Yhn 8

Yesu a drivalela wansati wa vumbuye

1Ntrhaku Yesu aya Nhaveni ya Minhlwari. 2Hi siku ledri landrelaka ampundrwini, atlhelela Ndlwini ya Hosi; a vhanu hinkwavu vata ku yene. Kolahu Yesu atrhama, asungula kuvadondrisa. 3Kutani vadondrisi va Nawu ni vafarisi vatisa wansati lweyi akhomiwiki vumbuyeni. Vamuyimisa mahlweni ka hinkwavu, 4kutani vaku ku Yesu: Mudondrisi, a nsati lweyi akumiwi na ayentxa vumbuye. 5#Lavisa Lv 20:10; Mlw 22:22-24. Moxe ahileleti Nawini kukhandla hi maribye a vavasati vakunhati. Xana wene, uliyini ke? 6Afa vahlaya leswo hi kumudringa, leswaku vatakuma mhaka leyi vangamurambelaka ha yone. Kambe Yesu akarama, atralatrala hansi hi litiho. 7Kambe leswi afaka vaphikelela kumuvutisa, ahangawololoka, aku ku vone: Lweyi angekena xihono, amakari kwenu, arange amutxukumetela hi ribye. 8Atlhela akarama, atralatrala. 9Kutiki loko vayingeli leswo, vahuma ha mun'we ha mun'we, kusungula hi lava vakulu, Yesu asala vuswake kun'we ni lweyi wansati afaka ayimi makari. 10Kutani Yesu awololoka, aku ku yene: Wansati, vakwini lava vakurambeliki xana? Akuna ni mun'we lweyi a kuyavanyisiki xana? 11Aku: Angakone, Hosi. Yesu aku ku yene: Na mine, anikuyavanyisi. Famba, ungahatlheli udoha.

Yesu, Livaningo dra misava

12 # Fananisa na 9:5; Ezy 49:6; Mt 5:14. Kutani Yesu atlhela avulavula navu, aku: Hi mine livaningo dra misava. Lweyi anilandraka angaka angafambi munyameni, kambe atava ni livaningo dra vutomi! 13A vafarisi vahangaku ku yene: Wene utihambela vumboni ha vuswaku! A vumboni byaku abyitiyanga. 14Yesu avayanguli, aku: Ni loko nitihambela vumboni, a vumboni byanga byitiyile, hikusa nitiva lomu nihumaka kone; kambe n'wine an'witivi lomu nihumaka kone, ni lomu niyaka kone. 15N'wine, n'wiyavanyisa hi ndlela ya vhanu; mine aniyavanyisi mhunu. 16Kambe, ni loko niyavanyisa akuyavanyisa kwanga hi loku kunene; hikusa ani vuswanga, Tatana lweyi anirumiki ana mine. 17#Fananisa ni Mlw 17:6; 19:15; Tnh 35:30. Anawini wenu kutraliwi leswaku a vumboni bya vhanu vabiri byitiyile. 18Hi mine lweyi nitihambelaka vumboni, na yene Tatana, lweyi anirumiki, ahamba vumboni henhla kwanga. 19Vaku ku yene: A tatana waku akwini? Yesu ayangula, aku: An'winitivi, nambi ali Tatana wanga an'wimutivi; loko afa n'winitivile, an'witativa ni Tatana wanga. 20Yesu ahlayi maritu lawa loko ali kari adondrisa a Tempeleni, ambangwini lowu afaka kubekiwa ku wone a swibya swa nhlengo. Kolahu akuvanga na mhunu lweyi angamukhoma, hikusa a nkama wakwe afa wungasinatlhasa.

Hi mani Yesu?

21Yesu ayengeta aku ku vone: Nafamba, kutani n'wita nidjula, kambe n'witafela akudoheni kwenu. Laha niyaka kone, n'wingaka n'wingayi. 22Kolahu va-Yuda vaku: Xana atatisunga, leswi aliki: Laha niyaka kone, n'wingaka n'wingayi, xana? 23Aku ku vone: N'wine n'wi va lana hansi; mine ni wa le henhla; n'wine n'wi va misava leyi; mine ani wa misava leyi. 24Hileswo-ke nin'wibyeli leswaku n'witafela swihonweni swenu; hikusa loko n'wingapfumeli leswaku Mine ni yene#8:24 A mahlayela yaku Mine ni yene, hi tlhelo drin'we mahidrimuxa a kutikombisa ka leswaku Yene i murumiwa; hi tlhelo drin'wna, mafambelana ni kutikombisa ka vukulukumba: Khm 3:14; Ezy 43:11; 45:5; 48:12. , n'witafela swihonweni swenu.

25Kolahu vaku ku yene: Hi wene mani? Yesu aku ku vone: Swanga hi leswi nin'wibyelisiki xi swone akusunguleni#8:25 Man'wana matolokela mali: Nin'wibyelisi kuyini akusunguleni? 26Afa nini leswi swinyingi ningaswihlayaka ni kuswiyavanyisa ahenhla kwenu. Kambe lweyi anirumiki i xihlayelamfuri ha vuswake; kutani leswi niswiyingeliki ku yene, nitivisa misava.

27Vone ava yingelisisanga leswaku afa akhanela navu hita Tatana. 28#Fananisa na 3:14; Lavisa 8:24 ni xikombisu. Hilahu Yesu angaku ku vone: Loko n'witava n'witlakuxi N'wana wa Mhunu, hi kone n'witakativa leswaku hi mine lweyi, kutani na swone n'witativa leswaku aniyentxi ntxhumu hi kurandra kwanga. Kambe nihlaya leswo hi laha Tatana anidondrisiki ha kone. 29Lweyi anirumiki, ana mine; anganitrikanga vuswanga, hikusa masiku hinkwawu niyentxa leswi swimutrhavisaka.

