Mnt 5

Ananiya na Safira

1Kambe mun'we wanuna, a vito drakwe afaka ali Ananiya, ni nkatakwe Safira, axavisi nsimu, 2kambe ayingelana ni nsati wakwe, atipambulela xiyenge xa swa nxavu axihundleni, abuyisa a ntrengo lowu wusaliki, atatawubeka aminengeni ya vapostola. 3Kolahu-ke Petrosi aku: Ananiya, xana Sathana atatisi kuyini a mbilu yaku akuva uhembela Moya wa Kuxwenga, ni kutipambulela a ntrengo wa nsimu, xana? 4Loko afa utibekiseli a nsimu, ayingativa yaku, xana? Ni loko yixavisiwile, xana a mali afa yinge yaku xana? Xana ubekisi kuyini amhaka leyi ambilwini yaku? Awuhembelanga vhanu, kambe uhembeli Xikwembu Nkulukumba! 5Loko Ananiya, ayingela maritu lawo, awa, anhlala, afa. Kahangavani kutxhava kukulu ku vayingeli hinkwavu. 6Vasekelekiki kolahu a vayisanyana, vamutrondriyela hi makapulana, vamutlakula, vayamulahla.

7Ka ti loko kuhundri xipimu xa minkama miraru (3h00), a nsati wakwe anhingena na angativanga leswi swihumeleliki. 8Petrosi amuvutisa aku: Nibyele! Hiwolo ntrengo n'wixavisiki nsimu hawone xana? Yene ayangula aku: Im'na, hi wone. 9Petrosi aku ku yene: Xana n'wiyingelanisi kuyini, akuva n'widringa Moya wa Hosi xana? Vona a minenge ya valahli va nuna waku mi le nyangweni, vatakuhumexa na wene. 10Hi nomu-lo, awa aminengeni ya Petrosi, anhlala, afa. Vahanganhingena vayisanyana, vamukuma na afile, vamutlakula, vamulahla kusuhi ni nkatakwe. 11Kutani a ntxhavu wukulu wuva kone ku Kereke hinkwadru ni le ku hinkwavu lava vayingeliki leswo.

Swikombiso ni mahlolana

12Afa kuyentxiwa swikombiso ni mahlolana manyingi hi mavoko ya vapostola amakari ka vhanu. A vapfumeli hinkwavu afa vatrhama vali mbilu yin'we, afa vatlhangana a Ligumbeni dra Salomoni; 13afa kungena mun'we wa vambeni lweyi atiyaka kunamarela ku vone, kambe a vhanu hinkwavu afa vavakhensa ngopfu. 14Nakone, afa kuyengeseliwa a ntrhungu wa vapfumeli ku Hosi, vavanuna ni vavasati, 15lani kakuva vabuyisa timbabyi atindleleni, vatibeka atinkukwini ni le vunanwini, akuva, loko Petrosi akhaluta, a ntrhuti wakwe wutafukumeta van'we ku vone. 16Kambe a vunyingi bya vayaki va le mitini leyi mivundramaniki na Yerusalema afa vatrutrumela kone, na vabuyisa timbabyi ni lava vaxanisiwaka hi mimoya ya xambya; hinkwavu afa vaholisiwa.

Kuxanisiwa ka vapostola

17Kolahu a muprista lwenkulu, kun'we ni hinkwavu lava afaka vali na yene, va ntlawa wa vasaduki, vapfuka na vatali hi mona, 18vakhoma vapostola vavanhingenisa abohelweni dra tiko. 19Kambe avusikwini a ntrumi ya Hosi yipfula swipfalu swa bohelo, yivafambisa handle, yiku: 20Fambani n'wiyayima a Tempeleni, n'widondrisa a tiko a maritu hinkwawu ya vutomi lebyi. 21Vaswiyingeliki, vahangavindruka, vayanhingena a Tempeleni, vadondrisa.

Kambe a muprista lwenkulu kun'we ni lava avali na yene, vaku vatlhasa, vahlengeleta huvu ni vakulu hinkwavu va vana va Israyele, varuma vhanu abohelwini kuya buyisa a vapostola. 22Loko a malandra matlhasi abohelweni, mayakuma vange kone; matlhela, mayavativisa maku: 23Hi kumi swipfalu swa bohelo na swipfaliwile swinene, na vone valaveleli vayimi tinyangweni; kambe loko hipfula, ahikumanga mhunu andreni.

