Yhn 18

Kukhomiwa ka Yesu

(Mt 26:47-56; Mrk 14:43-50; Lk 22:47-53)

1 # Lavisa 11:1. Ntrhaku ka xikhongoto lexo, Yesu ahumi ni vadondrisiwa vakwe, awela a mfulanyana wa Kedroni laha afaka kuni xiramba, kutani ayanhingena ku xone yene ni vadondrisiwa vakwe. 2#Lavisa Lk 21:37; 22:39. Yudasi muwongi na yene afa ativa mbangu lowo, hikusa Yesu afa atolovela kuhlengeletana kone ni vadondrisiwa vakwe. 3Yudasi atekiki ntlawa wa masotxha ni malandra man'wana ya vaprista lava vakulu ni ya vafarisi, vaya kone na vatameli mimotre, ni swisa, ni matlhari.

4Yesu, hi kutiva hinkwaswu leswi switakamuhumelela, ahuma aya ku vone, aku: N'widjula mani xana? 5Vamuyangula, vaku: Yesu wa Nazarete. Yesu aku ku vone: Hi mine lweyi! Yudasi muwongi na yene afa ayimi navu kolahu. 6Loko Yesu ati: Hi mine lweyi, vantlhentlha, vawa hi swikosi. 7Yesu atlhela avavutisa, aku: N'widjula mani xana? Vaku: Yesu wa Nazarete. 8Yesu ayangula, aku: Nin'wibyelile niku, hi mine lweyi. Loko-ke n'winidjula, trikani lava, vatifambela. 9Hi leswaku a ritu drihetiseka, ledri afaka adrihlayile aku: Lava uninyikiki vone anilahlanga ni mun'we ku vone. 10Simoni Petrosi lweyi afaka ali ni lipanga, adrihlomula, a ba nandra wa muprista lwenkulu, amutrema ndleve ya xinene. A vito dra nandra lweyo afa ali Malkusi. 11#Fanisa na Mt 26:39; Mrk 14:36; Lk 22:42. Yesu ahangaku ku Petrosi: Tlhoma lipanga ankotlotweni! Xana ningaka ninganwi a ntrheko lowu Tatana aninyikiki wone xana?

12A ntlawa lowo, ni tindruna, ni malandra ya va-Yuda, vakhoma Yesu, vamutrimba. 13Kutani varanga hi kumuyisa ku Anasi, lweyi afaka ali mukon'wana wa Kayafasi, muprista lwenkulu wa lembe ledro. 14#Lavisa 11:45-50. Kayafasi hi yene lweyi angatlhavukanyisa va-Yuda aku: afa switayapswa loko mhunu mun'we afela vhanu hinkwavu.

Petrosi alandrula Yesu

(Mt 26:69-70; Mrk 14:66-68; Lk 22:55-57)

15Simoni Petrosi ni mudondrisiwa mun'wana afa valandrelela Yesu. A mudondrisiwa lweyo afa atibyiwa hi muprista lwenkulu, ahanganhingena hubyeni ya yindlu ya muprista lwenkulu na Yesu. 16Kambe Petrosi afa ayimi handle anyangweni. Kolahu a mudondrisiwa lweyo ativiwaka hi muprista lwenkulu, ahuma, aya vulavula ni wansati lweyi afaka ali mulaviseli wa nyangwa, kutani anhingenisa Petrosi. 17Kutani lweyi wa mulaviseli, wa wansati, aku ku Petrosi: Xana na wene awu mudondrisiwa wa mhunu lweyi xana? Petrosi aku: Ani yene. 18A malandra ni tindruna afa vatrhiveli ndrilo vawora hikusa afa kuni xirami; Petrosi na yene afa ayimi navu, awora.

