Lk 6

Yesu ni Savata

(Mt 12:1-8; Mrk 2:23-28)

1Kuhumeleli leswaku hi Savata drin'we loko Yesu ahundra makari ka masimu, a vadondrisiwa vakwe vatrhova switrhetrho swa tirigo vaswiswoswa hi mandla vada tinhleke ta swone. 2Avan'we va vafarisi vavutisa vaku: Xana n'wiyentxela yini leswi swingapfumeleliwikiki kuswiyentxa hi Savata? 3Yesu ayangula aku ku vone: Xana an'wingi hlaya leswi Davida angaswiyentxa loko atwa ndlala, yene ni lava afaka vali na yene? 4Leswi anganhingena a Tempeleni, ateka makati ya kugandrela Xikwembu Nkulukumba ha wone, ada, ava anyika ni lava afaka vali na yene, lawa mafanekelaka kudiwa ntsena hi vaprista. 5Ahangaku ku vone: A N'wana wa Mhunu i Hosi ni ku dro Savata.

Wanuna wa kuwonyana voko

(Mt 12:9-14; Mrk 3:1-6)

6Hi drin'wana Savata, Yesu anhingena asinagogeni asungula kudondrisa. Kone afa kuni mhunu lweyi a voko drakwe dra xinene afaka driwomelelile. 7A vadondrisi va Nawu ni vafarisi vaxiyisisa loko kumbe xana atamuholisa hi Savata, akuva vatakuma a xa kumurambela ha xone. 8Kambe Yesu hi kutiva a miyanakanyu yavu, aku ku lweyi wakuwomelela voko: Sekeleka uyima kola makari. Lweyi wanuna asekeleka ayima. 9Yesu aku ku vone: Nan'wivutisa, xana kupfumeleliwa a kuyentxa yini hi Savata, a kuyentxa leswi swinene kumbe leswi swakubiha? A kuhanyisa mhunu kumbe a kumutrika afa? 10Aralarala hinkwavu lava vamutrandreliki, kutani aku ku mhunu lweyo: Nalavuta a voko draku. Ayentxisa xiswoswo, a voko drakwe drihanyisiwa. 11Kambe vone vahlundruka ngopfu, vasungula kukhanelisana hileswaku vangakota a kuyentxa yini ha Yesu.

Vapostola lava va khume na vabiri

(Mt 10:1-4; Mrk 3:13-19)

12Amasikwini lawo, Yesu asuka aya nhaveni a kuyakhongota, aheta vusiku hinkwabyu hi kukhongota. 13Byitiki byaxa, avitana vadondrisiwa vakwe, ahlawula makari kwavu khume na vabiri, avatxhula vapostola. Anga lava: 14Simoni lweyi amutxhuliki Petrosi, na Andreyasi, makwavu, Yakobe, Yohana, Filipi, Bartolomewu, 15Matewu, Tomasi, Yakobe n'wana Alifewu, Simoni lweyi va liki i Muhiseki, 16Yudasi a n'wana Yakobe, na Yudasi Iskariyota lweyi angandruluka muwongi.

Yesu adondrisa ni kuhanyisa

(Mt 4:23-25)

17Yesu afulameli navu hi le nhaveni, ayayima alivaleni. Kone afa kutlhangani vunyingi bya vadondrisiwa vakwe ni vhanu vanyingi va tiko drale Yudeya, ni le Yerusalema ni le kingeni wa le Tiri na Sidoni;#6:17 Luka ha kanyingi atirisa ritu dra Yudea akuva ahlaya Palestina hinkwadru. Lavisa 1:5; 4:44; 6:17; 7:17; 23:5. 18afaka vateli a kutata yingela Yesu ni kuva vaholisiwa vuvabyi byavu. Na vone lava vaxanisekaka hi mimoya lemimfani afa vahanyisiwa. 19Mfuri hinkwavu vhanu afa vadjula kukhumba Yesu, hikusa afa vahanyisiwa hinkwavu hi ntamu lowu afaka wuhuma ku yene.

Makateko ya xihlayelamfurini

(Mt 5:1-12)

20Yesu alavisa a vadondrisiwa vakwe, aku ku vone:

N'wikatekile n'wine swisiwana,

hikusa a Mfumu wa Xikwembu i wenu.

21N'wikatekile n'wine n'wingani ndlala swoswi,

hikusa n'witaxurisiwa.

N'wikatekile n'wine n'widrilaka swoswi,

hikusa n'witahleka.

22N'witatovoka loko a vhanu van'wivenga, van'wihlongola, van'wiruka, vasandra ni vito drenu swanga hi loko dribihile, hinkonta ya N'wana wa Mhunu. 23Trhavani ngopfu hi siku ledro, n'wiva n'witrhavisisa, hikusa a hakelo drenu dritava drikulu atilweni. Hikusa na vone vatatana vavu vaxanisisi xiswoswo a vaprofeta.

24Kambe, yowee, n'wine vafuyi,

hikusa n'wikumi khale a kumiyetiwa kwenu.

25Yowee, n'wine lava vadaka vaxura swoswi,

hikusa n'witava ni ndlala.

Yowee, n'wine n'wihlekaka swoswi,

hikusa n'witadrila n'wiva n'wihlatiyela.

26Yowee n'wine loko vhanu hinkwavu van'wikhensa, hikusa a vatatana vavu vayentxisi xiswoswo ku vaprofeta va madrimi.

