Mnt 4

Petrosi na Yohana ahubyeni

1Kuti loko Petrosi na Yohana vahakhanela ni xitrhungu, kutlhasa a vaprista kun'we ni ndruna ya valaviseli va Tempele ni vasaduki, 2na varon'wiki hi leswi Petrosi na Yohana afaka vadondrisa xitrhungu ni kutivisa kupfuxiwa ka vafi ha Yesu; 3vavakhoma, swanga hi leswi afaka dripelile, vavanhingenisa bohelweni kukondra byixa. 4Kambe lava vanyingi vayingeliki ritu vapfumela. A ntrengo wa vavanuna lava vapfumeliki afa wudjula kuva wa ntlhanu wa makume ya madzana (5000).

5Loko byixile, kuhlengeletana a vafumi ni vakulu va tiko ni vatrali a Yerusalema, 6na Anasi, muprista lwenkulu na Kayafasi, na Yohana, na Alexandre, ni hinkwavu lava afaka vali va yindlu ya muprista lwenkulu. 7Vatiki vayimisa vapostola amakari kwavu, vavavutisa vaku: Xana n'witiri leswi hi ntamu wini, kumbe hi vito drini xana? 8Kolahu Petrosi na atali hi Moya wa Kuxwenga, avayangula aku: Vafumi va tiko na n'wine vakulu, 9n'wine namuhla n'wahivutisa hi mhaka ya vunene lebyi hibyiyentxeliki wanuna wa kuwonyana swiro, akuva n'witiva leswaku ahanyisiwi hi mani, 10switivani, n'wine ni tiko hinkwadru dra Israyele, leswaku ahanyisiwi hi vito dra Yesu Kriste, wa Nazarete, lweyi n'wine n'wingamuvamba; kambe Xikwembu Nkulukumba amupfuxiki amakari ka vafi. Ha yene a mhunu lweyi ayimiki mahlweni kwenu i ntomi. 11#Lavisa Mps 118:22. Hi yene Yesu lweyi anga ribye ledri dridreliwiki hi n'wine vayaki, kambe drihambiwiki a ribye ledri drinene dra masungulo. 12Na swone, akuna kuhuluka ha mun'wana, hikuva akuna vito drimbeni a hansi ka tilo, ledri vhanu vadrinyikiwiki, ledri hingafanekelaka a kuhuluka ha drone#4:12 Yesu, hi Xiheberu swihlaya leswaku Xikwembu Nkulukumba awahuluxa, kumbe Hosi yahuluxa. 13Vatiki vahlalela kutiya ka Petrosi na Yohana, vavani kuhlamala hikusa afa vaswitiva leswaku afa vangadondranga xikolweni, kutani vavativa leswaku afa vali vadondrisiwa va Yesu. 14Kambe, hikuva lweyi wa kuholisiwa afaka ayimi kolaho na vone, vapfumala swakuvakaneta ha swone. 15Kutani vavaleleta leswaku vahuma hubyini, vasala vakhanelisana kun'we vaku: 16Xana hitayentxa yini hi vhanu lava? Hikusa avayaki hinkwavu va Yerusalema va switiva leswaku xikombiso xiyentxiwi ha vone, ahinakuswikota kuswilandrula! 17Kambe akuva mhaka leyi yingatiyisiwa amahlweni hi kuhangalaka amakari ka vhanu, ahivatsimbeni hi kuvatxhavisa, akuva vangahatitlhela vadondrisa mhunu ni mun'we hi vito ledri.

18Vavavitaniki, vavatratriya leswaku vangahakhaneli ni kutrongo, nambi kuli kudondrisa hi vito dra Yesu. 19Kambe Petrosi na Yohana vayangula vaku ku vone: A kutreme n'wine, xana swilulamile amahlweni ka Xikwembu Nkulukumba a kuyingiseta n'wine kutlula kuyingiseta Xikwembu Nkulukumba xana? 20Hikusa hine ahina kuswikota a kutrika kuhlaya leswi hiswivoniki hiva hiswiyingela. 21Kolahu a vafumi vatlhela vavatratriya, vavantrhunxa. Avakumanga laha vangavabaka ha kone, hikusa hinkwavu afa vadrumisa Xikwembu Nkulukumba hi leswi swihumeleliki. 22A mhunu lweyi afaka ahanyisiwi hi ndlela ya mahlonana, afa ali wa malembe lawa matlulaka mune wa makume (40).

Xikhongoto xa Vakriste

23Loko Petrosi na Yohana vantrhunxiwile, vaya ku valekwavu, vavadrungulela hinkwaswu leswi a vaprista lava vakulu ni vakulu va tiko vavabyeliki swone. 24Ntrhaku ka kuva vaswiyingelile, vakhongota kun'we Xikwembu Nkulukumba, vaku: Hosi, wene Muvumbi wa tilo ni misava, ni likhulu, ni hinkwaswu leswi swinga ku swone; 25#Lavisa Mps 2:1. Wene uhlayiki hi Moya wakuxwenga hi nomu wa Davida, nandra waku, uku:

A matiko mani nkitrikitri ha yini, ni vhanu a makungu ya kuka-ndlela?

26A vafumi va misava vapfukile ni varangeli va-Matiko vatlhanganile mbangu mun'we

akulwa ni Hosi na Kriste wa yone.

27Hikusa vatlhangani ha kunene, amutini lowu, kulwa ni Nandra waku lweyi wa kuxwenga, Kriste, lweyi umutotiki, vanga vone va Heroda na Ponciu Pilatu, kun'we ni va-Matiko ni tinxaka ta Israyele. 28Vatakahamba hinkwaswu leswi swibekisiwiki khale hi voko draku ni hi kungu draku. 29Ni swoswi, we Hosi, lavisa a switxhaviselo swavu, uva unyika a malandra yaku a kudondrisa ritu draku hi kutiya hinkwaku, 30unalavuta a voko draku, akuva kuhumelela a kuholisiwa ka vuvabyi, ni swikombiso ni mahlolana, hi vito dra Nandra wa kuxwenga, Yesu.

31Loko vakukhongotile, kutrekatreka a mbangu lowu afaka vahlengeletani ku wone; hinkwavu vatala hinkwavu hi Moya wa Kuxwenga, kutani vahaxa a ritu dra Xikwembu Nkulukumba hi kutiya.

A Vakriste vayavelana hinkwaswu

32A vunyingi bya lava vapfumeliki afa vali mbilu yin'we ni moya mun'we. Mfuri afa kungena mun'we lweyi aliki a mintxhumu leyi anganayu i yake vuswake, kambe hinkwaswu ku vone afa swili swavu hinkwavu. 33Na swone, a vapostola afa vahlaya hi ntamu lowu wukulu a vumboni bya kupfuka ka Hosi Yesu; a timpswalu tinyingi afa tili henhla kwavu hinkwavu. 34Nakone afa kungena xisiwana amakari kwavu; hikuva hinkwavu lava afaka veni masimu, kumbe tiyindlu, afa vaxavisa, na vabuyisa a mintrengo ya leswi vaxavisiki; 35kutani afa swiyavelisiwa ku mun'wana-ni-mun'wana swanga hi leswi afaka apfumalisa xiswone. 36Na yene Yosefa lweyi atxhuliwaka Barnabasi hi vapostola, hileswaku: N'wana wa kumiyeta, loko kutlhamuxeliwa, mulevi, abelekiwiki Kipra; 37afa ali ni nsimu, ayayixavisa, abuyisa ntrengo wa yone, atatawubeka minengeni ya vapostola.

Currently Selected:

Mnt 4: NTX2007

Highlight

Copy