Anasi loko avutisa Yesu

(Mt 26:59-66; Mrk 14:55-64; Lk 22:66-71)

19A muprista lwenkulu avutisa Yesu hita vadondrisiwa vakwe ni hita kudondrisa kwake. 20Yesu amuyangula, aku: Nakhaneli alivaleni amahlweni ka vhanu hinkwavu. Nidondrisi minkama hinkwayu amasinagogeni ni le Tempeleni, lomu va-Yuda hinkwavu vahlengeletanaka kone. Anahlayanga ntxhumu axihundleni. 21Xana univutisela yini? Vutisa lava vaniyingeliki leswi nivabyeliki swone. Vone vaswitiva leswi ningaswihlaya. 22Loko Yesu ahlayi leswo, a mun'we wa malandra, lweyi afaka ayimi kolahu, a ba Yesu hi mpama, aku: Xana uyangulisa xiswoswo a muprista lwenkulu? 23Yesu amuyangula, aku: Loko nikhaneli swakubiha, komba kubiha ka swone. Kambe loko nikhaneli leswi swinene, unibela yini xana? 24Kutani Anasi amurumela ku Kayafasi muprista lwenkulu, na atrimbiwile.

Petrosi atlhela alandrula Yesu

(Mt 26:71-75; Mrk 14:69-72; Lk 22:58-62)

25Simoni Petrosi afa ayimi kone awora ndrilo. Vahangaku ku yene: Xana na wene awu mun'we wa vadondrisiwa vakwe xana? Yene ayala, aku: Ani yene! 26A mun'wana wa malandra ya muprista lwenkulu, afaka ali xaka dra lweyi Petrosi angamutrema ndleve, aku: Xana andrakuvonanga axirambeni na u na yene xana? 27Petrosi atlhela ayala; hi nomu-lo a nkuku wudringa.

Yesu amahlweni ka Pilato

(Mt 27:1-2,11-14; Mrk 15:1-5; Lk 23:1-5)

28Kutani vasuka na Yesu ku Kayafasi, vamuyisa ndlwini ya vufumi. Afa wehe mpundru swinene. Vone avanhingenanga ndlwini ya vufumi, akuva vangatitinyamisa, vatakota kuda Paska. 29Hikolahu Pilato ahuma, aya ku vone, aku: Xana mirambela mhunu lweyi ha yini? 30Vayangula, vaku ku yene: Loko afa mhunu lweyi angahonanga, ana hingamunyiketanga ku wene. 31Pilato aku ku vone: Mutekani n'wine, n'wiya muyavanyisa hi nawu wenu. A va-Yuda vaku ku yene: A nawu awuhipfumeleli kudlaya mhunu. 32Akuva ritu dra Yesu drihetiseka, ledri angahlaya drone loko ativisa a mafela lawa afa afanekela a kufa ha wone.

33Pilato atlhela anhingena ndlwini ya vufumi, avitana Yesu, aku ku yene: Xana u Hosi ya va-Yuda xana? 34Yesu amuyangula, aku: Xana leswo uswihlayaka swihuma ku wene, kumbe ubyeliwi hi van'wana xana? 35Pilato ayangula, aku: Xana nimu-Yuda mine? A tiko dra kwenu ni varangeli va vaprista hi vone vakunyiketiki ku mine. Xana uyentxi yini? 36Yesu ayangula, aku: A mfumu wanga ahi wa misava leyi. Loko afa a mfumu wanga wu wa misava leyi, a malandra yanga afa matalwa akuva ninganyiketiwi ku va-Yuda. Kambe, a mfumu wanga ahi wa lomu misaveni. 37Pilato aku ku yene: Xana u Hosi wene? Yesu ayangula, aku: Uhlaya swone, ni Hosi. Nipswaleliwi swone, niteli swone amisaveni leyi, akuva natatatiyisa xihlayelamfuri. Mun'wana-ni-mun'wana lweyi anga wa xihlayelamfuri, ayingiseta ritu dranga. 38Pilato aku ku yene: A xihlayelamfuri i ntxini? Loko ahlayi leswo, atlhela ahuma aya ku va-Yuda, ayaku ku vone: Mine anikumi nandru ku yene. 39Kambe n'witoloveli leswaku nin'wintrhunxela mhunu mun'we hi nkama wa Paska. Xana n'widjula leswaku nin'wintrhunxela Hosi ya va-Yuda xana? 40Vayangula hikubandlukana, vaku: Ungantrhunxe lweyo, ntrhunxa Barabasi! Kasi Barabasi afa ali nsulavoya.

Currently Selected:

Yhn 18: NTX2007

Highlight

Copy