kunabyala, wusungula kuhluka makamba mampswha hileswaku a Minyuku mikusuhi. 29Hileswo-ke, loko n'wivona kuhumelela mintxhumu leyi, tivani leswaku a nkama watrhindrekela. 30Nihlayelamfuri nili ku n'wine: A vhanu va nkama lowu vangahundri na mintxhumu leyi hinkwavu mingasanganahumelela.

31A tilo ni misava switahundra, kambe a maritu yanga mangatihundra!

Akuna lweyi ativaka siku ni nkama

(Mt 24:36-44)

32Loko drili siku ledro ni nkama wa siku, akuna mhunu lweyi aswitivaka, nambi swili swirun'wa swa le Tilweni, nambi ali N'wana, loko angali Tatana ntsena. 33Tivonelani, hitekani, hikusa an'witivi leswaku dritatlhasa drini a siku ledro. 34Swifana ni loko a nuna wa kukari asiya a yindlu yake ayendra, anyiketa ku malandra yake a ntamu wa kuyibekisa, na mun'wana-ni-mun'wana ani ntiro wakwe, kutani aleleta ku muyimeli wa nyangwa akuva alavelela. 35Kolahu-ke vanani valaveleli hikusa an'witivi leswaku atabuya drini a n'winyi wa yindlu. Swingakoteka kuva alihungwini kumbe hi le makari ka vusiku, kumbe ampundrwini, kumbe amixweni. 36Swingatxhuki swiyentxeka leswaku abuya hi kuhangwesa, an'wikuma na n'wikhutriyelile. 37Kambe leswi nin'wibyelaka swone, nibyela hinkwavu nili: Hitekani swinene!

Currently Selected:

Mrk 13: NTX2007

Highlight

Copy