Kurandra valala

(Mt 5:38-48)

27Kambe nan'wibyela n'wine n'winiyingelaka nili ku n'wine: Randrani valala venu, yentxelani leswi swinene lava van'wivengaka. 28Hlayelani matovoko lava van'wirukaka, n'wikhongotela ni lava van'wixanisaka. 29Lweyi akuhodlotaka rama, mukombetele ni drin'wana. Ni lweyi akuwutlelaka a djansi, ungamuyalele ni xo xiyambalu. 30A mun'wana-ni-mun'wana lweyi akukombelaka, munyike, ni loko mun'we akuwutlela leswi swinga swaku, ungamurameli. 31Leswi n'wirandraka akuva a vhanu van'wiyentxela swone, vayentxelani swoleswo na n'wine

32Loko n'wirandra ntsena lava van'wirandraka, n'witakuma a hakelo muni ku Xikwembu Nkulukumba xana? Hikusa na vone vadohi varandra lava vavarandraka. 33Ni loko n'wiyentxa leswi swinene ku lava van'wiyentxelaka leswi swinene, n'witakuma hakelo muni xana? Na vone vadohi vayentxisa xiswoswo. 34Ni loko n'wivolekisa ku lava n'widumbaka leswaku n'witatlhela n'wiswikuma ku vone, n'witakuma hakelo muni xana? Hikusa na vone vadohi vavoleka vadohi-kulobye, akuva vata tlhela vakuma leswi swidringanaka ku vone. 35Kambe randrani a valala venu, n'wivayentxela leswi swinene, n'wiva n'wivolekisa na n'wingalaviseli hakelo. Hikone-ke a hakelo drenu dritakava drikulu, kutani n'witava vana va Xikwembu Nkulukumba wa le Henhla-henhla, hikusa na yene ani vumbilu ku lava vangativikiki kutlangela ni lava vamfani. 36Vanani ni vunene swanga heswi Tatana wenu angani vunene.

Unga yavanyisi van'wana

(Mt 7:1-5)

37N'wingayavanyiseni vambeni akuva n'wingatiyavanyisiwa. N'wingabekeli van'wana milandru, akuva n'wingatibekeliwa milandru. Drivalelani van'wana na n'wine n'witadrivaleliwa. 38Hananani, na n'wine, n'witahananiwa. Vatan'wihanana a swifuveni swenu a mpimu lowu wunene, lowu hlukuhletiwiki, lowu wukhapaka. Hikusa a mpimu lowu n'wipimaka ha wone, na n'wine n'witapimiwa ha wone.

39Yesu avabyela a xifaniso aku: Xana a wakufa-mahlu angaswikota a kufambisa a wakufamahlo kulobye? Anha vangawi kheleni hi vubiri byavu xana? 40A mudondrisiwa angatluli mudondrisi wakwe, kambe a mudondrisiwa wini ni wini lweyi adondrisiwiki swinene, atafana ni mudondrisi wakwe. 41Xana ulavisela yini a ntwanyi atihlweni dra makwenu, na ungavoni a ntrandra lowu wunga tihlweni draku? 42Xana ungahlayisa kuyini ku makwenu uku: Makweru, tana nisusa a ntwanyi lowu wunga tihlweni draku, kasi wene awuwuvoni a ntrandra lowu wunga tihlweni draku? N'wamandrendre! Ranga ususa a ntrandra atihlweni draku, kahangava kone-ke utakavonisisa a kususa a ntwanyi atihlweni dra makwenu.

A nsinya ni mihandru ya wone

(Mt 7:16-20; 12:33-35)

43Akuna nsinya lowu wunene wubekaka a mihandru ya kubiha, nakone akuna nsinya wa kubiha wubekaka a mihandru ya minene. 44A nsinya wini ni wini wutibyiwa hi mihandru ya wone. A makuwa amakhayiwi amitweni, na vone a vana va vhinya avakhayiwi mimpumbulweni. 45A mhunu lweyi munene ahumexa leswi swinene anhlengweni leyi yinene ya mbilu yake, na yene lweyimfani ahumexa leswi swimfani anhlengweni leyi yimfani ya mbilu yake. Hikusa a nomu wakwe wukhanela leswi switaliki ambilwini yake.

Kulandra a Ritu dra Xikwembu Nkulukumba

(Mt 7:24-27)

46N'winihlayela yini: Hosi! Hosi! Na n'wingayentxi leswi nihlayaka swone? 47Lweyo ni lweyo, lweyi ataka ku mine, ayingela a maritu yanga ava amayentxa, nitan'wikomba lweyi afanaka na yene: 48afana ni mhunu lweyi ayakiki a yindlu, akeliki aribyeni kuyeta swinene, abeka kone a masungulu ya yindlu. A ntita yi tlhasa, a nambu wukukumuka, a mavimbi maba a yindlu leyo hi ntamu, kambe amakotanga kuyitrekatrekisa hikusa afa yiyakiwi swinene. 49Kambe lweyi ayingelaka leswi niswihlayaka na angaswiyentxi, afana ni mhunu lweyi ayakiki a yindlu yake apfunyeni na yingena masungulu ya kutiya. A nambu wutala wuyiba hi ntamu, yiwa, yimbundrumukela.

Currently Selected:

Lk 6: NTX2007

Highlight

Copy