Yhn 10

Yesu, Mubyisi lweyi munene

1Yesu aku: Nihlayelamfuri nili ku n'wine; lweyi anganhingenikiki hi nyangwa arangeni dra tihamba, kambe atlulelaka hi kun'wana, i muyivi, ni muwutli. 2Kambe lweyi anhingenaka hi nyangwa, hi yene anga mubyisi wa tihamba. 3A mulaviseli wa nyangwa awamupfulela, kutani tihamba tiyingela ritu drakwe; avitana a tihamba leti tinga takwe hi mavito ya tone, atihumexa handle. 4Loko atihumexi handle ka ranga hinkwatu, afamba mahlweni ka tone, kutani tihamba timulandra hi le ntrhaku, hikusa titiva ritu drakwe. 5Tingaka tingalandri mhunu mumbeni, kambe titatrutrumela kule na yene, hikusa atitivi ritu dra vambeni. 6Yesu avabyeli xifaniso lexi, kambe vone avayingelisisanga leswaku afa avabyela yini. 7Yesu ayengeta aku ku vone: Nihlayelamfuri nili ku n'wine: hi mine nyangwa ya tihamba. 8#Lavisa Yr 23:1-2; Ez 34:2-3. Hinkwavu lava vatiki na ningasanganatlhasa, i vayivi ni vawutli, kambe tihamba ativayingelanga. 9Hi mine nyangwa. Loko mhunu anhingena ha mine, atahuluxiwa. Swanga hi hamba leyi yinhingenaka yitlhela yihuma, yikuma vudelo. 10A muyivi atela kuyiva ntsena, ni kutlhava, ni kudlaya. Mine nitile leswaku tihamba tanga tivani vutomi, tibyikuma hi ntalo.

11 # Fananisa ni Mps 23:1; Ezy 40:11; Ez 34:15; 37:24. Hi mine Mubyisi lweyi munene. A Mubyisi lweyi munene anyiketa vutomi byake hinkonta ya tihamba. 12Lweyi atirelaka mali na ange n'winyi wa tihamba, loko avona hava drita, atrika tihamba atrutruma kutani a hava dritiwutla ni kutihangalasa. 13Hi leswi angamutireli wa mali ntsena, angahlayi ntxhumu hi tihamba.

14Hi mine Mubyisi lweyi munene. Nitiva tihamba tanga, na tone tanitiva. 15#Lavisa Mt 11:27; Lk 10:22. Swanga hi leswi Tatana anitivaka, ni leswi mine nitivaka Tatana; ninyiketa vutomi byanga hinkonta ya tihamba. 16Nakone, nini tihamba tin'wana leti tingeke ta ranga ledri. Nifanela kutibuyisa na tone. Titatayingela ritu dranga, kutani titava ntlhambi mun'we, tiva na Mubyisi mun'we.

17Tatana awanirandra, hikusa nitiyimiseli kunyiketa vutomi byanga, akuva nitatlhela nibyikuma. 18A kuna mhunu lweyi anganitekelaka byone. Mine nibyinyika hi kurandra kwanga. Nini ntamu wa kubyinyiketa, ni ntamu wakutlhela nibyikuma. Hi swoleswi Tatana wanga anileletiki kuyentxa swone.

19Akuhambana kutlhela kuva kone amakari ka va-Yuda hikola ka maritu wolawo. 20#Lavisa 7:20 ni xikombiso. Lava va kutala ku vone afa vaku: Ani demoni, ahungukile! Xana n'wimuyingisetela yini? 21Kambe avan'wana afa vaku: A maritu lawa ahiya mhunu lweyi angani demoni. Xana a demoni dringaswikota kupfula mahlu ya va kufa mahlu xana?

