Yhn 20

Kupfuka ka Yesu akufeni

(Mt 28:1-8; Mrk 16:1-8; Lk 24:1-12)

1Ampundrwini wa siku dra kusungula dra vhiki#20:1 A siku dra kusungula dra vhiki, amahlayeleni yeru namuhla i Sonto., Maria wa Magadala avindruka aya xireni na kaha mphumile, kutani aya kuma leswaku a ribye drisusiwile amahlweni ka xira. 2Ahanga atrutruma aya ku Simoni Petrosi, ni le ku mudondrisiwa mun'wana lweyi Yesu afaka amurandra, ayaku ku vone: Vasusi Hosi axireni, kutani ahikutivi lomu vayibekiki kone.

3Petrosi ni mudondrisiwa mun'wana vahangahuma vatrutruma vaya xireni. 4Afa vatrutruma kun'we hi vubiri byavu; kambe a mudondrisiwa mun'wana asiya Petrosi aranga ayatlhasa xireni. 5Aku awakarama, avona makapulana me hansi; kambe anganhingenanga. 6Kahanga tlhasa Simoni Petrosi lweyi afaka amulandra, kutani anhingena xireni, avona makapulana me hansi; 7kambe a nturu lowu afaka wutrondriyeli nhloko ya Yesu afa wunge kun'we ni makapulana mambeni, kambe afa we hindriwa, wubekiwa hi xiri. 8Antrhaku kaleswo a mudondrisiwa mun'wana lweyi arangiki kutlhasa xireni, nayene anhingena aswivona, kutani apfumela. 9#Lavisa Mps 16:10. Hikusa afa vangasiyingelisisa a Tralwa ledri drihlayaka leswaku afaneli kupfuka kufeni. 10Kutani a vadondrisiwa vatlhelela ma kaya kwavu.

Yesu ativonekisa ku Maria wa Magadala

(Mt 28:9-10; Mrk 16:9-11)

11Maria afa ayimi handle kusuhi ni xira, na adrila. Loko akaramela axireni na adrila, 12avona swirun'wa swibiri leswi afaka swiyambali swa ntlhohe, na switrhamile, xin'we atinhlokweni, a xin'wana aminengeni, laha ntrumbu wa Yesu afaka wulatiwi kone. 13Kutani swiku ku yene: Wansati, xana udrilela yini? Aku ku swone: Hi leswaku vasusi Hosi yanga, kutani anikutivi lomu vayibekiki kone. 14Loko ahlayi leswo, andrulukela ntrhaku, ahangavona Yesu na ayimile, kambe angamutivanga leswaku hi Yesu. 15Yesu aku ku yene: Wansati! Udjula mani xana? Yene hi kuyanakanya leswaku i mulaviseli wa nsimu, aku ku yene: hosi, loko umususile nibyele lomu umubekiki kone, kutani nitayamuteka. 16Yesu aku ku yene: Maria! Yene andruluka, aku ku Yesu, hi Xiheberu: Raboni! #20:16 Raboni: ritu ledri dritlhamuxelaka leswaku Mudondrisi. 17Yesu aku ku yene: Unganikhumbe, hikusa anisintlhantukela ku Tatana. Kambe famba ku vamakweru uyavabyela leswaku nintlhantukela ku Tatana wanga ni Tatana wenu, ku Xikwembu Nkulukumba wanga, ni Xikwembu Nkulukumba wenu. 18Maria wa Magadala aya, ayabikela vadondrisiwa leswaku avoni Hosi, ni leswaku yimubyeli swoleswo.

Yesu ativonekisa ku vadondrisiwa

(Mt 28:16-20; Mrk 16:14-18; Lk 24:36-49)

19Ni madambu ya siku droledro dra kusungula dra vhiki, na kuti mphu, kasi a tinyangwa ta mbangu lowu a vadondrisiwa afaka vali ku wone, afa tipfaliwile hikola ka kutxhava va-Yuda; Yesu atatayima makari kwavu, aku ku vone: A kurula akuve na n'wine! 20Loko ahlayi leswo, avakomba mandla yake ni reve drakwe. A vadondrisiwa vanyoxa ngopfu hi kuvona Yesu. 21Yesu atlhela aku ku vone: A kurula akuve na n'wine! Swanga heswi Tatana anirumiki, na mine nan'wiruma. 22Loko ahlayi leswo, avahuhutela, aku ku vone: Yamukelanani Moya lowu wa kuxwenga. 23#Fananisa na Mt 16:19; 18:18. Loko n'widrivalela vhanu a swidoho swavu, switadrivaleliwa ku vone; loko n'wingavadrivaleli, vangadrivaleliwi swihono swavu.

Kuganaganeka ka Tomasi

24Tomasi lweyi valiki i Didimusi, mun'we wa lava va khume na vabiri, afa angenavu loko Yesu ata. 25Kutani a vadondrisiwa van'wana vamubyela vaku ku yene: Hivoni Hosi. Yene aku ku vone: Loko ninge kuvona timbanga ta timhengu amavokweni yake, ni loko ninge kunhingenisa litiho atimbangeni ta timhengu, nibeka ni voko a reveni drakwe, ningaka ningapfumeli.

26Loko kuhundri masiku ya ntlhanu na mararu, a vadondrisiwa vakwe afa vali kone ndlwini nangweso, Tomasi afa na yene ali navu. Yesu ata na tinyangwa tipfaliwile, ayima makari kwavu, aku: A kurula akuve na n'wine! 27Kutani aku ku Tomasi: Tisa litiho halenu, ulavisa ni swiyandla swanga; nalavuta voko draku, udribeka reveni dranga. Ungahavi mukaneti, kambe vana mupfumeli! 28Tomasi ayangula, aku ku yene: Hosi yanga ni Xikwembu Nkulukumba wanga! 29#Fananisa na I Ptr 1:8. Yesu aku ku yene: Leswi univoniki Tomasi, upfumelile. Vanindjombo lava vanganivonangakiki, nambi swilitanu vapfumelile.

30 # Lavisa 2:11 ni xikombiso. Yesu ayentxi mahlolana man'wana lawa manyingi amahlweni ka vadondrisiwa vakwe, lawa mangatraliwangakiki abukwini ledri. 31Kambe a timhaka leti titraliwi akuva n'wipfumela leswaku Yesu i Kriste, N'wana wa Xikwembu Nkulukumba, ni leswaku hi kupfumela, n'wiva ni vutomi avitweni drakwe.

Currently Selected:

Yhn 20: NTX2007

Highlight

Copy