Lk 4

Kudringiwa ka Yesu

(Mt 4:1-11; Mrk 1:12-13)

1Yesu asuki anambyeni wa Yordana na atali hi Moya wa Kuxwenga. A Moya wumuyisi huleni, 2atrhami kone mune wa makume (40) ya masiku na adringiwa hi Diyavulosi. Angadi ntxhumu hi masiku wolawo, antrhaku atwa ndlala. 3Kutani Diyavulosi aku ku yene: Loko ke uli N'wana wa Xikwembu Nkulukumba hlaya leswaku a ribye ledri drindruluka a kati. 4#Lavisa Mlw 8:3. Yesu amuyangula aku: Kutraliwi leswaku: ‘A mhunu angaka angahanyi hi kati ntsena.’

5Kutani Diyavulosi amuntlhantukelisa henhla, amukomba matiko hinkwawu 6aku ku yene: Nitakunyika a ntamu lowu hinkwawu ni kuphatima ka matiko lawa, hikusa ninyikiwi swone, ninganyika lweyi nimurandraka. 7Wene-ke, loko unikhisamela unigandrela, hinkwaswu leswi switava swaku. 8#Lavisa Mlw 6:13. Yesu ayangula aku ku yene: Kutraliwi leswaku: ‘Utakhisamela Hosi Xikwembu Nkulukumba waku, ugandrela yene ntsena.’

9Diyavulosi atlhela ayisa Yesu a Yerusalema, aya mubeka axihlungwini xa Tempele, aku ku yene: Loko-ke uli N'wana wa Xikwembu Nkulukumba dladlama hansi, 10hikusa kutraliwi leswaku:

Xikwembu Nkulukumba ata leleta a tintrumi takwe

leswaku swikubekisa ni kukumpfekela

11 # Lavisa Mps 91:11-12. switakuyamukela hi mavoko ya swone,

leswaku a minenge yaku mingavavisiwi hi maribye.

12 # Lavisa Mlw 6:16. Yesu ayangula aku ku yene: Nakone kutraliwi leswaku: ‘Ungadringi Hosi Xikwembu Nkulukumba waku.’

13Loko Diyavulosi adringi Yesu hi tindlela hinkwatu, atrhindreki kule na yene hi nkamanyana.

Ntiro wa Yesu a Galileya

(Mt 4:12-17; 13:53-58; Mrk 1:14-15; 6:1-6)

14Kutani Yesu atlhelela Galileya hi ntamu wa Moya wa kuxwenga, a kutwala kwake kuhangalaka hi tiko hinkwadru. 15Afa avadondrisa amasinagogeni yavu, na adrumisiwa hi vhanu hinkwavu.

16Kutani Yesu aya Nazarete lomu afaka a kuleli kone, anhingena asinagogeni hi siku dra Savata hi matolovelela yake, kutani asekeleka ayimela kuhlaya a matralwa.#4:16 mu-Yuda wini ni wini lweyi anga nkulu afa anga hlaya tralwa drakuhlawuleka, hi kupfumeleliwa hi murangeli wa Sinagoga. 17Vamunyika a buku dra muprofeta Ezaya; atiki analavuta a buku akuma lomu kutraliwiki leswaku:

18A Moya wa Hosi wule henhla kwanga,

hikusa yi nitotile,

akuva nidrungulela swisiwana a Ivangeli,

yi nirumi kuhuwelela kuntrhunxeka ku lava vabohiwiki,

ni kubuyisela kuvona ku lava vakufa-mahlu,

ni kuntrhunxa lava vaxanisiwaka;

19ni kurera a nyiwa ya lembe drimpswha dra Hosi.

20Ntrhaku Yesu asongiki a buku adritlhelisela ku nandra, kutani atrhamisa. Hinkwavu lava afaka vali sinagogeni vamupondrolela mahlu. 21Yesu ahanga sungula kuvabyela aku: Namunhla a tralwa ledri n'widriyingelaka drihetisekile. 22Hinkwavu afa vahlaya swakuxonga ha Yesu, vahlamala hi maritu ya kunyoxisa lawa amahlayaka. Vavutisa vaku: Xana yelweyi ahiye n'wana Yosefa xana?