24Loko a ndruna ya Tempele ni vaprista lava vakulu vayingela a maritu lawo, vatxhukisiwa hinkonta yavu, ni leswaku xana leswi switagama kwini. 25Kolanu kutlhasa mhunu aku ku vone: Lava n'wingavanhingenisa abohelweni, hi lavaya vayimiki a Tempeleni, vadondrisa tiko! 26A ndruna ni malandra vahangasuka, vayavabuyisa. Kambe vangavaxanisi hikusa afa vatxhava leswaku a vhanu vangavakhandla hi maribye. 27Loko vatlhasa, vavayisa mahlweni ka huvu leyi yikulu, kutani a muprista lwenkulu aku ku vone: 28Xana ahin'wileletanga hi ntamu leswaku n'wingadondrisi hi vito ledro? Kambe swoswi n'witati Yerusalema hi dondro yenu, n'widjula ni kubuyisa a henhla kweru a ngati ya mhunu lweyo! 29Petrosi ayangula kun'we ni vapostola van'wana aku: swafanekela ngopfu kuyingiseta Xikwembu Nkulukumba kutlula vhanu. 30Xikwembu Nkulukumba wa vatatana weru apfuxi Yesu, lweyi n'wine n'wingamudlaya hi kumuhayeka mhandreni. 31Kambe yelweyo, Xikwembu Nkulukumba amutlakuxelile axineneni xakwe, ava Hosi ni Muhuluxi, atanyika Israyele akuva andruluka ava adrivaleliwa swidoho swake. 32Hine hi timboni ta hinkwaswu kun'we ni Moya wa Kuxwenga, lowu Xikwembu Nkulukumba awunyikaka ku lava vamuyingisetaka.

33Loko vayingeli leswo, vahundrisa kulebya lakakuva vadjula ni kuvadlaya. 34#Lavisa 22:3. Kambe mun'we mufarisi, lweyi a vito drakwe afaka vaku i Gamaliyele, lweyi afaka ali mudondrisi wa Nawu, afaka akhensiwa hi tiko hinkwadru, asekeleka ayima a hubyini aleleta leswaku a vapostola vahumexiwa nkamanyana, 35kutani aku ku vone Vavanuna va Israyele, tivonelani ku vhanu lava, leswi n'witakavayentxa swone; 36drimukani leswi swingayentxeka akhalenyana; afaka kutumbuluki Tewudasi, lweyi afaka aku yene i mhunu wa lisima; kanamareli ku yene vavanuna vakudjula kuva mune wa madzana (400). Kambe yelweyo vamudlayile, hinkwavu a valandreli vakwe vahangalasiwa, vangahavi ntxhumu. 37Antrhaku ka lweyo, kutumbuluka Yudasi, mu-Galileya, ankameni wa kutitralisa ka vhanu; atikokeliki xitrungu kuva ximulandra, kambe na yene asuvile, ni hinkwavu lava afaka vamuyingiseta vahangalaka. 38Hileswo-ke, nili ku n'wine: sukani ku vhanu lava, n'wivatrika; hikusa loko kungu ledri ni ntiro lowu swipfa vhanwini, switahela mfuri; 39kambe loko swipfa ku Xikwembu Nkulukumba, n'wine n'wingaka n'wingaswikoti kuswihelisa; na swone, n'wingakumiwa na n'wilwa na Xikwembu Nkulukumba!

Vone vahangapfumela mavonela ya Gamaliyele. 40Vavitana vapostola, vakhatisiwa; kutani vavanyika nawu akuva vangahayi mahlweni vakhanela hi vito dra Yesu. Ntrhaku vavantrhunxa. 41A vapostola vahuma, hubyini na vatrhavi ngopfu, hi kuva vakumi mfanelo ya kuxanisiwa hinkonta ya vito dra Yesu. 42Kutani masiku hinkwawu afa vahuwelela a Tempeleni ni hi yindlu ni yindlu leswaku Yesu i Kriste.

Currently Selected:

Mnt 5: NTX2007

Highlight

Copy