LUKAS 20

Pertanyaan tetang kuaso Yesus

(Mat. 21:23-27; Mrk. 11:27-33)

1Pado suaktau bilai ketiko Yesus ngajea tun dau neak Umeak Tuhan ngen semapei Bito Baik, tekoba imem-imem kepalo ngen gu'au-gu'au agamo serto tetuai moi mindi. 2Tobo'o madeak ngen Yesus, “Nadeakba ngen keme ngen kuaso ipe Ko menea hal-hal o, api de melei kuaso o ngen Ko!”

3Jawab Yesus, “Uku kulo lok temnai ngen ko. Nadeakba ngen Uku, 4baptisan Yohanes o, kunei surgo jano kunei manusio?”

5Tobo'o temimbangne neak antaro tobo'o, ngen madeak, “Amen ite madeak: ‘Kunei surgo, Si bakea madeak: Getai udi coa masai ngen si?’ 6Tapi amen ite madeak, ‘Kunei manusio,’ kute rakyat bakea meluk ite ngen butau, sebab tobo'o yakin, bahwo Yohanes adeba suang nebai.” 7Lajau tobo'o jemawab, “Bahwo tobo'o coa namen kunei ipe baptisan o.”

8Mako nadeak Yesus ngen tobo'o, “Amen awei'o, Uku kulo coa madeak ngen udi ngen kuaso ipe Uku menea hal-hal o.”

Perumpamo pekerjo-pekerjo kebun anggur

(Mat. 21:33-46; Mrk. 12:1-12)

9 # Yes. 5:1 Lajau Yesus madeak perumpamo yo ngen tun dau, “Suang mukok kebun anggur; sesudo'o si semiwone ngen pekerjo-pekerjo lajau berakat moi negrai luyen utuk waktau de agok an. 10Ketiko sudo sapei musimne panen anggur, si meluak suang pelayan ngen pekerjo-pekerjo o, supayo tobo'o semreak pa'ok kunei asea kebun anggur o ngen si. Tapi pekerjo-pekerjo o mokoa pelayan o ngen meluak si belek ngen coa ade uliak. 11Sesudo'o si meluak suang pelayan de luyen, tapi pelayan o kulo nokoa ngen senelek tobo'o, lajau neluak belek ngen coa ade uliak. 12Selanjutne si meluak pelayan de ketelau. Tapi tun o kulo nokoa tobo'o, lajau enting moi luea kebun o. 13Mako nadeak tuan kebun anggur o, ‘Jano de arus ku menea? Uku bakea meluak anokku suang; paset tobo'o coa binai.’ 14Tapi ketiko pekerjo-pekerjo o kemliak anokne o, tobo'o berunding, nadeakne, ‘Si adeba ahli waris, maro ite munuak si. Supayo warisan yo jijai ite temuan.’ 15Lajau tobo'o meting si moi luea kebun anggur o ngen munuakne.

Uyo jano de bakea nea tuan kebun anggur o ngen tobo'o? 16Si bakea teko ngen munuak pekerjo-pekerjo o, ngen semreak kebun anggur o ngen tun luyen.”

Temi'uk do'o tobo'o madea, “Sekilai-kilai jibeak!”

17 # Mzm. 118:22 Tapi Yesus demnong tobo'o ngen madeak, “Amen awei'o jano tai ayat yo?

‘Butau de nuang tukang-tukang bangunan bi jijai butau sudut?’

18Kute tun de us moi butau o bakea ajua; ngen api de teninggang butau o bakea jijai debu.”

Soal masen pajak

(Mat. 22:15-22; Mrk. 12:13-17)

19Lajau gu'au-gu'au agamo ngen imem-imem kepalo berusaho temakep Si pado saat o kulo, sebab tobo'o namen, bahwo tobo'o ba de jijai maksud-Ne ngen perumpamo o, tapi tobo'o saben ngen tun dau. 20Gu'au-gu'au agamo ngen imem-imem kepalo demnong Yesus. Tobo'o meluak ngen-Ne matai-matai de ce'icak awei tun jujur, supayo tobo'o dapet temakep-Ne ngen temanye ngen semreak-Ne ngen wewenang ngen kekuaso gubernur. 21Tun-tun o temnai ngen Yesus, “Gu'au, keme namen bahwo beneaba jano de Ko madeak ngen najea, ngen Ko cao mok, tapi ngen jujur ngajea dalen Allah. 22Jano keme buliak masen pajak ngen Kaisar jano coa?”