30Loko ali kari ahlaya timhaka leto, lava vanyingi vapfumela ku yene. A xihlayelamfuri i muntrhunxi

31Yesu aku ku va-Yuda lava afaka vapfumeli ku yene: Loko n'witiyisela ritwini dranga, n'witava vadondrisiwa vanga ha kunene. 32Na swone n'witativa xihlayelamfuri, kutani a xihlayelamfuri xitan'wintrhunxa. 33#Fananisa na Mt 3:9. A va-Yuda vamuyangula, vaku: Hi vana va Abrahamu; ahingiva swikarawa swa mhunu ni siku ni drin'we. Ungahlayisa kuyini uku: Hitava lava vantrhunxiwiki, xana? 34Yesu avayangula, aku: Nan'wibyela leswaku mun'wana ni mun'wana lweyi ayentxaka xihono, i xikarawa xa xihono. 35A xikarawa axitrhameli vugamu a kaya, kambe lweyi atrhamaka kaya masiku hinkwawu i N'wana. 36Hikolahu ke, loko N'wana an'wintrhunxa n'witava lava vantrhunxiwiki ha kunene. 37Naswitiva leswaku n'wi vana va Abrahamu, kambe n'widjula kunidlaya, hikusa a ritu dranga adri nhingenisisi andreni kwenu. 38Mine nikhanela hi leswi niswivoniki ku Tatana, kambe n'wine n'wiyentxa leswi n'wiswiyingeliki ku Tatana wenu. 39Vamuyangula, vaku: A tatana weru hi Abrahamu. Yesu aku ku vone: Loko afa n'wi vana va Abrahamu, an'witatira mintiro ya Abrahamu. 40Kambe swoswi n'widjula kunidlaya, mine nin'wibyeliki xihlayelamfuri lexi nixiyingeliki ku Xikwembu Nkulukumba! Leswo Abrahamu angaswiyentxanga. 41N'wine n'wiyentxa mintiro ya tatana wenu. A va-Yuda vaku: Hine ahi vana va vumbuye. Hina Tatana mun'we ntsena, anga Xikwembu Nkulukumba. 42Yesu aku ku vone: Loko afa Xikwembu Nkulukumba ali tatana wenu, afa n'witanirandra, hikusa mine nipfa ku Xikwembu Nkulukumba. Anitanga hi kutisungulela, kambe hi Yene anirumiki. 43Hikola kayini n'wingayingelisisi leswi nihlayaka swone xana? Hi leswi n'wihlulekaka kuyingela ritu dranga. 44N'wine n'wipfa ku tatana wenu, anga Diyavulosi, kutani n'wirandra kulandra a kunavela kwake. Lweyo i mudlayi wa vhanu ni le kusunguleni, kutani angatrhamanga xihlayelamfurini; hikusa akuna xihlayelamfuri andreni kwake. Loko ahlaya madrimi ahlaya leswi swinga kone ambilwini yake, hikusa i muhembi, i tatana wa kuhemba. 45Kambe leswi mine nihlayaka xihlayelamfuri, an'wipfumeli ku mine. 46Hi mani ku n'wine lweyi angakombaka xidoho xanga xana? Loko nihlaya xihlayelamfuri, hikola kayini n'wingapfumeli ku mine xana? 47Lweyi apfaka ku Xikwembu Nkulukumba ayingela maritu ya Xikwembu Nkulukumba. Leswi swiyentxaka leswaku n'wingayingeli, hileswaku an'wi va Xikwembu Nkulukumba.

Yesu na Abrahamu

48 # Lavisa 7:20 ni xikombisu. A va-Yuda vayangula, vaku ku yene: Xana ha hemba loko hiku, u mu-Samariya, ni leswaku uni demoni xana? 49Yesu ayangula, aku: Mine anina demoni, kambe nitxhava Tatana wanga, kasi n'wine an'winitxhavi. 50Anitidjuleli kutwalisiwa; Tatana hi yene lweyi adjulaka kunitwalisa, na swone awaniyavanyisela. 51Nihlayelamfuri nili ku n'wine, a mhunu lweyi abekisaka ritu dranga, angaka angavoni lifu hi la kungahelikiki.

52 # Lavisa 8:24 ni xikombiso. A va-Yuda vaku ku yene: Swoswi haswitiva leswaku uni demoni, Abrahamu afile na vone vaprofeta vafile; kutani wene uli: Loko mhunu abekisa ritu dranga, angaka angafi hi la kungahelikiki. 53Xana u nkulu kutlula tatana weru Abrahamu? Yene afile na vone vaprofeta vafile. Kolahu, udjula kutiyentxa mani? 54Yesu ayangula, aku: Loko ni titwalisa ha vuswanga akutwala kwanga akupfuni ntxhumu. Lweyi anitwalisaka hi Tatana wanga lweyi n'wiliki: I Xikwembu Nkulukumba weru; 55kasi an'wimutivi, kambe mine namutiva. Loko afa niku: animutivi, afa ningava muhembi kufana na n'wine. Kambe mine namutiva, kutani nibekisa ritu drakwe. 56A tatana wenu Abrahamu, atrhavile hi leswi afaka atakavona siku dranga; adrivonile, ava atrhava. 57Kolahu va-Yuda vaku ku yene: Awusiva wa ntlhanu wa makume (50) ya malembe, kutani uli uvoni Abrahamu xana? 58Yesu aku ku vone: Hi leswaku na Abrahamu angasinatumbuluka, mine afa nili lweyi ninga yene. 59Kutani varola maribye akuva vamutxukumetela, kambe Yesu atumbela, kutani ahuma a Tempeleni.

Currently Selected:

Yhn 8: NTX2007

Highlight

Copy