Lk 5

Vadondrisiwa va kusungula va Yesu

(Mt 4:18-22; Mrk 1:16-20)

1Yesu afa ayimi nkingeni wa tiva dra Genizareta, na xitrhungu lexi afaka xidjula a kuyingela a ritu dra Xikwembu Nkulukumba ximukamanyeta.#5:1 Nakone dri vitaniwa tiva dra Galileya lavisa Mrk 6:53. 2Yesu avona a mabyatrhu mabiri mayimi nkingeni wa tiva, na vaphasi vahumi ku wone, vanhlampswa minkukutu. 3Anhingeniki ku drin'we dra wone, ledri dringa dra Simoni Petrosi, amukombela leswaku a dritrhindreta kulenyana ni sava. Loko atrhami byatrhwini, asungula kudondrisa switrhungu.

4Loko aheti kukhanela aku ku Simoni: Wetela ansingeni ni vanakuloni, n'wipeta minkukutu yenu n'wiphasa. 5Simoni ayangula aku: Mudondrisi, hitiri vusiku hinkwabyu, ahiphasanga ntxhumu. Kambe hinkonta ya ritu draku, nitapeta minkukutu. 6Loko vamipetile, vaphasa tinhlampfi leti tinyingi ngopfu, lakakuva a minkukutu yavu mikondra midjula kuhandruka. 7Kutani vakwehleta vaphasikulobye lava vanga byatrhwini drin'wana leswaku vatata vapfunisa. Vata, vatata mabyatrhu mabiri lakakuva madjula ni kutika. 8Atiki awaswivona Simoni Petrosi, akhisama mahlweni ka Yesu aku: Suka ku mine, hikusa ni mudohi. 9Simoni kun'we ni lava afaka venaye vahlamala ngopfu, hinkonta ya ntalu wa tinhlampfi leti afaka vaphasi tone. 10Hi swoswo navo va Yakobe na Yohana, a vana va Zebedeya lava afaka vali vaphasikulobye va Simoni. Kutani Yesu aku ku Simoni: Ungatxhave! Akusukela swoswi utava muphasi wa vhanu. 11Kuti loko vayi khisisa mabyatrhu yavu asaveni, vatrika hinkwaswu valandra Yesu.

Kuhanyisiwa ka lweyi wa nhlokonho

(Mt 8:1-4; Mrk 1:40-45)

12Kati loko Yesu ali mutini wa kukari, a wanuna lweyi afaka avabya hi nhlokonho, ahumelela kone. Loko avona Yesu awa hi mombo amukhongota aku: Hosi, loko uswirandra, wa swikota kunibasisa vuvabyi byanga. 13Yesu analavutiki voko amukhumba, aku: Naswirandra, basisiwa. Hi kuhlaya leswo, a nhlokonho yi suka ku yene. 14Kutani Yesu amulaya aku: Ungabyeli mhunu; ntsena famba uyatikombisa ku muprista, unyikela swakubasisiwa kwaku, leswi Moxe angaleleta swone, swiva xikombiso ku vone. 15Kambe a kutwala ka Yesu afa kutekisa a kuhangalaka, naswo switrhungu leswi swinyingi afa swita swi muyingela ni kuholisiwa vuvabyi bya swone. 16Kambe Yesu asuka aya ahuleni, lomu kutengiki, akuva aya khongota.

Kuhanyisiwa ka wa kuwonyana swiro

(Mt 9:1-8; Mrk 2:1-12)

17Hidrin'wanyana siku, Yesu afa adondrisa, na vafarisi ni vadondrisi va Nawu vatrhamisi kone, vapfa mitini hinkwayu ya le Galileya ni ya le Yudeya ni le Yerusalema.

