Mrk 12

Xifaniso xa vatiri vamfani

(Mt 21:33-46; Lk 20:9-19)

1 # Fananisa na Ezy 5:1-2. Yesu asunguli kukhanela ku vhanu hi swifaniso aku: A mhunu afa abyali livhinya, adribiyela hi linhlampfu, akela ni xipfuvelo, ayaka ni xihondro. Kutani adrisiyela a vadrimi, yene ayendra.

2Hi nkama wa kutrhovela aruma a nandra ku vadrimi, kuyadjula swa xiyenge xakwe xa livhinya. 3Vone vatiki vamukhoma, vamuba, vamutlhelisa na angana ntxhumu. 4Atlhela avarumela a nandra mun'wana, na yene vamubalesa nhloko, vamuyentxa nhlamba. 5Atlhela mfuri aruma mun'wana, lweyo vamudlaya; ni van'wana vakutala, van'we vavaba van'wana vava dlaya. 6Afa asali ntsena ni n'wana mun'we, lweyi wakurandreka. Amuruma ku vone na e wa vugamu aku: Vatatxhava n'wananga! 7Kambe a vadrimi volavo vabyelana vaku: Lweyi hi yene mudi wa pfindla; tanani himudlaya, a pfindla dritava dreru. 8Kutani vamukhoma, vamudlaya, vamutxukumetela handle ka livhinya.

9Ke a n'winyi wa livhinya atayentxa yini, xana? Atata, atatadlaya vadrimi lavo, ava anyika van'wana livhinya. 10Xana an'wihlayanga a Tralwa ledri driliki:

A ribye ledri a vayaki vadridreliki,

hi drone driyentxiwaka dra kusungula dra hoka.

11 # Lavisa Mps 118:22-23. Swayentxiwi hi Hosi;

na kone hi leswi swihlamalisaka amahlweni kweru!

12Kutani vone vadjula kumukhoma, hikusa vaswitivile leswaku ahlayi xifaniso lexo na akongoma vone, kambe afa vatxhava xitrhungu, kutani vamutrika atifambela.

Ta mhaka ya tinemba

(Mt 22:15-22; Lk 20:20-26)

13A va-Yuda varumi ku Yene van'we va vafarisi ni va ntlawa wa Heroda, akuva vaya muphasa hi maritu. 14Vatlhasiki ku Yene vaku: Mudondrisi, haswitiva leswaku uwa xihlayelamfuri, awutihlatiyelisi ha mhunu. Hikusa awulavisi vuso bya vhanu, kambe udondrisa andlela ya Xikwembu Nkulukumba swinene. Xana swapfumeleliwa kuhumexela Khezari a tinemba kumbe ahi swone, xana? Hihumexa kumbe hingahumexi? 15Yesu avona mandrendre yavu, avayangula aku: Xana n'winidringela yini? Nitiselani a denari nidrivona. 16Vamutisela. Yene avavutisa aku: Xana a xifaniso lexi ni vito ledri dritraliwiki lana, i swamani? Vayangula vaku: I swa Khezari. 17Yesu ahanga ku vone: Nyikani-ke a swa Khezari ku Khezari, ni swa Xikwembu Nkulukumba ku Xikwembu Nkulukumba. Kutani vahlamala ha Yene.

Kupfuxiwa ka vafi

(Mt 22:23-33; Lk 20:27-40)

18 # Fananisa ni Mnt 23:8. Kutani a vasaduki lava valiki akuna kupfuxiwa-kufeni vatrhindrekeli ku Yene, vamuvutisa vaku: 19#Lavisa Mlw 25:5-6. Mudondrisi, Moxe ahitraleli leswaku: Loko a wanuna afa, asiya nsati, na angana n'wana, a makwavu lweyi amutlhantamaka atateka lweyi wansati, atapfuxela matruwa makwavu a lixaka. 20Kavi ni ntlhanu na vabiri wa vamakwavu-na-makwavu. Lweyi wa kuranga ateka nsati; afa na angana vana. 21Lweyi wa vubiri amuteka, na yene afa na angana vana; ni lweyi wa vuraru na yene swiva swoleswo. 22Hinkwavu lava va ntlhanu na vabiri vatekani ni yelweyi wansati kambe avasiyanga vana. Antrhaku ka hinkwavu, lweyi wansati na yene afa. 23Xana akupfuxiweni ka vafi, loko vafi vatlhela vahanya, atava nsati wa wini ku vone?

24Yesu aku ku vone: Milahleki ngopfu hinkonta ya leswi n'wingativikiki Matralwa ni ntamu wa Xikwembu Nkulukumba. 25Hikusa a vhanu, loko vatapfuka-kufeni, vangaka vangateki, vangaka vangatekiwi, kambe vatafana ni swirun'wa leswi swinga Matilweni. 26#Lavisa Khm 3:2-6. Kutani, mayelanu ni kupfuka-kufeni, xana an'wihlayanga abukwini dra Moxe, amhakeni ya nkun'hu ledri dra kupfura leswi Xikwembu Nkulukumba angakhanelisa xiswone na yene, aku: Mine ni Xikwembu Nkulukumba wa Abrahamu, ni Xikwembu Nkulukumba wa Yisaki, ni Xikwembu Nkulukumba wa Yakobe? 27Xikwembu Nkulukumba ahi Xikwembu Nkulukumba wa vafi, kambe wa lava vahanyaka. Hileswo-ke n'wine n'wilahleki ngopfu.