23Tapi Yesus namen maksud de licik o, lajau madeak ngen tobo'o, 24“Tenunjukba ngen Uku do keping caci pirok. Gambar ngen tulisan api dio?”

Jawab tobo'o, “Gambar ngen tulisan Kaisar.”

25Lajau nadeak Yesus ngen tobo'o, “Amen awei'o, neleiba ngen Kaisar jano de wajib ko melei ngen Kaisar, ngen Allah jano de wajib ko melei ngen Allah!”

26Tobo'o coa dapet temakep Si lem kecek-Ne neak muko tun dau. Tobo'o selle bakea jawab-Ne o ngen tobo'o diem.

Tetang idup igai

(Mat. 22:23-33; Mrk. 12:18-27)

27 # Kis. 23:8 Mako tekoa ngen Yesus kekedau tun Saduki, de coa makau adene idup igai. Tobo'o temnai ngen Si, 28#Ul. 25:5 “Gu'au, Musa temulis periteak yo utuk ite: Amen suang, de temuan pasuak semanei matei gidong ngenyanne masiak ade, tapi si coa teminggea anok, pasuakne arus nikeak ngen ngenyanne o ngen midup igai royot bagiak pasuakne o. 29Adeba tujuak tun pasuak. De dute nikeak ngen suang selawei lajau matei ngen coa teminggea anok. 30Lajau anok de keduai o nikeak, 31ngen de ketelau ngen awei'oba sapei ngen ketujuak pasuak o, tobo'o kutene matei ngen coa teminggea anok. 32Akherne selawei o kulo matei. 33Awei ipe uyo ngen selawei o, api neak antaro tun-tun o de jijai adukne pado bilai idup igai? Sebab ketujuakne bi nikeak ngen si.”

34Jawab Yesus ngen tobo', “Tun-tun de idup uyo yo nikeak. 35Tapi tun-tun de nanggap patut utuk dapet bagiak lem dunio de luyen o, coa nikeak. 36Sebab tobo'o coa dapet matei igai; tobo'o serai awei malaikat-malaikat ngen tobo'o adeba anok-anok Allah, kerno tobo'o bi idup igai. 37#Kel. 3:6 Tetang idup igaine tun matei, Musa bi melei namenne lem ayat tetang sakea tebo, neak ipe Tuhan de senbut ‘Allah Abraham, Allah Ishak ngen Allah Yakub’. 38Si iso Allah tun matei, tapi Allah tun idup, sebab neak adep Si kute tun idup.”

39Temi'uk do'o kekedau gu'au agamo madeak, “Gu'au, jawab-Nu o tepat sekilai.” 40Sebab do'o tobo'o coa binai igai temanye jejano ngen Yesus.

Hubungan antaro Yesus ngen Daud

(Mat. 22:41-46; Mrk. 12:35-37)

41Tapi Yesus madeak ngen tobo'o, “Awei ipe tun dapet madeak, bahwo Mesias adeba Anok Daud? 42#Mzm. 110:1 Sebab Daud suang madeak lem kiteb Mazmur:

‘Tuhan bi befirman ngen Tuanku:

Temotba neak depeak kanen-Ku,

43sapei Uku menea musuak-musuak-Nu

jijai takluk ngen Ko.’

44Jijai amen Daud sembut Si Tuanne, awei ipe mukin Si anokne kulo?”

Yesus melei nasehat supayo atei-atei te'adep gu'au-gu'au agamo

(Mat. 23:1-36; Mrk. 12:38-40)

45Ketiko kute tun dau temi'uk Yesus, Yesus madeak ngen penotoa-penotoa-Ne, 46#Luk. 11:43 “Waspadaba te'adep gu'au-gu'au agamo de galok paneu makei jubah panjang ngen galok temimo penan terhormat neak tengeak pasar. Tobo'o galok temot neak penan terhormat baik neak lem umeak semyang ngen pesta. 47Tobo'o mike jando-jando ngen mbut umeakne. Ngen utuk temutup kejahatan tobo'o o, tobo'o bedu'o pepanjang! Hukuman tobo'o paset benek!”

Currently Selected:

LUKAS 20: REJ

Highlight

Copy