A ntamu wa Hosi afa wuli na yene akuholiseni ka timbabyi. 18Kakutlhasa, vavanuna lava varwaliki hi lihlaka a mhunu wa kuwonyana a swiro. Afa vadjula a kumunhingenisa andlwini vamubeka mahlweni ka Yesu, 19loko vapfumala ka kumunhingenisa ha kone hinkonta ya vunyingi bya vhanu, vakhandriya a henhla ka lwangu, vantlhantula a switini, vaxikisa mbabyi na yili lihlakeni a makari ka hinkwavu amahlweni ka Yesu. 20Loko Yesu avona kupfumela kwavu, aku kumbabyi: Udrivaleliwi swihono swaku! 21Kutani vadondrisi va Nawu ni vafarisi vasungula a kutipimisela vaku: Xana yelweyi i mani, lweyi ahlayaka xisandru ku Xikwembu Nkulukumba? I Xikwembu Nkulukumba ntsena lweyi akotaka kudrivalela swihono. 22Kambe Yesu ativa leswi vaswiyanakanyaka, avayangula aku: Xana n'wipimisela yini xiswoswo? 23Xana kunabyala yini, akuhlaya niku: Udrivaleliwi swihono swaku, kumbe kuhlaya leswaku: Pfuka, utifambela? 24Kambe akuva n'witakombisiwa leswaku a N'wana wa Mhunu ani ntamu wa kudrivalela swihono misaveni, aku ku lweyi wa kuwonyana swiro: Nakubyela, pfuka, utlakula lihlaka laku, umuka a kaya kwaku. 25Hi nomu-lo lweyi wa kuwonyana swiro asekeleka mahlweni kwavu, atlakula a lihlaka drakwe ledri faka alatiwi kudrone, atimukela kaya kwake na atwalisa Xikwembu Nkulukumba. 26Hinkwavu vahlamala ngopfu vatwalisa Xikwembu Nkulukumba, vatala hi kutxhava, vaku: Namunhla hivoni mahlolana!

Yesu avitana Levi

(Mt 9:9-13; Mrk 2:13-17)

27Antrhaku ka swone, Yesu ahuma kutani avona muhakelisi wa tinemba, avito drakwe afa ali Levi, na atrhami andlwini ambangwini wa kuhakelisa tinemba. Yesu aku ku yene: Nilandre. 28Levi atrika hinkwaswu, asekeleka alandra Yesu. 29Ntrhaku, Levi ahambela Yesu a nkhuvu wukulu amutini wakwe; ni vunyingi bya vahlengisi, ni vambeni vhanu vatrhamisi kun'we vada navu. 30A vafarisi ni vadondrisi va Nawu vasungula a kun'unun'uta ku vadondrisiwa va Yesu, vaku: xana-ke n'widela yini ni vahlengisi ni swidohi? 31Yesu ayanguli aku ku vone: Lava vanga vatomi avadjuli n'anga, kambe ntsena lava vavabyaka. 32Anitelanga kuvitanela valulami, kambe ntsena a vadohi, akuva vandruluka vabuyela ku Xikwembu Nkulukumba.

Mhaka ya kutitrona

(Mt 9:14-17; Mrk 2:18-22)

33A vafarisi ni vadondrisi va Nawu vaku ku Yesu: A vadondrisiwa va Yohana Mubabatisi ni va vafarisi vatitrona ngopfu swakuda vahamba swikhongoto swinyingi, kambe a vadondrisiwa vaku vada ni kunwa minkama hinkwayu? 34Yesu avabyela aku: Xana n'wingaswikota a kusindrisa leswaku avatrhekeli va vukati vatitrona na mulovoli ahali na vone xana? 35Wutata a nkama lowu a mulovoli ataka susiwa ku vone, lahuke vatatitrona. 36Yesu ayengeta avabyela xifaniso aku: Akuna mhunu lweyi atremaka axiyambalwini lexi ximpswha a xihlama, arungela a xiyambalwini xakhale, hikuva loko ayentxisa xileswo, atava ahandruli xiyambalu lexi ximpswha kutani a xihlama leximpswha xingayelani ni xiyambalu lexi xakhale. 37Nakone avatxheli vhinyo ledri drimpswha aminkwameni leyi yakhale, suka vhinyo ledrimpswha dri handrula minkwama, xiswoswo avhinyo ni minkwama swihoneka. 38Kambe vhinyo ledrimpswha swifanekeli dritxheliwa aminkwameni leyi mimpswha. 39Angakone lweyi, loko anwi vhinyo ledri drakhale, ntrhaku angahadjulaka ledri drimpswha, hikusa angaku: Kunandrika ledri drakhale.

Currently Selected:

Lk 5: NTX2007

Highlight

Copy