Nawu lowu wukulu

(Mt 22:34-40; Lk 10:25-28)

28Kutrhindrekeli mun'we wa mudondrisi wa Nawu, afaka ayingeli kuvutisana loko, avoniki leswaku Yesu avayanguli swinene, avutisa aku: Xana hi wini a nawu luwu wukulu ku hinkwayu? 29Yesu amuyangula aku: Lowu wukulu hi lowu: Yingela, Israyele! Hosi Xikwembu Nkulukumba weru i Hosi yin'we ntsena.#12:29 Tolokiwo drin'wana drili: A Hosi i Xikwembu Nkulukumba weru, hi Yene ntsena a Hosi. 30#Lavisa Mlw 6:4-5. Randra Hosi Xikwembu Nkulukumba waku, hi mbilu yaku hinkwayu, ni hi hika draku hinkwadru, ni hi kuyanakanya kwaku hinkwaku, ni hi ntamu waku hinkwawu. 31#Lavisa Lv 19:18. Kutani awa vubiri hi vukulu hi lowu: Randra a wa-le-kwenu swanga heswi utirandrisaka xiswone wene. Akuna nawu wumbeni wutlulaka lowu. 32#Fananisa ni Mlw 4:35. Kutani a mudondrisi wa Nawu aku: Hi swone, we Mudondrisi! U hlayelimfuri hi kuhlaya leswaku Xikwembu Nkulukumba i mun'we ntsena, akuna mumbeni handle kwake, 33#Fananisa na Hx 6:6. ni leswaku hi fanekela kuva hi murandra hi mbilu hinkwayu, ni hi kuyanakanya hinkwaku, ni hi mintamu hinkwayu, na hifanela kurandra a wa-le-kweru swanga ha hine hi ntshima. Swiyapswa ngopfu kuyingiseta swileleto leswo kutlula kuhisa switlhavelo ni kuyentxa tin'wana timhamba ta kufana.

34Yesu avona leswaku a mudondrisi wa Nawu ayanguli swinene, kutani aku ku yene: Awu kule ni Mfumu wa Xikwembu Nkulukumba.

Ntrhaku ka leswi akahavangana mhunu lweyi angatiya kumuvutisa xa ntxhumu.

Kriste na Davida

(Mt 22:41-46; Lk 20:41-44)

35Yesu, na adondrisa a Tempeleni, avutisi aku: Xana a vadondrisi va Nawu hayini vaku Kriste i n'wana Davida? 36#Lavisa Mps 110:1. Yene Davida, hi ntshima yake, ahlayi hi kuhuhuteliwa hi Moya wa Kuxwenga aku:

Xikwembu Nkulukumba ati ku Hosi yanga:

Trhamisa avokweni dranga dra xinene,

nikondra nibeka a valala vaku a hansi ka minkondro yaku.

37Ke, loko Davida amutxhula Hosi, swingayentxisa kuyini xana Kriste ava n'wanakwe? A xitrhungu hinkwaxu afa ximuyingiseta hi kutrhava.

Yesu asandra vadondrisi va Nawu

(Mt 23:1-36; Lk 20:45-47)

38Na aya mahlweni adondrisa Yene afa aku: Tivonelani ku vadondrisi va Nawu lava varandraka kuratela hi makapulana ya kuleha, ni kulosiwa hi xihluwa hinkwaxu atihubyeni. 39Varandra switrhamu swakuranga amasinagogeni, ni le minkhubyini. 40Vatekelaka vafelwa a swavu na vatilandrula hi kuhamba swikhongoto swakuleha. Kambe Xikwembu Nkulukumba atavakhatisa ngopfu hinkonta ya leswo.

Nhlengo wa wansati wa mufelwa wa xisiwana

(Lk 21:1-4)

41Yesu atiki na atrhamisi kusuhi ni lomu vabekisaka kone nhlengo wa Yindlu ya Hosi, alavisa leswi xitrhungu xitxhelisaka xiswone mali anhlengweni. A vafuyi vanyingi afa vatxhela timali ta kuhlawa. 42Kakutlhasa mun'we wansati wa mufelwa wa xisiwana atxhela kone swimalinyana swibiri leswi swidringanaka ni masareji mabiri.#12:42 A tralwa dra kusungula lani drihlaya swimalana swibiri, inga swimalananyana leswi switrongo ngopfu afaka switirisiwa ankameni wa khale wa va-Girika. 43Kutani Yene avitana a vadondrisiwa vakwe, aku ku vone: Nihlayelamfuri nili ku n'wine a wansati lweyi wa mufelwa, wa xisiwana atxheli kutlula hinkwavu lava vatxheliki nhlengweni. 44Van'wana vanyiki ku leswi swivasaleliki na kasi yene anyiki hinkwaswu leswi anganaswu swa vutomi byake hinkwabyu.

Currently Selected:

Mrk 12: NTX2007

Highlight

Copy