Yhn 17

Yesu akhongotelela vadondrisiwa vakwe

1Loko Yesu ahlayi leswo, atlakuxa mahlu, alavisa Tilweni, aku: Tatana, a nkama wutlhasile! Twalisa N'wanaku, akuva na yene N'wana akutwalisa; 2swanga hi leswi umunyikiki ntamu henhla ka vhanu hinkwavu, akuva hinkwavu lava umunyikiki vone atavahanana vutomi lebyi byingahelikiki. 3Kambe a vutomi lebyi byingahelikiki hi byolebyi: leswaku vakutiva, wene unga Xikwembu Nkulukumba wa xihlayelamfuri, na Yesu Kriste lweyi umurumiki. 4Mine nikutwalisile la misaveni, nihetile a ntiro lowu uninyikiki wone akuva niwutira. 5Swoswi, nitwalise, we Tatana, amahlweni kwaku hi kutwala loku afaka nili nakone ku wene, na misava mingasiva kone. 6Nivonekisi vito draku amahlweni ka vhanu lava uninyikiki vone, uvahlawuliki misaveni; afa vali vaku; uninyiki vone, kutani vabekisi ritu draku. 7Swoswi vaswitivile leswaku hinkwaswu leswi uninyikiki swone, swihuma ku wene. 8Hikusa a maritu lawa uninyikiki nivanyiki wone; vamayamukelile, kutani vaswitivile leswaku kunene nihumi ku wene, vapfumelile leswaku nirumiwi hi wene. 9Navakhongotela, anikhongoteli misava, kambe nikhongotela lava uninyikiki vone, hikusa i vaku. 10Hinkwaswu leswi swinga swanga, i swaku; ni swaku, i swanga; kutani nitwalisiwi hikola ka swone. 11A nehe misaveni, kasi vone vahali lani misaveni; mine niya ku wene. Tatana wa kuxwenga vabekise avitweni draku lava unihananiki vone akuva vava mun'we swanga ha hine. 12#Lavisa 13:18; Mps 41:10. Loko nahali na vone, afa nivabekisi avitweni draku; nibekisi lava uninyikiki vone, akulahlekanga mhunu ni mun'we ku vone loko ange n'wana wa kulahleka, akuva Matralwa mahetiseka. 13Kambe swoswi nita ku wene, kutani nihlaya leswo na nahali misaveni, akuva vavani kutrhava kwanga loku kuhetisekiki andreni kwavu. 14Nivanyiki ritu draku, kutani misava mivavengile, hikusa ahi va misava, swanga ha mine ningeke wa misava. 15Anikombeli leswaku uvasusa misaveni, kambe leswaku uvaxirelela ku leswi swakubiha. 16Ahi va misava, swanga ha mine ningeke wa misava. 17Vaxwengisi axihlayelamfurini xaku; a ritu draku hi xo xihlayelamfuri. 18Swanga heswi unirumiki misaveni, na mine nivarumi misaveni. 19Kutani nitixwengisela vone, akuva na vone vava lava vaxwengisiwiki axihlayelamfurini.

20Anikhongoteli lava ntsena, kambe ni lava vatakapfumela ku mine hi ritu dravu, 21akuva hinkwavu vava mun'we, swanga ha wene Tatana unga ku mine, na mine ninga ku wene, akuva na vone vava ku hine, kutani misava mitapfumela leswaku unirumile. 22Nivanyiki kutwala loku uninyikiki kone, leswaku vava mun'we swanga ha hine hinga mun'we: 23Mine ku vone na Wene ku mine, akuva lava vahetisekiki, vava mun'we, kutani misava mitativa leswaku hi Wene unirumiki, ni leswaku uvarandrile swanga hi leswi unirandrisiki xiswone. 24Tatana! Nirandra leswaku hinkwavu lava uninyikiki vone, vava na mine laha ningakone: akuva vatahlalela kutwala kwanga loku uninyikiki kone, hikusa unirandrile na misava mingasitumbuluka. 25Tatana, wa kululama! A misava yone amikutivanga, kambe mine nikutivile, ni volavu vaswitivile leswaku hi Wene unirumiki. 26Nivativisi vito draku, nahatavativisa, akuva lirandru ledri unirandriki ha drone, driva ku vone, na mine niva ku vone.

Currently Selected:

Yhn 17: NTX2007

Highlight

Copy