Mnt 3

Kuhanyisiwa ka wa kuwonyana swiro

1Siku drin'wana, Petrosi na Yohana afa vatlhantukela aTempeleni hi nkama wa xikhongoto, wunga wa ntlhanu na mune#3:1 A nkama wa ntlhanu na mune i 3h00 wa madambu amahlayeleni yeru. 2Ke afa kuni mun'we wanuna, wa kukhuta kusukela akubelekiweni kwake, afaka vamutlakula siku drin'wana ni drin'wana vayamubeka anyangweni ya Tempele, leyi yihlayiwaka Yakuxonga, akuva akombela xa ntxhumu ku lava vanhingenaka. 3Loko avona Petrosi na Yohana vakongoma kunhingena a Tempeleni, akombela leswaku vamunyika xa ntxhumu. 4Kutani Petrosi afa ali kun'we na Yohana akongomisa ku yene a mahlu, aku: Hi lavise! 5Yene avalavisa, na ayanakanya leswaku atayamukela xa ntxhumu. 6Kambe Petrosi aku: Anina silivhela nambi gole, kambe nitakunyika leswi ningana swone: hi vito dra Yesu Kriste, wa le Nazarete, sekeleka ufamba! 7Loko ahlayi leswo, Petrosi amukhoma hi voko dra xinene, amusekelekisa. Hi nomu-lo a minkondro ni mahlakala yake switiyisiwa, 8yene atlula ayima, asungula kufamba. Anhingena navu a Tempeleni, na atifambela, atlulatlula, atlangela Xikwembu Nkulukumba. 9Hinkwavu vhanu vamuvona loko atifambela na ankhensi Xikwembu Nkulukumba. 10Vamutiva leswaku hi yelweyi afaka atrhamela kuhananiwa anyangweni ya kuxonga ya Tempele, kutani vatxhuka ni kuhlolelwa hi leswi swimuhumeleliki.

Kudondrisa ka Petrosi a Tempeleni

11A wanuna lweyi afaka ahanyisiwile afa alandrelela Petrosi na Yohana. Kutani a vhanu hinkwavu, afa vatali hi kuhlamala, vatrutrumela lomu afaka vali kone atlhelweni dra Tempele lomu kuhlayiwaka a ligumbeni ledri valiki i dra Salomoni. 12Petrosi loko aswivona ayangula xitrhungu aku: Vavanuna va Israyele, ha yini n'wihihlamalisa xileswi? N'wihilavisisela yini, swanga hi loko hiyentxi leswaku yelweyi afamba hi ntamu kumbe hi vukhongoti byeru? 13Xikwembu Nkulukumba wa Abrahamu, ni wa Yisaki, ni wa Yakobe; Xikwembu Nkulukumba wa vatatana veru adrumisi nandra wakwe Yesu, lweyi n'wine n'wingamunyiketa Pilatu ni kumulandrula amahlweni kwake. Kasi Pilatu afa amuyavanyiseli kutrhunxiwa. 14N'wiyali lweyi wa kuxwenga ni wa kululama, n'wavi n'wikombela kuva kuntrhunxiwa wanuna wa mudlayi. 15Hi ndlela leyo, n'widlayi Hosi ya vutomi, leyi Xikwembu Nkulukumba ayipfuxiki kufeni, kutani hine hi timboni ta swone. 16Hi kupfumela ku vito dra Yesu, a vito drakwe dritiyisi a mhunu yelweyo n'wimuvonaka, n'wimutivaka; ke a kupfumela ku Yesu kunyiki vutomi kulweyi n'wimuvonaka lana hinkwenu. 17Swoswi-ke vamakweru, naswitiva leswaku n'wiyentxi leswi hi kukohleka, na tone tihosana tenu, swive tano. 18Kambe Xikwembu Nkulukumba ahetisisi xiswoswo leswi angaranga aswitivisa hi nomu wa vaprofeta; a kuxaniseka ka Kriste wakwe. 19Hileswo-ke, tisolani n'windruluka, akuva swidoho swenu switimiwa, 20akuva akuvoneka ka minkama leyi mipfaka ku Hosi kun'witisela kuwisa, ni leswaku yin'wirumela Kriste, lweyi angabekeliwa n'wine khale, anga Yesu, 21lweyi swifanekeliki a tilo drimuyamukela kukondra kutlhasa minkama ya kupfuxetiwa ka hinkwaswu, leyi Xikwembu Nkulukumba angakhanela ha yone khale, hi nomu wa vaprofeta va kuxwenga vakwe. 22Hi xihlayelamfuri Moxe ati: Hosi Xikwembu Nkulukumba wenu atan'wihumexela muprofeta amakari ka va-le-kwenu, lweyi wanga ha mine; n'witamuyingela ku hinkwaswu leswi atakan'wibyela swone. 23#Lavisa Mlw 18:15,18-19.Kambe lweyo ni lweyo angatikiyingela muprofeta yelweyo, atasuvisiwa atikweni amakari ka xitrhungu.

24Na vone vaprofeta hinkwavu, lava vangadondrisa kusukela ku Samuwele ni lava vamuntlhantamiki, vativisile leswi switakahumelela ku masiku lawa. 25#Lavisa Gn 22:18; Gl 3:8. N'wine n'wi vana va vaprofeta ni vana va xipfumelelanu lexi Xikwembu Nkulukumba angaxihamba ni vatatana venu, loko aku ku Abrahamu: avatukulwini vaku, a matiko hinkwawu matakatekisiwa. 26Loko Xikwembu Nkulukumba apfuxi kufeni a Nandra wakwe, amurumeli hi kuranga, ku n'wine akuva an'wikatekisa, akuva mun'wana-ni-mun'wana atrika vusomboloki byake.

Currently Selected:

Mnt 3: NTX2007

Highlight

Copy