A va-Yuda vayala kuyamukela Yesu

22A nkhuvu wa kukhangula ka Tempele#10:22 A nkhuvu lowu afa wuyentxiwa Yerusalema hi hweti ya N'wendramhala (Dezembro) hi kudrimuka a kupfuxetiwa ka Tempele ni kunyikela ka Xiluvelo, loku kuyentxiwiki ha Yudasi Makabewu hi lembe dra dzana ni ntlhanu wa makume na drin'we ni ntlhanu (165 a. C) kumbe dzana ni ntlhanu wa makume na drin'we ni mune (164 a. C). wuva kone Yerusalema ankameni lowo. Afa byili vuxika, 23kutani Yesu afa aratela Tempeleni, aligumbeni dra Salomoni. 24A va-Yuda vahanga mutrandrela, vaku ku yene: Utahidrivata kuyatlhasa drini xana? Loko uli Kriste, hibyele switwala. 25Yesu avayangula, aku: Nin'wibyelile, kambe an'wipfumeli. A mintiro leyi nimiyentxaka hi vito dra Tatana wanga, hi yone minihambelaka vumboni. 26Kambe an'wipfumeli, hikusa an'wi tihamba tanga. 27A tihamba tanga tiyingela ritu dranga. Tadritiva, kutani tanilandra. 28Nitinyika vutomi lebyi byingahelikiki; tingaka tingasuvi ni siku ni drin'we. Akuna mhunu lweyi atakatiwutla avokweni dranga. 29Leswi Tatana wanga aninyikiki swone, swi ni lisima ngopfu, akuna lweyi angani ntamu kutlula yene.#10:29 Matrhan'wini ya leswaku: Leswi Tatana wanga aninyikiki swini lisima ngopfu, man'wana matralwa ya kuhlawa mani leswaku: Tatana wanga hi Yene aninyikiki swone, kutani akuna mhunu lweyi amutlulaka hi ntamu. Hikolahu ka leswo akuna mhunu lweyi akotaka kutiwutla avokweni dra Tatana. 30Mine na Tatana hi mun'we.

31A va-Yuda vatlhela varola maribye vadjula kumukhandla. 32Yesu aku ku vone: Hi kuyingiseta Tatana wanga niyentxi mintiro leya kutala ya kuxonga, leyi mipfaka ku Tatana. Xana hi wini ku yone, a ntiro lowu n'winikhandlelaka wone xana? 33A va-Yuda vamuyangula, vaku: Ahikukhandli hi ntiro wunene lowu uwuyentxiki, kambe hi leswi usandraka Xikwembu Nkulukumba; hikusa wene umhunu kambe utiyentxa Xikwembu Nkulukumba. 34Yesu avayangula, aku: Xana akutraliwanga Nawini wenu leswaku: Mine ni hlayi niku: mun'wana-ni-mun'wana i xikwembu nkulukumba? 35#Lavisa Mps 82:1-8. Loko Xikwembu Nkulukumba atxhuli swikwembu lava vangayamukela a ritu drakwe, (na kasi a Matralwa amana kuhelisiwa), 36xana n'wine, n'wihlaya ha yini n'wiku nisandra Xikwembu Nkulukumba, na kasi mine nihlawuliwi niva nirumiwa misaveni ha Yene, xana? 37Loko leswi niswiyentxaka minge mintiro ya Tatana wanga, n'wingatxhuki n'wipfumela ku mine! 38Kambe loko nitira mintiro ya Tatana, nambi n'wingapfumeli ku mine, pfumelani mintiro, n'witayingelisisa ni kutiva leswaku Tatana ale ku mine, na mine ni le ku Tatana.

39Kuva loko vayengeta vadringisa kumukhoma, kambe Yesu aphonyoka mavokweni yavu. 40Kutani atlhela awela nambu wa Yordana, aya laha Yohana afaka ababatisi kone akusunguleni, kutani atrhama kone. 41Lava va kutala vata ku yene, vaku: Yohana angayentxanga xikombiso ni xin'we, kambe hinkwaswu leswi Yohana angahlaya henhla ka mhunu lweyi, switiyile. 42Kutani vanyingi vapfumela ku yene.

Currently Selected:

Yhn 10: NTX2007

Highlight

Copy