23Yesu ahanga vayangula aku: Kunene n'witanibyela a xihlayahlaya, lexi xaku: We n'anga tihanyise ha swaku. Hinkwaswu leswi hi swiyingeliki leswaku u swiyentxi Kapernawume, swiyentxe ni kola tikweni draku. 24Ayengeta aku: Nihlayela mfuri nili ku n'wine: akuna muprofeta lweyi ayamukeliwaka tikweni dra le kwavu. 25Nihlayelamfuri nili, a vavasati vamafelwa afa vali vanyingi, amasikwini ya muprofeta Eliya a Israyele, loko a tilo dripfaliwile, kungavi na mpfula, ha malembe mararu na ntlhanu wa tihweti na yin'we, kutani kuhumeleli ndlala leyi yikulu atikweni hinkwadru. 26Kambe Eliya angarumiwanga ni ku mun'we wa mafelwa ya va-Israyelea, ntsena arumiwi ku lweyi wa le Sarepta, atikweni dra le Sidoni. 27Na swone afa kuni vhanu vanyingi va nhlokonho a Israyele ankameni wa muprofeta Elixa, kambe akahanyisiwanga ni mun'we ku vone, ntsena Kahanyisiwi Naamana wa le Siriya.

28Hinkwavu lava afaka vali sinagogeni, loko vayingela maritu lawa Yesu afaka amahlaya, vahlundruka ngopfu. 29Vasekeleka, vakokovisela Yesu ahandle ka muti. Vamuyisa xiweni xa nhava, leyi a muti afaka wuyakiwiki henhla ka yone, akuva vamususumetela hansi, 30kambe Yesu aphonyota, ava akhaluta hi le makari kwavu atifambela.

Mhunu wa moya lowu mfani

(Mrk 1:21-28)

31Yesu ayi Kapernawume amutini wa le Galileya, adondrisa vhanu hi masavata. 32Kutani a vhanu vahlamala hi madondrisela yake, hikusa a kukhanela kwake afa kuli loku ka ntamu.

33Asinagogeni afa kuni mhunu lweyi afaka ani moya wa demoni dra xambya, afaka abandlukana ngopfu, aku: 34Ha! Amhaka yeru na wene hi yini, Yesu wa le Nazarete? Xana uteli kuta hi suvisa xana? Nakutiva lweyi unga yene, u Muxwengi lweyi arumiwiki hi Xikwembu Nkulukumba. 35Yesu awutshinya aku: Miyela, huma ku mhunu lweyi! A moya lowumfani wumutlatlalata mahlweni ka hinkwavu wuhuma, na wungamuvavisanga. 36Kutani hinkwavu vahlamala, vavutisana vaku: Xana swihlaya yini leswi xana? Leswi aleletaka hi vuhosi ni ntamu a mimoya lemimfani, yone mimuyingela, mihuma! 37Kutani a kutwala ka Yesu kuhangalaka amimbangwini hinkwayu ya tiko.

Yesu ahanyisa mamana wa nkata Petrosi

(Mt 8:14-17; Mrk 1:29-34)

38Yesu asukiki asinagogeni, anhingena andlwini ya Simoni. A mukon'wana wa xisati wa Simoni afa avabya, ani kuhisa kukulu ka miri, vahanga mukombelela ku Yesu akuva amuhanyisa. 39Yesu akaramiki kusuhi na yene, akhwavela kuhisa ka miri, kutani kahanga mutrika. Hi nomu-lo apfuka, asungula kuvatirela.

40Loko a dambu dripela, hinkwavu lava afaka vani timbabyi ta mavabyi ya tinxaka-xaka vatibuyisa ku Yesu, yene antlhanteka a mavoko ku mun'wana-ni-mun'wana wavu, avahanyisa. 41Ni ku lava vanyingi afa kuhuma ni mademoni lawa afaka mabandlukana maku: Wene, u N'wana wa Xikwembu Nkulukumba! Kambe Yesu amakhwavela akuva mangakhaneli hikusa afa mamutiva leswaku i Kriste.

Yesu ativisa Ivangeli

(Mrk 1:35-39)

42Loko byixile Yesu ahuma handle ka muti aya huleni. Kutani a vhanu lava vanyingi va mudjula, vata laha afaka ali kone, vamudrivata akuva anga hambani na vone. 43Kambe Yesu avabyela aku: Nifanekeli kuya tivisa Ivangeli ya Mfumu wa Xikwembu Nkulukumba ni le mitini min'wana. Hikusa nirumeliwi swone. 44Kutani Yesu aya dondrisa amasinagogeni ya tiko dra Yudeya.

Currently Selected:

Lk 4: NTX2007

Highlight

Copy